مازداق

قازاقستاننىڭ ەڭبەك سىڭىرگەن قايراتكەرى, قر پرەزيدەنتى سىيلىعىنىڭ لاۋرەاتى, حالىقارالىق «الاش» ادەبي سىيلىعىنىڭ لاۋرەاتى, جازۋشى-جۋرناليست قايسار ءالىم مەرەيلى 75 جاسقا تولىپ وتىر. قالامگەر «مىرجاقىپتىڭ ورالۋى», «مۇڭدى ساپار», «ماحاببات جىرشىسى», «سىزداماشى, جۇرەگىم!», «ماڭگىلىك شەر», «كاۋسار», «بەزىنگەن لايلەك», «الاششىل جۇرەك», «سەيىلمەيتىن مۇڭ», «مەككە, ءمادينام مەنىڭ!», «قازاعىن وياتقان», ت. ب. كىتاپتارىمەن جانە سەگىز تومدىق شىعارمالار جيناعىمەن وقىرماندارعا جاقسى تانىس.

جۋرناليست-جازۋشى قايسار ءالىم – قازاق جۋرناليستيكاسىنىڭ بەلدى وكىلى, جوعارى ۇلگىدەگى كاسىبي مامانى. جەتپىس بەستىڭ بيىگىنە شىعىپ وتىرعان قارىمدى قالامگەردىڭ ءومىر جولى تۋا بىتكەن دارىن مەن تاڭداپ العان ماماندىقتىڭ ءساتتى ۇيلەسۋىنىڭ جارقىن ۇلگىسى دەسە بولادى.

ول الاش كوسەمدەرى احمەت پەن مىرجاقىپ ومىرگە كەلگەن قاسيەتتى تورعاي توپىراعىندا دۇنيە ەسىگىن اشتى. مىرجاقىپتىڭ جاقىن ناعاشى بولىپ كەلۋىنىڭ ءوزى وعان ەرەكشە اسەر ەتكەن سياقتى. كەڭەستىك كەزەڭدە قانشا تىيىم سالىنعانمەن, ۇلكەندەردىڭ اڭگىمەسىنەن جاقاڭنىڭ تالانتىنا تابىنىپ ءوستى. بولاشاقتا جۋرناليست بولۋ تالابىنىڭ ءبىر ۇشى وسى نەگىزدە جاتقانداي. وسىلاي وقۋشى كەزىنەن تىلشىلىك كاسىپكە اۋەستەندى. ەسكى گازەتتەردى جيناپ, قايتا-قايتا ماشىقتانىپ وقىعانى ءالى ەسىندە. ءوزى دە وسىنداي ماقالالار جازىپ جاريالاسام دەگەن قيال قۇشاعىندا ءجۇردى. ول ويى دا ورىندالدى. اۋداندىق, وبلىستىق گازەتتەردە تىرناقالدى شاعىن ماقالالارى ءجيى-ءجيى جارىق كوردى. جاس ءتىلشى وسىلاي ءدۇيىم جۇرتقا تانىلدى. ول وسىلاي جالىنداعان جاس شاعىنان اينالاسىندا بولىپ جاتقان وزگەرىستەردى بايقاپ, الاڭداي الدى. ونى تۋعان اۋىلى, وسكەن ورتاسى, تابيعات تاعدىرى, قوعامدىق جانە ساياسي-الەۋمەتتىك ءومىر قاتتى تولعانتتى.

قوستاناي وبلىستىق «كوممۋنيزم تاڭى» (قازىرگى «قوستاناي تاڭى») گازەتى ءتۇرلى تاقىرىپتارعا ماقالا جازىپ ىسىلعان جيىرما ەكى جاستاعى جىگىتكە ۇلكەن سەنىم ارتىپ, رەداكتسياعا قىزمەتكە قابىلدايدى. وسىدان جارتى عاسىرداي بۇرىنعى بۇل ەلەۋلى وقيعا ونىڭ ومىرىندە ۇمىتىلماستاي ءىز قالدىردى. تاريحي شەجىرەلى ءوڭىردىڭ بايىرعى باسىلىمىنىڭ ساقا جۋرناليستەرى رەداكتسيا ەسىگىن قىمسىنا اتتاعان جاس تالانتتى ەش جاتىرقاعان جوق.

وسىلايشا ول العاشقى ومىرلىك جانە شىعارماشىلىق شىنىعۋ جولىنان ءوتتى. قازاقى تاربيەدە وسكەن قالامى جۇيرىك دارىندى جاستىڭ شىعارماشىلىق ورتاعا كىرۋىنىڭ ءوزى ۇلكەن ابىروي ەدى. باقىتجان جانگيسين, سىرلىباي بۇركىتباەۆ, ساپابەك ءاسىپوۆ سىندى باسىلىم باسشىلارى مەن باسقا ارىپتەس اعالارى قامقورلىق قۇشاعىنا الىپ, جاس تىلشىدەن ناعىز كاسىبي جۋرناليست قالىپتاستىردى. ولار ونى باۋلىدى, جىگەرىنە جىگەر قوستى, قالامىنا قانات ءبىتىردى.

ءيا, ولار, جۋرناليستەر ايرىقشا ادامدار بولاتىن. قازىرگىدەن دە بولەك. تىلشىلىك تىرلىككە دەگەن وزگەشە كوزقاراس, وزگەشە جۇمىس ءستيلى. جاس جۋرناليست قايسار ىستەگەن كەزدەگى گازەت تە مۇلدەم وزگەشە ەدى. اعا بۋىن جۋرناليستەر دە, ول دا گازەتپەن بىرگە جانە گازەت ىشىندە ءومىر ءسۇردى. قايسار ءۇشىن دە گازەت جەكە ءومىرىنىڭ ءمانى, ماقساتى مەن قۋانىشى بولدى. گازەت ولار ءۇشىن ەكىنشى ءۇيى بولاتىن. ولار مۇندا تاڭ بوزىندا كەلىپ, قاراڭعى قويۋلانا قايتاتىن. بۇل جاس تالاپ ءۇشىن ونەگەلى ءومىر مەكتەبى بولدى.

ادەبي قىزمەتكەر رەتىندە باستاپ, بۇكىل وبلىستى ارالادى, شالعايداعى شوپاندار اۋىلىنىڭ, ءوندىرىس وشاقتارىنىڭ تىنىس-تىرشىلىگىمەن تەرەڭ تانىستىرعان قۇلاش-قۇلاش ماقالالار مەن سۋرەتتەمەلەر, وچەركتەر جازدى. ۇشقىر ويلى جۋرناليستىك قابىلەتى مەن كەڭ قۇلاشتى قالام قارىمىنىڭ ارقاسىندا ارناۋلى ءتىلشى, جاۋاپتى ءبولىمنىڭ مەڭگەرۋشىلىگىنە دەيىن ءوستى.

وبلىس وقىرماندارىنا ونىڭ وي ۇشقىرلىعى, ىشكى تۇيسىكتەرىن جەتكىزە ءبىلۋ مانەرى ۇنايتىن, ەرەكشە بايقاعىشتىعى دا سۇيسىنتەتىن. اۋىلدا تۋىپ وسكەن, ونەركاسىپتەن ەش حابارى جوق قايسار وسى سالاعا بايلانىستى ءبولىمدى باسقارا ءجۇرىپ, ءوندىرىس تاقىرىبىن جەتىك مەڭگەردى. سول سەبەپتى دە تاۋ-كەن, جەڭىل ونەركاسىپ سالاسى بولسىن, باسقا دا ءىرى ءوندىرىس ورىندارىنا بايلانىستى دايەكتى سىن ايتا الدى. ول وسىلاي ادامدى جالىقتىرىپ جىبەرەرلىك وندىرىستىك تاقىرىپتى ويناتىپ جازدى, ويلاندىرىپ جازدى.

جەرلەستەرى ونىڭ ءار شىعارماشىلىق جەتىستىگىنە قۋاندى. ابىروي مەن قۇرمەت وعان سول كەزدە كەلدى. ەسىمى وبلىستىق قۇرمەت كىتابىنا جازىلىپ, جۋرناليستەر اراسىنداعى وبلىستىق بايقاۋدىڭ لاۋرەاتى اتاندى. جاڭا ماراپات, جاڭا سىيلىق العان سايىن قالام قۋاتى قاتايا ءتۇستى. بۇل ەرەكشەلىك ونىڭ جەكە تۇلعاسىنىڭ تۇتاستىعىن, تالانت قاسيەتىن ايشىقتادى.

1990 جىلى تامىزدا ەلىمىزدىڭ باس باسىلىمى – «ەگەمەن قازاقستان» گازەتىنىڭ تورعاي وبلىسىنداعى مەنشىكتى ءتىلشىسى بولىپ تاعايىندالىپ, قاجىرلى قالامگەردىڭ ەكىنشى ۇلكەن بەلەستى ءومىرى باستالدى. اعا گازەت ءۇشىن مۇنداي تالانتتى دا تاجىريبەلى ءتىلشى ايتارلىقتاي ولجا بولدى. ءبىر جىل سالىپ الاش ارىستارى ارمانداعان تاۋەلسىزدىك كۇنى تۋىپ, ەگەمەن ەلدىڭ قارىشتى قادامدارى مەن جاڭا جەتىستىكتەرىن پاش ەتكەن, تاريح تەرەڭىنەن سىر بۇككەن «اقتاڭداقتار» بەتىن اشىپ, تۇلعالار تاعدىرىن جۇرەكتى شىمىرلاتىپ وندىرە جازعان تۋىندىلارى باس گازەت بەتىندە ءجيى جاريالانىپ, وقىرماندار ىقىلاسىنا بولەندى. 1992 جىلى كۇزدە ارنايى ەكسپەديتسيا قۇرامىندا الاش ارداقتىسى مىرجاقىپ دۋلاتوۆتىڭ مۇردەسىن 57 جىلدان سوڭ كارەليادان اكەلىپ, تۋعان جەرى – تورعايعا قايتا جەرلەۋ شاراسىنىڭ باسى-قاسىندا بولعان ساپار تۋرالى كۇن سايىن رەپورتاج جاريالاعانىن ەش ۇمىتپاس. وسى تاريحي وقيعا تۋرالى جازعان «مۇڭدى ساپار» كىتابى ءۇشىن دە قازاقستان جۋرناليستەر وداعىنىڭ م.دۋلاتوۆ اتىنداعى سىيلىعىن العان بولاتىن.

«ەگەمەن قازاقستان» گازەتىندە شيرەك عاسىرعا جۋىق جۋرناليستىك قىزمەت اتقارعان ەكەن. تاۋەلسىزدىك تامىرشىسىنداي تالعاممەن جازىپ تامساندىرعان تالاي تۇششىمدى تۋىندىلارى وسى باسىلىم بەتىندە جارىق كوردى. ءوزى ەرەكشە اتاپ جازعانداي, تاۋەلسىزدىك ءتىلشىسى اتانىپ, وسى بيىك مانداتتى ۇلكەن جاۋاپكەرشىلىكپەن جوعارى ۇستاي ءبىلدى.

جۋرناليست, جازۋشى, كوركەمسوزشى, ولكەتانۋشى. ءوزىنىڭ جارتى عاسىرعا جۋىق قالامگەرلىك ومىرىندە رەسپۋبليكالىق باسپالاردان شىققان 27 كىتاپتىڭ اۆتورى رەتىندە تانىلىپتى. ال 2007 جىلى 8 تومدىق شىعارمالار جيناعىنىڭ جارىق كورۋى جۋرناليست-جازۋشىنىڭ ۇلكەن قالامگەرلىك قارىمىن بايقاتسا كەرەك. ودان باسقا وتىزعا جۋىق جيناقتارعا ەنگەن پۋبليتسيستيكالىق ماقالالارى مەن وچەركتەرىندە ەڭبەك ادامدارىنىڭ شىنايى بەينەسى مەن ازاماتتىق تۇلعاسىن سومدادى.

قايسار دەسە قايسار. جازباعان تاقىرىبى, قالام تارتپاعان سالاسى جوق شىعار. كەن كوزدەرىن ىزدەپ, دالا كەزىپ شارق ۇرعان گەولوگتار, بىتىك استىق ءوسىرۋ جولىندا جانقيارلىق ەڭبەك ۇلگىسىن كورسەتكەن ديقاندار, اۋە كوگىندە سامعاعان ۇشقىشتار, قۇرىش قولدى قۇرىلىسشىلار, باسقا دا ءتۇرلى ماماندىق يەلەرى جىگەرلى ءجۋرناليستىڭ قالام قۇدىرەتىنىڭ ارقاسىندا ەڭبەكتە عانا ەمەس, ەلگە تانىلۋ جاعىنان دا جولدارى بولىپ, يگى ىستەرى بۇكىل جۇرتقا ءمالىم ەتىلدى. ول تاعدىرلى تاقىرىپتاردى دا باتىل جازدى. عاسىر اپاتىنا سانالعان چەرنوبىل قاسىرەتى تۋرالى «ماڭگىلىك شەر» حيكاياتى تەرەڭنەن تولعاعان زۇلمات شەجىرەسى ىسپەتتى.

جۇزگە جۋىق پورترەتتىك ماقالالارىن ايتساڭىزشى! الاش كوسەمدەرى احمەت پەن مىرجاقىپ, ۇلى عالىم قانىش ساتباەۆ, جىر جامپوزى نۇرحان احمەتبەكوۆ, تەمىر تۇلپاردى تىزگىندەگەن قازاقتىڭ قايسار تراكتورشى قىزى كامشات دونەنباەۆا, ۇلتتىق پوەزيانىڭ جارىق جۇلدىزدارى سىرباي ماۋلەنوۆ پەن عافۋ قايىربەكوۆ جانە ت. ب. كوپتەگەن تاريحي تۇلعالار تۋرالى تولعانىسقا تولى تارتىمدى تۋىندىلارى وقىرمان كوڭىلىن تاپتى.

ەل ومىرىندەگى ەرەكشە وقيعالار مەن ۇلت تاريحىنا تۇڭعىش تۇرەن سالعان تۇلعالاردى ءبىرىنشى بولىپ جازۋ باقىتى بۇيىرعان دا وسى ءبىزدىڭ كەيىپكەر. ەلىن اڭساپ كەلگەن شەتەلدىك اعايىنداردى ارقالىق اۋەجايىندا العاشقىلار قاتارىندا كۇتىپ الىپ, ءبىرىنشى بولىپ ماقالا جازۋى, قازاقتىڭ تۇڭعىش عارىشكەرى توقتار اۋباكىروۆتى كوك زەڭگىردەن العاش قارسى العانداردىڭ ءبىرى رەتىندە تاعى دا ءبىرىنشى بولىپ «توقتارلار تورعاي جەرىندە» دەپ قۋانىشتى ماقالاسىن «ەگەمەندە» جاريالاۋى – ءجۋرناليستىڭ ەڭ ءبىر باقىتتى ساتتەرى.

قايسار جۋرناليست ۇنەمى الدىڭعى شەپتە جۇرەدى, ۇنەمى باستاماشىلىعىمەن كوزگە تۇسەدى. 1990 جىلى تورعايدا «ەگەمەننىڭ» ءتىلشىسى بولىپ جۇرگەندە العاشقى ماقالاسىن «تورعاي تەاترى قايتادان اشىلا ما؟» دەپ جابىلىپ قالعان تەاتردى قايتا اشقىزۋ ماسەلەسىن باستاما ەتىپ كوتەرىپ, ماقساتىنا جەتەدى, تورعايدىڭ شىنايى پاتريوتىنىڭ ماقالاسى تۇرتكى بولىپ, تەاتر قايتا تۇلەيدى. ءتىپتى باستاماشىل ءجۋرناليستىڭ وي تاستاۋىمەن تەاتر جەكە عيماراتقا يە بولىپتى. ال 1992 جىلى 1916 جىلعى ۇلت-ازاتتىق كوتەرىلىس باسشىلارىنىڭ ءبىرى كەيكى باتىردىڭ سانكت-پەتەربۋرگتە ساقتالعان باس سۇيەگىن ەلگە قايتارۋ تۋرالى «كەشىر, كەيكى بابا!» اتتى ماقالا جازىپ, ءبىرىنشى بولىپ باستاما كوتەرگەن ەدى. ۋاقىت تورەشى. جۋرناليست ارمانى ارادا جيىرما جىلداي ۋاقىت وتكەندە ايتەۋىر ورىندالدى. حVII-ءحVىىى عاسىرلاردا بوگەنباي, قابانبايلارمەن بىرگە سىرتقى جاۋعا قارسى سوعىستا وشپەس ەرلىك كورسەتكەن, تۇركىستاندا جەرلەنگەن اتاقتى باتىر ماديار جاۋعاشتىۇلىنىڭ ەسىمىن قوجا احمەت ياساۋي كەسەنەسىندەگى تىزىمگە ەنگىزۋ قارەكەتىن ويعا العان دا وسى قايسار. ول باستاماسى دا ىسكە استى.

قايسار ءجۋرناليستىڭ جازۋشىلىعى – ءوز الدىنا بولەك ءبىر اڭگىمە. بۇل جەردە قازاقستاننىڭ حالىق جازۋشىسى ءازىلحان نۇرشايىقوۆپەن اراداعى تىعىز شىعارماشىلىق بايلانىسى جەكە دارا تۇرادى. 1975 جىلى «سەرپىن» دەگەن وچەركىن وبلىستىق گازەت باسشىلارى بۇل جانرعا جاتقىزباعاندىعىنا كەلىسپەي, وسى تۋىندىسىنىڭ جانرىن انىقتاۋدى سۇراپ, جۋرناليستيكانىڭ قىر-سىرىن جەتە بىلەتىن ازاعاڭا حات جازادى جانە وسىعان قوسا «جۇرەك جىلۋى» اتتى وچەركىن جىبەرىپ, ساراپتاپ بەرۋدى وتىنەدى. جاۋاپ حاتىندا جۋرناليست-جازۋشى جاس تالانتتىڭ ەكى تۋىندىسىن دا وچەرك جانرىنا جاتقىزىپ, ىزگى تىلەگىن بىلدىرەدى, ءتىپتى «جۇرەك جىلۋى» وچەركىن «قازاقستان مۇعالىمى» گازەتىنە ۇسىنادى. حاتىنىڭ سوڭىندا «ءسىزدىڭ جاي جۋرناليست ەمەس, جۋرناليست-جازۋشى بولۋىڭىزعا شىن جۇرەكتەن تىلەكتەسپىن» دەپ اق باتاسىن بەرەدى. ءسويتىپ, قايسار ءجۋرناليستىڭ قايسار جازۋشىعا اينالۋىنىڭ نەگىزى وسى تۇستا قالانسا كەرەك. ونىڭ ۇستىنە قايساردىڭ العاش ماقالا جازعان بالا كەزىنەن باستالعان شىعارماشىلىق ءومىرى تۋرا ازاعاڭنىڭ قالامگەرلىك داڭعىل جولىنىڭ كوشىرمەسى ىسپەتتى. اعا جازۋشى ءومىر بويى كۇندەلىك جازسا, جۋرناليست قايسار ءالىم دە جاس شاعىنان وسىنداي اۋەستىكپەن اينالىسىپتى.

وسىنىڭ ءبارى – ونىڭ مايدانگەر جازۋشى ءومىرىن بىلمەي-اق ءوز بەتىمەن اينالىسقان تىرلىگى. مۇنداي دا ۇقساستىق بولادى ەكەن. 1997 جىلى تورعاي وبلىسى تاراعاننان كەيىن تاعدىر ايداپ جاڭا استانا تورىنەن ءبىر-اق شىعادى. مادەنيەت مينيسترلىگىندە ءتاپ-ءتاۋىر قىزمەت اتقارعانمەن, كوڭىلى ءوزىنىڭ سۇيىكتى كاسىبى – تىلشىلىككە اۋادى دا تۇرادى. ءسويتىپ, 2000 جىلى «ەگەمەن قازاقستان» گازەتىنە قايتا قابىلدانىپ, تىلشىلىك قىزمەتكە تۇراقتى اۋىسادى. وسىلايشا ازاعاڭنىڭ جۋرناليستىك جولىن قايتالايدى. كەزىندە ول كىسى دە پاۆلودار وبلىستىق گازەتىنىڭ رەداكتورى لاۋازىمدى قىزمەتىن ويداعىداي اتقارعانمەن قالامگەرلىگى جەڭىپ, «سوتسياليستىك قازاقستان» (قازىرگى «ەگەمەن قازاقستان») گازەتىنىڭ سول ەرتىس وڭىرىندەگى مەنشىكتى تىلشىلىگىن قالاپ العان عوي. مىنە, جۋرناليست-جازۋشىنىڭ سول قادامىن قايسار ءىنىسى ەرلىككە بالاپ, ءوزى دە رۋحاني ۇستازىنىڭ جولىن قايتالادى, شىعارماشىلىق جاڭا بيىكتەردى باعىندىردى.

جازۋشى قايسار ءالىمنىڭ «ماحاببات جىرشىسى» اتتى ەپيستوليارلىق حيكاياتى قوس قالامگەردىڭ وتىز جىلدان استام ءوزارا جازىسقان حاتتارى سىر شەرتكەن ءومىر مەن قوعام شىندىعى كوركەم كومكەرىلگەن تەرەڭ ويلى دا ماعىنالى تۋىندى دەسە بولادى. شىعارمادا ازاعاڭنىڭ ماحابباتپەن ۇشتاسقان اسىل بەينەسى ايقىن كورسەتىلىپ, ونەگەلى ءومىرى شىعارماشىلىق لابوراتورياسىمەن تىعىز ساباقتاستىرىلا كورسەتىلگەن. بۇل جولى قايسار جازۋشى اعاسىن جاڭا قىرىنان قايتالاپتى. حح عاسىردىڭ ورتاسىندا ازاعاڭ ءوزى ەرەكشە قۇرمەت تۇتقان ۇستازى, كورنەكتى جازۋشى مۇقان يمانجانوۆپەن ءوزارا بىرنەشە جىل بويى ۇزبەي حات جازىسىپ, ەلدىك, ەرلىك, ادامگەرشىلىك, شىعارماشىلىق مۇراتتارىن ءسوز ەتسە, ارادا جارتى عاسىرداي ۋاقىت وتكەندە قايسارعا ءوزى ءپىر تۇتقان ۇستازى ازاعاڭمەن ۇزاق جىلدار تۇراقتى تۇردە حات جازىسىپ تۇرۋ باقىتى بۇيىرعان ەكەن.

ۇستاز بەن شاكىرت حاتتاسۋلارى وقىرمان كوڭىلىنەن شىقتى. «ماحاببات جىرشىسى» تۋرالى ازاعاڭ: «قاراپايىم ادام, قاراپايىم ازامات, قاراپايىم جۋرناليست-جازۋشى مەن تۋرالى مۇنداي كىتاپ جازعانىنا ىشتەي قۋانامىن» دەپ جىلى ءىلتيپات ءبىلدىرىپتى. قايساردىڭ ءوزى دە: «ماحاببات جىرشىسى» قوماقتى كىتابىم مەنى دە وسى جازۋشى اعامنىڭ اق جولىنا سالىپ, ەلىمە سىيلى ەتە تۇسكەندەي» دەپ اعىنان جارىلادى.

ازاعاڭ ۇستازىنىڭ كۇندەلىك جازۋ ونەگەسى وزىنە ۇقساعان شاكىرتىنىڭ قىرىق جىلدان استام جۇرگىزگەن كۇندەلىك بايانىنان ايقىن بايقالىپ, قايسەكەڭنىڭ جاستىق شاق پەن كەمەل شاق ارالىعىنداعى ۇزىن-سونار بەل-بەلەستى ءومىرى, قىم-قۋىت تىلشىلىك تىرلىگى, زامان شىندىعى «ءوز ورمەگىم» اتتى بىرنەشە تومنان تۇراتىن كۇندەلىك-حيكاياتتارىن قۇرادى.

قالامگەردى زيالى قاۋىم جان-جاقتى ءبىلىمدى, قاجىرلى شىعارماشىلىق ىزدەنىستەردىڭ ادامى رەتىندە جاقسى بىلەدى. ءار جاريالانىمى تەرەڭدىگى مەن تاقىرىپتى مەڭگەرگەن جوعارى مازمۇندىلىعى جاعىنان باۋراپ الادى. بۇل – جاس جۋرناليستەرگە عيبراتتى ۇلگى-ونەگە.

ۇلكەن ىزدەنىستەر مەن جاڭا ءۇردىستى باستامالار جولىنداعى قالامگەردىڭ شىعارماشىلىق الار اسۋلارى ءالى الدا دەپ ويلايمىز. اناسى جارىقتىق سوڭعى دەمى بىتەردە: «قالامسابىڭدى تاستاما!» دەپ ونەگەلى وسيەت ايتقان ەكەن. لايىم سولاي بولسىن! قالامىڭىز قولىڭىزدا, ءاردايىم ءبىرىنشى بولىڭىز, قايسار قالامگەر قايسار اعا!

سەرىكقازى قوراباي,

قازاقستان جازۋشىلار وداعىنىڭ مۇشەسى