قازاقستان حالقىنىڭ بىرلىگى كۇنى اياسىندا استانا قالاسىنىڭ اكىمدىگىندە ەلوردالىق ەتنومادەني بىرلەستىكتەردىڭ جەتەكشىلەرى مەن ءماسليحات دەپۋتاتتارى جانە بىرقاتار باسقارما باسشىلارىنا «قازاقستان حالقى اسسامبلەياسىنا – 20 جىل» مەرەيتويلىق مەدالى تابىس ەتىلدى.
جيىندا العاش ءسوز العان استانا قالاسى اكىمىنىڭ ورىنباسارى ەرمەك امانشاەۆ ايتۋلى مەرەكەمەن جينالعانداردى قۇتتىقتاپ, ەل بىرلىگى ءۇشىن ايانباي قىزمەت ىستەپ كەلە جاتقان ەڭبەكتەرى ءۇشىن ءوز العىسىن ءبىلدىردى.
– جاقىندا عانا ەلىمىزدە ايرىقشا وقيعا بولدى. پرەزيدەنتتىك سايلاۋ ءوتتى. وعان وسى مەملەكەتتە تۇراتىن بارلىق ۇلتتىڭ وكىلدەرى ءبىر كىسىدەي قاتىسىپ, ەلباسىنا سەنىم ءبىلدىردى. بۇل – ەلىمىزدە بەرىك قالىپتاسقان تاتۋلىق پەن دوستىقتىڭ جارقىن كورىنىسى دەپ ەسەپتەيمىن. قازاقستان حالقى اسسامبلەياسى – الەمدىك فەنومەنگە اينالعان, قۋاتتى, گۋمانيتارلىق ينستيتۋت. ونىڭ جيىرما جىلدا اتقارعان قىزمەتى ەرەن. سوندىقتان وسىنداي ۇلكەن مەرەكەمەن بارلىقتارىڭىزدى قۇتتىقتاپ, جۇمىستارىڭىزعا تابىس تىلەيمىن, – دەدى قالا اكىمىنىڭ ورىنباسارى.
ايتۋلى ماراپاتقا يە بولعاندار قاتارىندا مايدانگەر-جۋرناليست, «الەف» ەۆرەي مادەني-اعارتۋ, قوعامدىق-ساياسي قوعامىنىڭ توراعاسى مويسەي گولدبەرگ, «حازار» ازەربايجان ەتنومادەني بىرلەستىگىنىڭ ءتورايىمى ۆيدادي اگاەۆ, «زلاتا» بولگار ەتنومادەني بىرلەستىگىنىڭ توراعاسى ولگا اندريەۆسكايا, «احىسكا» تۇرىك ەتنومادەني بىرلەستىگىنىڭ توراعاسى اسكەر پيريەۆ, «ۆايناح» شەشەن-ينگۋش ەتنومادەني ءبىرلەستىگىنىڭ توراعاسى سالمان گەروەۆ, وزبەك ەتنومادەني بىرلەستىگىنىڭ توراعاسى شەرزود پۋلاتوۆ, «وبەرەگ» ۋكراين قاۋىمداستىعىنىڭ توراعاسى تامارا شيرمەر, قىرعىز مادەني ورتالىعىنىڭ توراعاسى شاۆكات يسمايلوۆ (سۋرەتتە) جانە تاعى باسقالار بولدى.
سونداي-اق, وسى باعىتتا حالىقپەن تىعىز بايلانىستا, ەلەۋلى ەڭبەك ەتىپ كەلە جاتقان, استانا قالاسى اكىمىنىڭ اپپاراتى قازاقستان حالقى اسسامبلەياسى حاتشىلىعىنىڭ مەڭگەرۋشىسى ءلاززات قۇسايىنوۆا, ءبىلىم باسقارماسىنىڭ باسشىسى ەلميرا سۋحانبەرديەۆا, جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ءلاززات ابۋەۆا, تىلدەردى دامىتۋ باسقارماسىنىڭ باسشىسى ەربول تىلەشوۆ سەكىلدى بىرقاتار لاۋازىم يەلەرى دە مەرەيتويلىق مەدالمەن ماراپاتتالدى.
ازامات ەسەنجول
