مەرەيتويدا مازمۇندى اڭگىمەلەر ايتىلدى
كەشە ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە جۋرناليستيكا جانە ساياساتتانۋ فاكۋلتەتىنىڭ دەكانى, الاشتانۋشى قايرات ساقتىڭ ەلۋ جاسقا تولعان مەرەيتويىنا وراي سالتاناتتى شارا ءوتتى. «قازاقستان-2050 ستراتەگياسى» اياسىندا جۋرناليستىك ءبىلىم بەرۋدىڭ بۇگىنى مەن بولاشاعى» دەپ اتالاتىن عىلىمي-تاجىريبەلىك كونفەرەنتسيا قوناقتاردىڭ توي يەسىنە تىلەك-لەبىزدەرىن ارناۋىمەن باستالدى.
جيىندى اشىپ ءسوز سويلەگەن وقۋ ورنىنىڭ پرورەكتورى, پروفەسسور ديحان قامزابەكۇلى ق.ساقتىڭ ەڭبەك جولىنداعى جەتىستىكتەرى مەن قىزمەتىندەگى قارىمدىلىعىن ءسوز ەتتى. «قايرات ءومىربايۇلىنىڭ ءوزى اشىلۋىنا اتسالىسىپ, دەكانى بولىپ وتىرعان جۋرناليستيكا جانە ساياساتتانۋ فاكۋلتەتى كوپتەگەن ستۋدەنتتەردى تۇلەتىپ, قانات قاقتىردى. ءالى دە ەل يگىلىگىنە قىزمەت ەتەتىن تالاي ماماندى ازىرلەيتىنىنە سەنىمىمىز مول. ءبىز بۇل جيىندى وسى فاكۋلتەتتىڭ زيالى قاۋىم الدىنداعى ەسەبى دەپ قابىلداۋىمىز قاجەت» دەدى ول.
باسقوسۋدا قوعام قايراتكەرى, تەلەدراماتۋرگ سۇلتان ورازالى مەرەيتوي يەسى تۋرالى «ەگەمەن قازاقستان» گازەتىنە بەكەر جازباعانىن ايتتى. «ءبىر كەزدەرى «قازاق» دەگەن قالىڭ كىتاپ شىقتى. بۇل جيناقتى جاپا-تارماعاي ىزدەپ, وقىعانىمىز بار. ويتكەنى, ءبىزدىڭ كەزىمىزدە «قازاق» گازەتىنىڭ وزىنە قولىمىز جەتە قويعان جوق. ال, سول شاقتا جاپ-جاس قايراتتىڭ سونداي قات ءدۇنيەنى ءوز ۇلتىنا قايتا ورالتۋعا اتسالىسۋى, توتە جازۋدان كيريلليتساعا كوشىرۋى ۇلكەن ەڭبەك ەدى. كىتاپتى قۇراستىرعان ادامدى ايتپاعاندا, ونى وقىعان جاننىڭ ءوزى ۇلت, حالىق, جۇرت ۇعىمدارىن تەرەڭ ۇعىنادى» دەگەن قالامگەر اق تىلەگىن دە ارنادى.
كونفەرەنتسيا بارىسىندا قازاقستان جۋرناليستيكا اكادەمياسىنىڭ پرەزيدەنتى, پروفەسسور ساعىمباي قوزىباەۆ, مەملەكەتتىك تاريح ينستيتۋتىنىڭ ديرەكتورى بۇركىت اياعان, وقۋ ورنىنداعى فيلوسوفيا كافەدراسىنىڭ مەڭگەرۋشىسى, اكادەميك عاريفوللا ەسىم, «قازاق گازەتتەرى» جشس-ءنىڭ استانا قالاسىنداعى وكىلى, بالالار جازۋشىسى تولىمبەك ءابدىرايىم, باس رەداكتورلار كلۋبىنىڭ ۆيتسە-پرەزيدەنتى, جۋرناليست مۇراتبەك توقتاعازين, ج.بالاساعۇن اتىنداعى قىرعىز ۇلتتىق ۋنيۆەرسيتەتى جۋرناليستيكا فاكۋلتەتىنىڭ دەكانى ابدىعالي ناعمانبەكۇلى ءسوز سويلەپ, جىلى لەبىزدەرىن ءبىلدىردى. قوناقتار مەرەيتوي يەسىنە سىي-سياپاتتارىن تاپسىرىپ, سالتاناتتى جاعدايدا ماراپاتتارىن ۇسىندى.
القالى جيىندا قازاق جۋرناليستيكاسىنىڭ بۇگىنگى تىنىس-تىرشىلىگى مەن دامۋ جولدارى جانە تۇيتكىلدى ماسەلەلەرى دە ءسوز بولدى. سونىمەن قاتار «الاش مۇراسى», «الاش كوسەمسوزى: جەر ماسەلەسى» كىتاپتارىنىڭ تانىستىرىلىمى ءوتتى.
اسحات رايقۇل