سوڭعى كەزدە استانا قالاسىنداعى قوعامدىق كولىكتەردىڭ ساپاسى ارتىپ كەلەدى. اسىرەسە, مۇمكىندىگى شەكتەۋلى ازاماتتاردىڭ اۆتوبۋسقا ەمىن-ەركىن ءمىنىپ-تۇسۋىنە مۇمكىندىك قاراستىرىلىپ, ستاندارتقا سايكەس اۆتوبۋس قاتارىن كوبەيتۋگە ايرىقشا كوڭىل بولىنۋدە. بۇل جونىندە استانا قالاسى جولاۋشىلار تاسىمالى جانە اۆتوموبيل جولدارى باسقارماسى باسشىسىنىڭ ورىنباسارى ءابدىحاميت تاماباەۆ از-كەم اڭگىمەلەدى.
– ءابدىحاميت كەرىمبايۇلى, قوعامدىق كولىكتىڭ قانشاسىندا مۇمكىندىگى شەكتەۋلى جاندار ءۇشىن قولايلى جاعداي تۋعىزىلىپ وتىر؟
– قازىرگى كەزدە بارلىق قالالىق باعدارلاردا «ۆولۆو», «حايگەر», «حۋانحاي», «سكانيا» ماركالى مۇگەدەكتەرگە قولايلى 251 اۆتوبۋس قىزمەت كورسەتەدى. بۇل كولىكتەردە ورنالاستىرىلعان تۇتقالار جانە اۆتوبۋس ەدەنىنىڭ الاسالىعى مۇگەدەكتەردىڭ كەدەرگىسىز شىعىپ-تۇسۋىنە ءمۇمكىندىك بەرەدى. اۆتوبۋس سالونىنىڭ الدىڭعى جاعىندا ارناۋلى ورىندار قاراستىرىلعان. ولاردىڭ تۇسىندا اقپاراتتىق تابلولار ورناتىلعان. ال, ەڭ باستى ەرەكشەلىگى, بۇل كولىكتەر ارباعا تانىلعانداردى مىنگىزىپ-ءتۇسىرۋ ءۇشىن ارناۋلى تراپپەن جابدىقتالعان.
– مۇگەدەكتەرگە مۇلتىكسىز قىزمەت كورسەتۋ ساپاسىن جاقسارتۋ ماقساتىندا جۇرگىزۋشىلەر مەن كوندۋكتورلاردى وقىتىپ جاتىرسىزدار ما؟
– ءيا, ءبىز اۆتوبۋس جۇرگىزۋشىلەرى مەن كوندۋكتورلاردى ارنايى وقۋ كۋرسىنان وتكىزەمىز. سونىڭ ىشىندە اربامەن جۇرەتىن جولاۋشىلارعا قولايلى جاعداي جاساپ, ولاردىڭ اۆتوبۋسقا كىرىپ-شىعۋىنا كومەكتەسۋ كەرەكتىگى دە ەسكەرىلەدى. ياعني, نۇسقاۋ بويىنشا كوندۋكتورلار قاراپ تۇرماي مۇگەدەك جانداردىڭ ايالداماعا كەلىپ توقتاعان اۆتوبۋسقا وتىرۋىنا جاردەمدەسۋى, كولىك ىشىندەگى ارنايى ورىنعا جەتكىزۋى ءتيىس. جولاۋشى دىتتەگەن جەرىنە جەتكەن سوڭ, اۆتوبۋستان تۇسكەن كەزدە دە دەمەپ جىبەرگەن ءجون. بۇرىن اۆتوبۋس جۇرگىزۋشىلەرى قوعامدىق كولىكپەن اربادا وتىراتىن, قۇلاعى ناشار ەستىپ, كوزى ناشار كورەتىن ادامداردىڭ دا جولاۋشىلاپ جۇرەتىنىنە اسا ءمان بەرمەيتىن ءارى ەشكىم ونى قاتتى تالاپ ەتپەيتىن. قازىرگى تاڭدا ولارمەن جۇمىس جاقسى جولعا قويىلعان. اۆتوبۋس جۇرگىزۋشىلەر كەز كەلگەن ايالداماعا جاقىن توقتايدى. كوندۋكتور ولاردىڭ ىڭعايلىلىعى ءۇشىن ورىن دايىندايدى, جۇرگىزۋشى شىعىپ تراپتى اشادى. قىسقاسى, ەلباسىنىڭ تاپسىرماسى بويىنشا مۇگەدەكتەردىڭ قۇقىقتارىن قورعاۋ ماقساتىندا ءبىزدىڭ قالادا مۇمكىندىگى شەكتەۋلى جانداردىڭ قوعامدىق كولىكتەردى پايدالانۋى ءۇشىن بارىنشا مۇمكىندىكتەر قاراستىرىلۋدا.
گۇلبارشىن وكەشقىزى
