مەملەكەت باسشىسى استانانىڭ «جاسىل ايماعىنىڭ» دامۋ بارىسىمەن تانىستى

نۇرسۇلتان نازارباەۆ ەلوردانىڭ ورمان پلانتاتسيالارىن جانە «اق قايىڭ» كوشەتتەر پيتومنيگىن ارالادى. سوڭىنان ءداستۇرلى قىرعاۋىل ۇشىرۋ شاراسىنا قاتىستى.

بۇدان بولەك, مەملەكەت باسشىسىنا اعاش وتىرعىزىلاتىن اۋماقتىڭ جالپى كولەمىن ۇلعايتۋ جۇمىستارىنىڭ بارىسى, سونداي-اق 2018 جىلعا دەيىنگى جاسىل جەلەكتى الاپ پەن ونىڭ بيوالۋاندىلىعىن دامىتۋ جوسپارى تۋرالى باياندالدى.

سونداي-اق قازاقستان پرەزيدەنتى بۇقارالىق اقپارات قۇرالدارى وكىلدەرى ءۇشىن بريفينگ وتكىزدى.

ەلباسى استانا ماڭىنداعى جاسىل جەلەك ورمان شارۋاشىلىعى قىزمەتكەرلەرى مەن عالىمداردىڭ تىنىمسىز ەڭبەگىنىڭ ارقاسىندا پايدا بولعانىن اتاپ ءوتتى.

– جىلدار بويعى ەگىلگەن اعاشتاردىڭ جالپى اۋماعى 73 مىڭ گەكتار بولدى, جىل سايىن قوسىمشا 5 مىڭ گەكتار اعاش وتىرعىزىلادى. بۇل اۋماق كولەمى جونىنەن بۋراباي ۇلتتىق ساياباعىنا تەڭ. ءبىزدىڭ ەندىگى مىندەتىمىز – ەلوردا ماڭىنداعى ورمان اعاشتارى الابىن بۋراباي ساياباعى ايماعىنا ۇلاستىرۋ, – دەدى نۇرسۇلتان نازارباەۆ.

قازاقستان پرەزيدەنتى ەلىمىزدىڭ ەكولوگيالىق جاعدايىن جاقسارتۋ ءۇشىن بارلىق وڭىردە ورمان ءوسىرۋ ءىسىن دامىتۋ قاجەتتىگىنە دە نازار اۋداردى.

– وسى جىلدارى جاڭا ەلوردا – استانا عانا ەمەس, سونىمەن قاتار «ەكىنشى بۋراباي» بوي كوتەردى. بۇعان دەيىن مۇنىڭ ءبىرى دە بولماعان. ەن دالادا جاڭا قالا بوي كوتەرۋمەن بىرگە ونىڭ ماڭىندا «جاسىل ايماق» تا پايدا بولدى. سونىڭ ارقاسىندا قالادا شاڭ-توزاڭ مەن ۇيتقىعان جەل دە ازايدى. بۇل ورمانداردا جەمىس-جيدەكتەردىڭ الۋان ءتۇرى وسەدى, جان-جانۋار الەمى پايدا بولدى, – دەدى ەلباسى.

سوڭىندا مەملەكەت باسشىسى ەلىمىزدىڭ بارشا ازاماتتارىن اعاش ەگۋ ىسىنە ءوز ۇلەستەرىن قوسۋعا, قازاقستاننىڭ تابيعي بايلىقتارىن ايالاۋعا شاقىردى.

                                                                                                     ***

استانا ماڭىندا اعاش وتىرعىزىلعان اۋماقتىڭ جالپى كولەمى 73 مىڭنان استام گەكتاردى قامتيدى. بولاشاقتا ەلوردانىڭ «جاسىل ايماعىن» اقمولا وبلىسى اقكول اۋدانى ورماندارىمەن ۇشتاستىرۋ جوسپارلانۋدا. بۇدان بولەك, قالانىڭ «جاسىل ايماعىندا» تۋريزم مەن دەمالىس ورىندارىن دامىتۋ ماقساتىمەن 2014 جىلى «جاسىل ايماق» قىزىلجار ورمان شارۋاشىلىعى اۋماعىندا سافاري-ساياباعى قۇرىلدى. 2015 جىلى جابايى جان-جانۋارلار ءتۇرى مەن سانىن كوبەيتە وتىرىپ, ساياباق اۋماعىن 300 گەكتارعا دەيىن كەڭەيتۋ جونىندە جوبا ازىرلەندى.

akorda.kz