اۆتوكرەديت بەز پەرۆوناچالنوگو ۆزنوسا نا پودەرجاننىي اۆتوموبيل
كۇنى كەشە ەلباسى اقپارات جانە كوممۋنيكاتسيالار ءمينيسترى داۋرەن اباەۆتى قابىلداپ, «پارلامەنت پەن ۇكىمەتتىڭ قىزمەتى تەك مەملەكەتتىك تىلدە جۇرگىزىلۋى ءتيىس» دەپ حالقىنا, بيلىك بۋىندارىنا دۇعاي سالەم جولداۋى جالپى كوپشىلىكتىڭ الەۋمەتتىك جەلىلەردە ءبىر-بىرىنەن ءسۇيىنشى سۇراۋىنا ۇلاسىپ كەتتى. الايدا ەڭ نەگىزگى مەملەكەتتىك ورگاندار پارلامەنت پەن ۇكىمەت ءبىر-اق كۇندە قازاقشا جازىپ, سويلەپ كەتۋى قيىنداۋ. بۇل ماسەلە تولىق شەشىمىن تابۋى ءۇشىن ويلاستىرىلعان قادامدار جاسالۋى, ناقتى شەشىمدەر قابىلدانۋى ءتيىس. وسى ورايدا كوپكە ىلەسىپ كەتە بەرمەيتىن, وزىندىك كوزقاراس, ۇستانىمى بار دينا ەلگەزەك قارىنداسىمىزدىڭ كۇمانى دە ورىندى سياقتى. «ءسوز – ءجىپ, سوزساڭ كەتە بەرەدى… 27 جىل بويى سوزىلعان ءجىپ-ءسوزدى سوزا بەرمەي, ۇرشىقشا يىرەتىن ۋاقىت بولعان سياقتى ما؟» دەپ ءالى دە سۇراۋ بەلگىسىن قويادى قارىنداسىمىز فەيسبۋكتەگى جازباسىندا.
تاۋەلسىزدىكتىڭ ەلەڭ-الاڭىندا ءبىز شىمكەنت شاھارىندا ەڭبەك ەتىپ جاتتىق. تاڭەرتەڭ بالامىزدى باقشاعا ارقالاپ اپاراتىنبىز. سوندا قازاق توبىنا قوسىلعان ورىس, كارىس بۇلدىرشىندەردىڭ كۇن سايىن كوبەيىپ جاتقانىن كورىپ كوڭىلىمىز ءوسۋشى ەدى. بۇل ءوزى وڭتۇستىكتەن تۇلەپ ۇشقان سەرگەي تەرەششەنكونىڭ مەملەكەتتىك ءتىلدى تولىق ەنگىزۋدى 4-5 جىلدا-اق بىتىرەمىن دەپ ارنايى قاۋلى قابىلداپ, قازاق ۇكىمەتىن باسقارىپ تۇرعان جىلدارى بولاتىن. كوپ ۇزاماي ورىندالۋ مەرزىمى تىم تىعىز ەكەن دەگەن سەبەپپەن الگى قاۋلىنىڭ كۇشى جويىلدى. وكىنىشكە قاراي, قازاق توبىنداعى وزگە بۇلدىرشىندەردىڭ دە سانى كەمي بەردى…
ءجۇز پايىز قازاقتاردان تۇراتىن ءبىزدىڭ ۇكىمەت قازاقشا سويلەپ كەتسە, ونىڭ نەسىنە تاڭعالاسىز؟ وسى ۋاقىتقا دەيىن بۇعان مويىندارى جار بەرمەي جاتسا, وعان ءمينيستردىڭ ۇلتى ەمەس, ءدىلى, ءتىلى, ازاماتتىق پوزيتسياسى كىنالى ەمەس پە؟ ءبىزدىڭ قانداسىمىز رەسەيدە گۋبەرناتور, چەحيادا, موڭعوليادا مينيستر بولدى دەپ ماقتانامىز. ولار قازاق بولعانى ءۇشىن ەمەس, سول ەلدىڭ مەملەكەتتىك ءتىلىن جەتىك مەڭگەرىپ, سول ەلدىڭ مۇددەسىنە ادال قىزمەت ەتكەنى ءۇشىن ەلەندى, باعالاندى. تاۋەلسىزدىك العان شيرەك عاسىردان استام ۋاقىت ىشىندە قازاقشا سويلەپ, قازاقشا ويلايتىن وزگە ۇلت وكىلدەرىنىڭ بيىك لاۋازىمعا جەتپەۋى ءبىزدى ويلاندىرۋى كەرەك. تەرەششەنكو تۇسىندا بالاباقشاعا بارىپ, قازاق توبىن تاستاماعان بۇلدىرشىندەر قازىر قايدا ءجۇر؟ سولار مينيستر بولىپ نەگە ەلگە قىزمەت ەتپەيدى؟ ەسەنقۇل اقىن ايتپاقشى, «قازاق وسەم دەگەن ۇلدى باعادى», ال وزگەلەر قازاققا, ەلگە قىزمەت ەتەتىن پەرزەنت تاربيەلەسە, نەگە قولداماسقا؟..
وسىدان ءبىراز ۋاقىت بۇرىن روزاقۇل قالمۇرادوۆ دەگەن وزبەك اعامىز پارلامەنتتە قىزبالانىپ سويلەپ وتىرۋشى ەدى, تەك قازاقشا سويلەيتىن, تەك قازاقتىڭ, ەلدىڭ جايىن, مۇڭىن ايتاتىن, مەملەكەتتىك ءتىلدى تورگە شىعارايىق دەپ شىر-پىر بولاتىن, ۇكىمەتكە وتكىر ساۋالدار تاستايتىن. ول كىسى قازىر جوق تىزىمدە, شىمكەنتىنە قايتقان, ەسەسىنە اسسامبلەيادان ون شاقتى دەپۋتات وتىر ءماجىلىس تورىندە. بىراق قالمۇرادوۆتىڭ ورنى ۇڭىرەيىپ بوس تۇر…
ەركىن قىدىر
