قر مەملەكەتتىك حاتشىسى گۇلشارا ابدىحالىقوۆا ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ۇلى جەڭىستىڭ 70 جىلدىعىنا تارتۋى – «تىراۋلاپ ۇشقان تىرنالار» اتتى ليريكالىق دراماسىن تاماشالادى. تەاتردىڭ كوركەمدىك جەتەكشىسى تالعات تەمەنوۆ ساحنالاعان تۋىندى قازاق سولداتى مەن نەمىس قىزىنىڭ اراسىنداعى مايدانداعى ماحاببات حيكاياسىنان سىر شەرتەدى.
– بۇل قويىلىم, ەڭ بىرىنشىدەن, اعالارىمىز بەن اپالارىمىزدىڭ مايداندا كورسەتكەن ۇلكەن ەرلىگى تۋرالى باياندايدى. ودان كەيىن ماحابباتقا, وتانعا دەگەن سۇيىسپەنشىلىككە, ەرلىك پەن وجەتتىلىككە ۇندەيدى. قازاقستان جەرىنەن 1 ميلليون 800 مىڭنان استام ازامات سوعىسقا اتتاندى. ولاردىڭ جارتىسى جەر جاستاندى. قازىر ەلىمىزدە 4700-دەن استام ارداگەر بار. ولارعا بارلىق قۇرمەت كورسەتىلىپ جاتىر. جىل بويىنا دا كورسەتىلە بەرەدى. ال, مىنا قويىلىم بارلىعىمىزدىڭ بويىمىزدا پاتريوتتىق سەزىمدى وياتادى دەپ ويلايمىن» دەدى گۇلشارا ابدىحالىقوۆا.
مەملەكەتتىك حاتشىمەن بىرگە قويىلىمدى تاماشالاۋعا پارلامەنت دەپۋتاتتارى, بەلگىلى مادەنيەت جانە ونەر قايراتكەرلەرى, زيالى قاۋىم وكىلدەرى كەلدى. سولاردىڭ اراسىندا بولعان «قازاقستان رەسپۋبليكاسى ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسىنىڭ توراعاسى ومىرزاق وزعانباەۆ ۇلى جەڭىستىڭ 70 جىلدىعى قارساڭىندا سوعىس جىلدارىندا حالقىمىزدىڭ ەرلىگىن كورسەتەتىن, ادامداردىڭ پسيحولوگياسىن, تابيعاتىن اشا تۇسەتىن شارالار تۋرالى حابار بەردى. ونىڭ ايتۋىنشا, جاقىن كۇندەرى بۇكىل رەسپۋبليكانى قامتىعان «قايران ەرلەر – قاھارمان ارداگەرلەر» فەستيۆالىنىڭ قورىتىندىسى شىعارىلماق. ناقتى ايتساق, 22 ءساۋىر كۇنى وتەتىن گالا-كونتسەرتتە فەستيۆال جەڭىمپازدارىن ماراپاتتاۋ ءراسىمى وتەدى.
امانعالي قالجانوۆ
