مۇعجيزا
اقىلدىڭ دالەلىن قاجەت ەتپەيدى
پايعامبارىمىزدىڭ (س.ع.س.) مۇعجيزالارىنىڭ ەڭ ۇلكەنى – بۇل, البەتتە, قاسيەتتى قۇران كارىم.
ءار ءداۋىردىڭ عالىمدارى, ادەبيەت, شىعارماشىلىق سالاسىنداعى شەبەرلەردىڭ بارشاسى اللاھتىڭ كالامىنە, ونداعى سۇرە, اياتتاردىڭ جۇيەلىلىگىنە, عىلىممەن ەگىز اققان, ادامزاتقا تۇسكەن حاقتىڭ زاڭى ەكەندىگىنە يمان كەلتىرىپ, بارلىعى دا بۇل ەشبىر جاراتىلىستىڭ ەمەس, جاراتۋشىنىڭ ءسوزى دەپ مويىنسۇنىپ كەلگەن.
بىز ءومىر ءسۇرىپ وتىرعان عاسىر عالىمدارىنىڭ دا ءوز كەزەگىندە عىلىم جولىنداعى تىرەلگەن تۇسى وسى قاسيەتتى قۇران, اللاھتىڭ ءسوزى بولدى. بۇل, البەتتە, وسىلاي بولادى جانە بولاشاقتا دا, قيامەتكە دەيىن دە جالعاسا بەرەدى. سەبەبى, قاسيەتتى قۇراندا ايتىلعانداي, «اللاھتىڭ قاسىندا شىنايى ءدىن – يسلام» («ءالي عيمران» سۇرەسى, 19-ايات), ونىڭ وسى سوزدەرىن جەتكىزگەن سوڭعى پايعامبار ءارى ەلشى – اللاھتىڭ ءوزى تاڭداعان قۇلى مۇحاممەد (س.ع.س.) اقيقاتتىڭ سوڭعى بەلگىسى بولىپ قالا بەرەدى.
قۇران كارىمنىڭ بىردە-ءبىر اياتىنا ۇقسايتىن نارسەنى بۇل كۇنگە دەيىن ەشبىر عالىم دا, عۇلاما دا جازا الماعان. سۇرەلەردەگى شەشەندىك ەرەكشەلىك, جازىلۋ ءتاسىلى ەشبىر جاراتىلىس سوزىنە ۇقسامايدى. ونىڭ ءبىر ءسوزى الىنىپ تاستالسا نەمەسە بوتەن ءبىر ءسوز قوسىلسا, ماعىناسىنداعى ۇيلەسىمدىك بۇزىلادى. قۇران اياتتارىنىڭ رەتى دە, ءتارتىبى دە اراب اقىن-جىرشىلارىنىڭ فورماتىنا مۇلدە كەلمەيدى. وتكەن جانە كەلەشەكتە بولاتىن كوپتەگەن نارسەلەر تۋرالى حابار بەرەتىن قۇراندى وقىعاندار مەن تىڭداعاندار جالىقپايدى, شارشامايدى. اقيقاتىندا, قۇران اياتتارى – ءار جاننىڭ دەرتىنە شيپا. بۇل جايىندا اللاھ تاعالا قاسيەتتى قۇراندا: «ءاي ادامدار! سەندەرگە راببىلارىڭ تاراپىنان ءبىر ۇگىت, جۇرەكتەگىلەرگە ءبىر شيپا, سەنۋشىلەر ءۇشىن تۋرا جول جانە راحمەت تۇرىندە قۇران ءتۇستى» («ءجۇنىس» سۇرەسى, 57-ايات) دەپ مومىن مۇسىلماندارعا اشىق بايانداعان.
قاسيەتتى قۇراندى تىڭداعان جانە وعان بويۇسىنعان جاننىڭ ىقىلاسى ارتىپ, ىزگى امالدارى كوبەيەدى. بىزگە يسلام تاريحىنان ءمالىم, يسلام ءدىنىنىڭ دۇشپانى بولعان ادامدار قۇران كارىمدى تىڭداعان كەزدە جۇرەكتەرى جۇمسارىپ, يمان كەلتىرگەن.
ال, پايعامبارلار تاراپىنان بولاتىن مۇعزيجالار – كاپىرلەردى جونگە سالۋ, ءمۇمىن جانداردىڭ ىقىلاسىن ارتتىرۋ ءۇشىن بولعان اللاھ تاعالانىڭ تاڭعاجايىپ قۇبىلىستارى. بۇل ەرەكشە قۇبىلىس تەك اللانىڭ ءوزى تاڭداعان پايعامبارلارىنا عانا ءتان. مۇنداي قاسيەتكە ەشقانداي عالىم يە بولا المايدى. ءارى بۇل مۇعزيجالاردى جاراتىلىس شەڭبەرىندەگى فيزيكا, حيميا, بيولوگيا سىندى عىلىم دالەلدەرىمەن مانىنە جەتىپ, ءتۇيىنىن تابا المايمىز. سەبەبى, بۇل دۇنيەنىڭ عىلىمىنا, جاراتىلىس ۇعىمىنا سىيمايتىن جاراتۋشىنىڭ تاراپىنان ەلشىلەرىنە بەرىلگەن قۇبىلىس. ياعني, جاراتىلىس زاڭدىلىقتارى ەمەس, ءيلاھي زاڭدىلىقتارعا عانا ءتان.
ەلدى اۋزىنا قاراتقان تاڭعاجايىپ مۇعجيزالار قاتارىندا ارداقتى پايعامبارىمىز (س.ع.س.) ارقىلى ءبىر ۋىس تاماقتىڭ بەرەكەتى اسىپ, مىڭ ادامعا ازىق بولعانى, شولدە قالعان كەزدە ساۋساقتارىنىڭ اراسىنان اتقىلاپ اققان سۋدان ءۇش جۇزدەي ساحابانىڭ سۋسىنداعانى ءارى دارەت العانى جايلى دەرەكتەردى كەلتىرۋگە بولادى.
ال پايعامبارىمىز مۇحاممەدتىڭ (س.ع.س.) مۇشرىكتەردىڭ توبەسىندەگى ايدى ەكىگە جارعانى – ادامزات بالاسىن قايران قالدىرعان ۋاقيعا ەدى.
بۇل ۋاقيعا بىلاي باستالادى:
ءبىر كۇنى ءابۋ ءجاھيل مەن ءۋاليد يبن مۇعيرا باستاعان ءبىر توپ مۇشرىك پايعامبارىمىزعا كەلىپ: «ەگەر سەن, شىن پايعامبار بولساڭ, بىزگە اسپانداعى ايدى ەكىگە ءبولىپ كورسەت. ايدىڭ ءبىر جارتىسى ءابۋ قۇبايىس تاۋىنىڭ, ەكىنشى بولىگى قۇايقان جوتاسىنىڭ ۇستىنەن كورىنسىن» دەگەن تالاپ قويادى.
پايعامبارىمىز (س.ع.س.) ولارعا: «وسى تىلەكتەرىڭدى ورىنداسام, يمان كەلتىرەسىڭدەر مە؟» دەپ سۇرادى. ولار: «ءيا, يمان كەلتىرەمىز» دەپ جاۋاپ بەردى.
وسى كەزدە ايدىڭ دوڭگەلەنىپ تولعان ءساتى ەدى, ياعني, ون ءتورتىنشى ءتۇنى. اللا ەلشىسى (س.ع.س.) اللاھ تاعالانىڭ بۇيرىعىمەن ايعا قاراي قولىن سوزىپ, سۇق ساۋساعىمەن ورتاسىنان بولگەندەي يشارات جاسادى. پايعامباردىڭ وسى ارەكەتىن كۇتىپ تۇرعانداي-اق, اي ءدال ورتاسىنان ەكىگە ءبولىنىپ, مۇشرىكتەردىڭ سۇراعانىنداي, جارتىسى ءابۋ قۇبايىستىڭ, جارتىسى قۇايقاننىڭ توبەسىنەن كورىندى.
ارداقتى پايعامبارىمىز اينالاسىنداعىلارعا: «كۋا بولىڭىزدار! كۋا بولىڭىزدار! انەكەي, توبەلەرىڭىزگە قاراڭىزدار!» دەپ داۋىستادى. مۇنداي عاجايىپ قۇبىلىستى كۇتپەگەن مۇشرىكتەر پايعامبارىمىزدىڭ (س.ع.س.) بۇل ايقىن مۇعجيزاسىنا سيقىر دەپ قارسى شىعادى. اۋىل سىرتىنان كەلگەن ادامداردان «ايدىڭ ەكىگە ءبولىنگەنىن كوردىڭدەر مە؟» دەپ سۇراعان ۋاقىتتا ولاردىڭ «كوردىك» دەگەن ءوز ناپسىلەرىنە جاقپايتىن جاۋاپتارىنا تاپ بولىپ, امالسىز «مۇنىڭ سيقىرى ايعا دا اسەر ەتىپتى» دەپ توت باسقان جۇرەكتەرى ءمىز باقپاستان, تەرىس اينالدى.
ءيا, اللاھ جۇرەكتەرىنە قارا قۇلىپ سالىپ قويعان پەندەلەر ەشقاشان دا ول قۇرساۋدان بوسانا المايدى. سەبەبى, نيەتىنە قاراي قالاۋىن بەرەتىن دە, وزىنە ءجۇزىن بۇرىپ قادام باسقان جانعا قارىشتاپ جاقىندايتىن دا, تىپتەن, جەر بەتىنە تۇسكەن ءاربىر جاپىراقتىڭ ءوزىن ءوزىنىڭ قالاۋىمەن تۇسىرەتىن جاراتۋشى جاببار يەمىز.
وسى سەبەپتى, مۇعجيزا دەگەنىمىز كەز كەلگەن ادامنىڭ قالاعان ۋاقىتىندا كورە الاتىن, ىستەي الاتىن دۇنيەسى ەمەس, بالكىم, بۇل – اللاھتىڭ ءوزى تاڭداپ, پايعامبارلىق جۇگى ءمىندەتتەلگەن قۇلدارىنا عانا ءتان قۇبىلىس. جانە دە مۇعجيزانى جاراتىپ وتىرعان الەمدى جاراتۋشى اللاھ ەكەنىن قاپەردە ۇستار بولساق, ءسال دە بولسا اقىلعا سالىپ, «بۇل مۇمكىن ەمەس» دەگەن كۇمانعا استە بارماۋىمىز كەرەك. سەبەبى, مۇمكىن ەمەس نارسە – بۇكىل قۇدىرەتتى يگەرۋشى اللاھ تاعالا ءۇشىن ەشنارسە ەمەس. بۇكىل الەم ونىڭ يەلىگىندە. سۋرەتشىنىڭ يەلىگىندە – قالامى مەن بوياۋى, قالاي سالسا دا ءوز ەركى, ۇستانىڭ قولىنداعى سايمانى دا ۇستانىڭ قالاۋىنا سايكەس ءمۇسىن جاسار بولسا, بۇكىل الەمدى جاراتۋشى اللانىڭ يەلىگىندە وسىنىڭ بارلىعى دا بار. ءبىز دە وعان ءتانبىز جانە وعان قايتارىلامىز. سول سەبەپتى دە ءسوز سوڭىن حاكىم اباي اتامىزدىڭ كەستەلى ويىمەن تۇيىندەر بولساق, «شەكتەۋلىمەن شەكسىزدى ويلاۋ» مۇمكىن ەمەس.
اسحات ءساليموۆ,
«نۇر استانا» ورتالىق مەشىتىنىڭ نايب يمامى