كەشە «نۇر وتان» حدپ استانا قالالىق فيليالى مەن قالالىق «ارداگەرلەر ۇيىمى» اراسىندا ىنتىماقتاستىق تۋرالى مەموراندۋمعا قول قويىلدى.
ارداگەرلەر مەن جاس ۇرپاقتىڭ اراسىنداعى ساباقتاستىق ءداستۇردى جەتىلدىرۋ ماقساتىندا جاسالعان مەموراندۋمدا ۇلى وتان سوعىسىنىڭ مايدانگەرلەرى مەن ولارعا تەڭەستىرىلگەن ازاماتتاردىڭ ونەگەلى ءومىرىن ناسيحاتتاۋ ارقىلى وتاندىق ءپاتريوتيزمدى دامىتۋدىڭ جولدارى ايقىندالعان. سونىمەن قاتار مەملەكەتتىك شارالارعا ارداگەرلەر قاۋىمى مەن جاستاردىڭ بەلسەندى قاتىسۋى مەن ۇلەس قوسۋى جونىندە دە ايتىلعان.
«نۇر وتان» حدپ استانا قالالىق فيليالى توراعاسىنىڭ ءبىرىنشى ورىنباسارى قايرات جاڭابەرگەنوۆ پەن قالالىق «ارداگەرلەر ۇيىمى» قوعامدىق بىرلەستىگىنىڭ توراعاسى بەكەن ءالىمجانوۆ ىنتىماقتاستىق تۋرالى مەموراندۋم وسكەلەڭ ۇرپاقتى وتانسۇيگىشتىك رۋحتا تاربيەلەۋگە جاڭا سەرپىن بەرەتىنىنە سەنىم ءبىلدىردى.
