مەرەيلى ماۋسىم «اباي» تراگەدياسىمەن جابىلادى
بۇگىن ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ححV مەرەيتويلىق ماۋسىمىن م.اۋەزوۆتىڭ «اباي» تراگەدياسىمەن جابادى. تەاتر ۇجىمى ءۇشىن بۇل ماۋسىم تولايىم تابىستارعا تولى بولدى.
ەلوردانىڭ سۇيىكتى تەاترى وسى ۋاقىت ارالىعىندا بىرنەشە پرەمەرالارىن حالىق نازارىنا ۇسىندى. ولاردىڭ قاتارىندا م.اۋەزوۆ پەن ق.ىسقاقتىڭ «قاراش-قاراش» دراماسى, ت.تەمەنوۆتىڭ «اققۋدىڭ كوز جاسى…» ليريكالىق دراماسى, و.جانايداروۆتىڭ «جۇت» دراماسى, ا.چەحوۆتىڭ «شيە» كومەدياسى, ر.مۇقانوۆانىڭ «ساررا» دراماسى, ا.ايلاروۆتىڭ «سۇرىنگەن سۇربويداق» كومەدياسى جانە ج.ەرعاليەۆتىڭ «ەسىگىمدى قاققان كىم؟…» دراماسى بار. تانىمال رەجيسسەرلەر قويعان پرەمەرالاردىڭ بارلىعىن حالىق جىلى قابىلداپ, كەلۋشىلەر قاتارى كوبەيمەسە ازايعان جوق.
سونىمەن قاتار, تەاتر ۇجىمى بىرنەشە فەستيۆالدەرگە قاتىسىپ, ءتۇرلى ماراپاتقا يە بولدى. اتاپ ايتقاندا, وسكەمەن قالاسىندا وتكەن XXIII رەسپۋبليكالىق تەاترلار فەستيۆالىنە «تىراۋلاپ ۇشقان تىرنالار» اتتى ليريكالىق درامامەن قاتىستى. قازاقستاننىڭ حالىق ءارتىسى تالعات تەمەنوۆتىڭ بۇل قويىلىمى «ۇزدىك رەجيسسەرلىك شەشىم» نوميناتسيا-سىنا يە بولدى. ال اتىراۋ قالاسىندا وتكەن دراماتۋرگ راحىمجان وتارباەۆتىڭ حالىقارالىق تەاتر فەستيۆالىندە «كولەڭكەسىز جولاۋشى» دراماسىنىڭ باعى جاندى. قازاقستاننىڭ ەڭبەك سىڭىرگەن قايراتكەرى نۇرلان جۇمانيازوۆ «ۇزدىك رەجيسسەر» نوميناتسياسىن يەلەنسە, اكتريسا اينۇر بەرمۇحامبەتوۆاعا «ۇزدىك اكتريسا» اتاعى تاپسىرىلدى.
گۇلميرا شارحانقىزى