مەدەت سالىقوۆ, سازگەر, پرەزيدەنت وركەسترىنىڭ ءانشىسى: قازاقى ءيىرىمى بار اندەر جازعىم كەلەدى

قازىرگى حيتكە اينالعان ≪جىبەك سەزىم≫ – ءسىزدىڭ العاشقى سازگەرلىك قادامىڭىز. ءاننىڭ شىعۋ تاريحى تۋرالى ايتساڭىز?
اسكەن قاجىم, مۇعالىم

باسىندا ەل مەنى «الامان» توبىنىڭ ءانشىسى رەتىندە تانىسا, «جىبەك سەزىم» ءانى شىققالى اتى-جونىممەن بىلە باستادى. وكىنىشكە قاراي, كەيىنگى كەزدە انشىلەرىمىز شەت ەلدەن ۇرلانعان نەمەسە سوعان وتە-موتە ۇقسايتىن اۋەندەرگە اۋەس بوپ الدى. قازاقى ءيىرىمى بار ءان جازعىم كەلدى. كوپ قينالعان جوقپىن. سەبەبى, مەنىڭ وقىعان وقۋىم حالىق ءانى بولعاندىقتان با, حالىققا ۇناعان سياقتى. ءسوزىن بەلگىلى اقىن قالقامان سارين جازدى. وسى ءاندى جازاردا كوپ ۋاقىت اقىلداسىپ, جارىققا شىعاردىق. كەيبىر اتتەگەن-اي دەگەن جەرلەرى دە بولدى. قالقامان اندەگى «جانىمنان جىراق كەتتىڭ, جىلىتىپ جات قۇشاعىن» دەگەن جەرىن جانىمنان جىراق «كەتپە» دەپ وزگەرتپەكشى بولدى. بىراق ول كەزدە انگە بەينەبايان ءتۇسىرىلىپ قويعان بولاتىن. كەيبىر تىڭد ارماندار وسى سوزدەن «استار» ىزدەپ جاتادى.

ومىرلىك جارىڭىز, ءانشى كلارا تولەنباەۆامەن قالاي تانىستىڭىزدار?
سارا اسىلبەك, ستۋدەنت

كلارا ەكەۋمىز الماتىداعى قۇرمانعازى اتىنداعى مەملەكەتتىك كونسەرۆاتوريادا بەكبولات تىلەۋحان اعامىزدان ءبىلىم الدىق. تانىستىعىمىز سول جەردەن باستالىپ ەدى. ءبىز وتباسىن قۇراعاندا ۇستازىمىز قاتتى قۋانعانى ەسىمدە.

سىزدەردە ≪وتباسىندا ءبىر ونەر ادامى بولسا جەتەدى≫ دەگەن پىكىر جوق پا?
ايدانا سىدىقوۆا, دارىگەر

ولاي بولعان بولسا كلارانى قازىر ەشكىم تانىماس ەدى عوي. ۇلتتىق مادەنيەتىمىزدە ەرەكشە ورنى بار, ءداستۇرلى ءاننىڭ مەكتەبىن جالعاستىرىپ جۇرگەن كلارانى جارىققا شىعارماۋ – مەن ءۇشىن قيانات بولار ەدى. سوندىقتان, ءا ر ق ا ش ا ن ق و ل د ا پ وتىرامىن. جالپى, ۇيدە ەكى ونەر ادامى بولعان اسا قيىندىق تۋعىزا قويمايدى.

سازگەر, ءانشى رەتىندە شىعارماشىلىق كەش وتكىزۋ نەمەسە ءان جيناق شىعارۋ ويىڭىزدا بار  ما?
مارات قۋانىشوۆ, ستۋدەنت

ءيا, ونداي ويلار بار. بىراق ەرتەرەك سياقتى. ءالى دە بولسا ەڭبەكتەنۋ كەرەك. يگىلىكتىڭ ەرتە-كەشى جوك.

≪الامان≫ توبى قاشان, قالاي قۇرىلدى? جالپى, ءداستۇرلى باعىتتى ۇستاناتىن توپ قۇرۋ كىمنىڭ يدەياسى?
سامال داناشەۆا, كىتاپحاناشى

توپتىڭ قۇرىلعانىنا 9 جىل بولدى. ءبىزدىڭ رەپەرتۋارىمىزدا ءداستۇرلى جانە  رەترو اندەر كوپ. سەبەبى, ءوزىڭىز ايتپاقشى ونەرىمىز ۇلتتىق بوياۋعا باعىتتالعان. ەسترادا شەتتەن كەلگەن ونەر سالاسى بولسا, سونى ۇيرەنىپ, ءبىزدىڭ ەتنوسىمىزعا جاقىن فورماسىن جاساپ, وڭدەپ,  تىڭدارمانعا ۇسىنۋ كەرەك سياقتى. مىسالى, وزبەك, ءۇندى حالقىنىڭ ەسترادالىق اندەرىنەن سول ۇلتتىڭ ءيىسى اڭقىپ تۇرادى. جاقىندا تۇركيا جەرىندە بولعان ەدىك. سول جەردەگى ءبىر ادامدار بىزگە «ءسىز جاقتىڭ ەسترادالىق اندەرى ورىستاردىڭ انىنە ۇقسايدى» دەپ, قويىپ قالدى. ءبىز ويلانىپ قالدىق.

≪الاماننىڭ≫ اقبەرەنى نۇربولات توپتان نەگە كەتتى?
گۇلنۇر كەرىمباەۆا, وقۋشى

نۇربولات وتە ونەرلى جىگىت. ونىڭ ءار ءتۇرلى حالىقتىڭ اندەرىن ايتقانىنا ءبىراز جۇرت ءتانتى بولعان. جەكە شىعارماشىلىعىن باستاعىسى كەلگەن شىعار. قازىرگى ۋاقىتتا ءوزىنىڭ جارى انارمەن قوسىلىپ ءان شىرقاپ ءجۇر. توپقا جاڭادان كەلگەن ەركەبۇلان كاسىبي ءبىلىمى بار ءانشى ازامات. قازىر پرەزيدەنت وركەسترىندە بىرگە قىزمەت جاسايمىز.

≪الامان≫ توبىن ۇجىمدىق كونتسەرتتەردە كوپ كورە بەرمەيمىز. بۇعان نە سەبەپ?
ءداريا داستانوۆا, وقىرمان

كوپتەگەن كونتسەرتتەر مەن تەلەۆيزيالىق شوۋ باعدارلامالار الماتى قالاسىندا وتەدى. استانا مەن الماتىنىڭ اراسىندا ءجيى ءجۇرۋ كىمگە بولسىن قيىنعا تۇسەرى انىق. بىردە بولماسا, بىردە بارا الماي جاتامىز. مىنە, وسىنداي سەبەپتەر ونەر جولىمىزعا قيىندىق تۋعىزىپ كەلدى. بۇيىرتسا, استانا مادەنيەتتىڭ ورتاسى بولاتىنىنا كامىل سەنەمىن.

اكە دە, انا دا ونەر جولىندا. ال, بالالارىڭىزدىڭ ونەرگە يكەمى بار ما?
كۇلان جاعىپاروۆا, زەينەتكەر

بالالارىم ونەردەن قۇر الاقان ەمەس.ۇلكەن قىزىم اقكەربەز – رەسپۋبليكالىق بىرنەشە بايقاۋلاردىڭ جەڭىمپازى. ەكىنشى قىزىم ايكەرىم – بالاباقشادا. ءاندى تاماشا ايتادى. كىشكەنتاي ۇلىم نۇرساماتتىڭ دا مۋزىكاعا يكەمى بار.

ونەردەگىلەر وزدەرى جۇرگەن سالاعا جاستاردى اكەلىپ جاتىر. ءسىزدىڭ شاكىرتتەرىڭىز بار ما?
سامات اقجانوۆ, وقىرمان

ءبىر كەزدە ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە اننەن ساباق بەرگەنمىن. سول جەردەگى بىرنەشە شاكىرتىم قازىر ونەر سالاسىندا قىزمەت ەتىپ ءجۇر.

جازعى دەمالىستى قالاي وتكىزىپ جاتىرسىزدار?
گۇلدانا ماقاتوۆا, ەكونوميست

جاز شىعا اۋىلعا تارتام. تۋعان جەر ىستىق قاشاندا. تارباعاتاي, وكپەكتى تاۋىنىڭ سامالىن يىسكەمەي, كوڭىل كونشىمەيدى. جاقىندا تۋعان جەرىمە ارناپ ءان جازدىم. ءسوزىن بەلگىلى ايتىسكەر اقىن سەرىكزات دۇيسەنعازين جازدى. سەكەڭ ەكەۋمىزدىڭ كىندىك قانىمىز ءبىر جەرگە تامعان.

ەركەجان ساتىمبەك