جانارى ءموپ-ءمولدىر, كوڭىلى اق قارداي, كەلبەتى كەلىستى قازاق قىزىنا قايران قالماۋعا استە بولماس. كەشەگى ۇلجان مەن زەرە انالاردىڭ, ەرلىكتەرىمەن ەلگە ءماشھۇر ءاليا مەن مانشۇكتىڭ, ءلاززات پەن ءسابيرانىڭ سىنىقتارى بۇگىن دە بار. اقىلىنا كوركى ساي بۇل ارۋلاردى بۇكىل جەرشارى بىلەدى. ال, ءسىز ادەبى مەن اسەمدىگى ۇيلەسىپ, الەمدى مويىنداتقان قازاق قىزدارى جايىندا نە بىلەسىز؟
يندونەزيانىڭ بالي ارالىندا وتكەن «الەم ارۋى-2013» بايقاۋىنىڭ جەڭىمپازى فيليپپيندىق مەگان يانگتىڭ ورنىندا «شىركىن-اي, قازاق قىزى بولعاندا عوي» دەيتىندەر بار شىعار؟.. ەندەشە, سولاي ويلايتىندارعا تاماشا جاڭالىقتارىمىز بار.
جاقىندا قازاق قىزى قىتاي ەلىندە تۇراتىن ءتۇرلى ۇلت وكىلدەرىنىڭ ىشىندەگى ەڭ سۇلۋى اتاندى. «56 ۇلتتىڭ گۇلى» اتانعان كۇنبيكە نۇرقىزى انا تىلىمەن قاتار, قىتاي, اعىلشىن تىلدەرىن ەركىن مەڭگەرگەن. قىتايلىقتاردى تاڭداي قاقتىرعان ەلىكتەي ەركە سۇلۋىمىز دومبىرامەن اۋەلەتە ءان سالىپ, مىڭ بۇرالا بيلەگەندە قوشەمەت بىلدىرمەگەن جان بولماعان. جات جۇرتتا جارقىراپ, ءوز ەلىنىڭ ۇلتتىق ناقىشتارىن ۇلىقتاعان سۇلۋ قىز قازاق ونەرى مەن مادەنيەتىن بيىك دەڭگەيدە كورسەتە ءبىلدى. وسىعان دەيىن «شىڭجان ۇيعىر اۆتونوميالىق ولكەسىنىڭ ارۋى» بايقاۋىندا باق سىناپ, باس جۇلدەگە يە بولدى. نازىكتىگىمەن بار جاناردى جاۋلاعان كۇنبيكە تاەكۆوندودان سپورت شەبەرى. كەلەشەكتە تانىمال تەلەجۇرگىزۋشى بولۋدى ارماندايدى.
نەبارى 19 جاسار ەلميرا ابدىرازاقوۆا «رەسەي ارۋى-2013» بايقاۋىندا باسىنا ءتاج كيىپ, سول ەلدىڭ ەڭ ادەمى ارۋى اتاندى. ول 1994 جىلى قىزىلجاردا دۇنيەگە كەلگەن. ءۇش جاسىندا اناسىمەن رەسەيگە كوشكەن وتانداسىمىز بۇگىندە كەمەروۆ وبلىسىنىڭ مەجدۋرەچەنسك قالاسىنىڭ تۇرعىنى. قازاقتىڭ كەربەز قىزى رەسەي نامىسىن «الەم ارۋى-2013» بايقاۋىندا دا جوعارى دەڭگەيدە قورعاپ شىقتى. ول سونىمەن قاتار, «ميسس سپورت» سايىسىندا دا لايىقتى ونەر كورسەتتى. الەمدىك ارەنادا سولتۇستىكتەگى كورشىمىزدىڭ شاشباۋىن كوتەرىپ جۇرگەن ەلميرانىڭ بويىنان ناعىز قازاق قىزىنا ءتان ىزگىلىكتى كورەمىز.
اجارىمەن ايداي الەمدى مويىنداتقان ارۋلارىمىزدىڭ لەگى مۇنىمەن تولاستامايدى. سايدا ءادىلوۆا ەسىمدى قاراكوزىمىز «Miss Asia Moscow-2013» جەڭىمپازى. حالىقارالىق بۇل بايقاۋعا رەسەي فەدەراتسياسىنان – التاي, بۋراتيا, قالمىقيا, تىۆا, حاكاسيا, ياكۋتيا, تمد ەلدەرىنەن – قازاقستان, قىرعىز تۇركىمەنستان, ۆەتنام, وڭتۇستىك كورەيا مەن موڭعوليانىڭ سۇلۋلارى سىنعا تۇسكەن. وسىنشا ۇلتتىڭ اراسىنان سۋىرىلىپ شىققان سايدانىڭ بويىنان سايىن دالانىڭ لەبى ەسەدى. بالا كەزىنەن ديزاينەر-مودەلەر بولۋدى ارمانداعان بويجەتكەننىڭ بۇگىندە الماتى قالاسىندا ءوز مەكتەبى مەن تىگىن اتەلەسى بار.
ازيانىڭ ەڭ كورىكتى قىزدارى قاتارىندا «ميسس دارا تۇلعا» اتالىمىمەن تانىلعان ءاليا شاباروۆا مەن اسەل اسقاروۆا بار. ماسكەۋدە ءبىلىم الىپ جۇرگەن قوس قۇربى ءوز ورتالارىندا قازاق ەلىنىڭ عۇرىپتارىن دارىپتەيدى. بەينەلەۋ ونەرى مەن بي الەمىندە وزىندىك ورنەكتەرىن قالىپتاستىرعان اسەلدىڭ باستى ارمانى – «استانا وپەرا» بالەت تەاترىنىڭ ساحناسىندا سامعاۋ. البەتتە, ولاردىڭ اسقاق ارماندارى جۇزەگە اسادى. تەك ەندىگى تاڭدا وزگەنىڭ ەمەس, ەگەمەن ەلىمىزدىڭ ەرتەڭى ءۇشىن ەڭبەك ەتسە بولعانى.
قازاق قىزدارى تەك سۇلۋلىق بايقاۋىندا عانا ەمەس, سپورت, ونەر سىندى باسقا سالالاردا دا سىننان سۇرىنبەي, ەل ابىرويىن ەسەلەپ كەلەدى. كەشە عانا شىمىلدىعىن تۇسىرگەن سوچي وليمپياداسىندا فريستايل-اكروباتيكادان فينالدىق كەزەڭگە ءوتىپ, الەم ۇزدىكتەرى اراسىندا التىنشى ورىن يەلەنگەن, ەل سپورتشىلارى اراسىنان اتتانعان ەڭ جاس سپورتشى جانبوتا الدابەرگەنوۆانى ايتا كەتپەۋ مۇمكىن ەمەس. وسىدان ەكى جارىم جىل بۇرىن مارقۇم اكەسى جانبوتانى گيمناستيكا مەكتەبىنە جازدىرىپ: «قىزىم, سەن سوچي وليمپياداسى ويىندارىنا قاتىساسىڭ ءالى. سول كەزدە مەن چەمپيوننىڭ اكەسىمىن دەپ ماقتانىپ وتىرامىن» دەگەن ەكەن. اكەسى كورە الماي كەتكەن جەتىستىككە, قازاق ەلى عانا ەمەس, بۇكىل الەم كۋا بولدى.
P.S: جەر جاھاندى جاعىمدى جاڭالىقتارىمەن قۋانتاتىن ارۋلاردىڭ ابىرويى ارتا بەرسىن دەپ تىلەيمىز. ادەمى تىلەكتىڭ لەگىن كۇنى كەشە عانا بولگاريادا وتكەن «كريستالنىە گولوسا» بايقاۋىندا سوپرانو داۋىستا
تاماشا ونەر كورسەتىپ, گران-پري العان ەلوردالىق گۇلنيزا باتالوۆا مەن گرەتسيانىڭ افينا قالاسىندا وتكەن «Bellydance oriental fashion festival» حالىقارالىق بي فەستيۆالىندە ەكىنشى ورىن يەلەنگەن ينديرا قاسىموۆانىڭ جەڭىستەرىمەن تۇيىندەيمىز.
نۇرگۇل احانقىزى
