اتى-ءجونى ءباسپاسوز بەتتەرىندە باسىلعان كورنەكتى قالامگەر جانات ەلشىبەكتىڭ شىعارماشىلىق الەمىندەگى وزىندىك رەكوردتىق دەرەكتەر نازار اۋدارتادى.
ءيا, مۇنى كوبىمىز بىلە بەرمەيمىز. ءوزىنىڭ تۋعان كۇنىن مامىراجاي مامىردا اتاپ وتەتىن تانىمال جۋرناليست-جازۋشىنىڭ تۇڭعىش حابارى مەن رەبۋسى 6-سىنىپتا وقىپ جۇرگەندە «قازاقستان پيونەرى» («ۇلان») گازەتىندە جاريالانىپتى. سودان بەرگى جارتى عاسىر ۋاقىتتا رەسپۋبليكادا شىعاتىن گازەت-جۋرنالداردا ج.ورىنباەۆ, ج.بالقاشۇلى, ج.ەلشىبەك ءتارىزدى فاميليامەن ۇلكەندى-كىشىلى ءتۇرلى تاقىرىپتارداعى ماقالالار, رەپورتاجدار, سۋرەتتەمەلەر, وچەركتەر, اڭگىمەلەر, حيكاياتتار, كوركەم شىعارمالار, ەتيۋدتەر, تانىمدىق شىم-شىتىرمان باسقاتىرعىشتار مەن ءوزى تۇسىرگەن فوتو-تۋىندىلار جارىق كورگەن. ۇزىن-سانى مىڭنان اسىپ جىعىلادى.
قازاق باسپاسوزىندەگى تانىمدىق جانردىڭ كوكجيەگىن كەڭەيتۋدەگى ونىڭ ەڭبەگى ولشەۋسىز. ءىزاشار اۆتوردىڭ وسى تاقىرىپتاعى قيلى-قيلى دۇنيەلەرىنىڭ ءوزى مىڭنىڭ ۇستىندە. عاجاپ ەمەس پە! ول – قازاقستانداعى تۇڭعىش الىپ سوزجۇمباق («ءبىلىم جانە ەڭبەك» جۋرنالى, №8-1984ج.) پەن ەڭ العاشقى الىپ سكانۆوردتىڭ («ەگەمەن قازاقستان» گازەتى, ماۋسىم, 2000 ج.) يەسى. «سەن بىلەسىڭ بە؟», «زەرەك», «مىڭ ءبىر قىزىق», «تانىم» سەكىلدى كىتاپتارى بار.
جانات ەلشىبەك – «جاس الاشتىڭ» ايگىلى «گازەت ىشىندەگى كىتاپحاناسى» ايدارىندا جاريالانعان ءۇش اۆتوردىڭ ءبىرى. ونىڭ «تابيعات-تىلسىم» اڭگىمەلەر تسيكلى گازەتتىڭ ون بەس نومىرىنە باسىلدى – 19 اقپان-18 ءساۋىر 2002ج.
ەلىمىزدىڭ اتاقتى ءسوز زەرگەرلەرى مەن ونەر قايراتكەرلەرى حاقىندا سىر شەرتكەن وي-تولعانىستارى – «سىرلى الەم» كىتابى قازاق راديوسىنان تولىعىمەن سەگىز اي بويى وقىلدى ء(ار جەكسەنبى سايىن). 28 قىركۇيەك 2012 ج. – 28 ءساۋر 2013 ج. ارالىعىندا. بۇل دا كەز كەلگەن قالامگەردىڭ ماڭدايىنا بۇيىرا بەرمەس وزىندىك رەكورد قوي.
ال جازۋشىنىڭ «جاڭعىرىق» رومان-رەتسەنزياسىن رەسپۋبليكانىڭ بەدەلدى ادەبي باسىلىمى – «جۇلدىز» جۋرنالى «تۇسىمدە كورگەن كىتاپ نەمەسە تۇعىر تۋىندى» دەگەن اتپەن 2014 جىلعى قاراشا ايىنداعى نومىرىنەن باستاپ ۇزبەي جاريالاۋدا. بۇدان جارتى عاسىر بۇرىن تىرناقالدى اڭگىمەلەرىمەن كورىنگەن كەشەگى جاس جازۋشىلار – بۇگىنگى قازاق ادەبيەتىنىڭ التىن ۋىقتارى مەن قابىرعالى قالامگەرلەرى جايىنداعى شىعارما, ءسوز جوق, اۆتوردىڭ شىعارماشىلىقتاعى سونى ىزدەنىسى سانالسا كەرەك.
2011 جىلى قاجىلىق ساپاردان جازعان «الەم كوز تىككەن مەككە» جولجازبا-حيكاياتى گازەت-جۋرنالدار مەن كىتاپتاردا توعىز رەت باسىلدى.
سونىمەن, جانات ەلشىبەك قالامىنان تۋعان دۇنيەلەر جارىق كورگەن گازەت-جۋرنالداردى تىزەيىك. بىلە جۇرگەننىڭ ارتىقتىعى جوق. ولار – «قازاقستان پيونەرى», «ۇلان», «لەنينشىل جاس», «جاس الاش», «قازاق ادەبيەتى», «قازاقستان مۇعالىمى», «سوتسياليستىك قازاقستان», «ەگەمەن قازاقستان», «سپورت», «سۇحبات», «وركەن», «الماتى اقشامى», «انا ءتىلى», «ايقىن», «استانا اقشامى», «تۇركىستان», «جەتىسۋ», «جەرۇيىق», «وكتيابر تۋى», «قاراتال», «باستاۋ», «باسقاتىرعىش», «قازاق», «پەداگوگ», «ادەبيەت ايناسى», «نۇر استانا», «حالىق ءسوزى», «پراۆدا», «كازاحستانسكايا پراۆدا», «ۆەچەرنيايا الما-اتا», «ۆاليۋت-ترانزيت», «ەكسپرەسس ك», «ورتالىق قازاقستان», «اقتوبە», «سارىارقا سامالى», «وڭتۇستىك قازاقستان», «جىل ون ەكى اي», «قازاق كالەندارى», «قىزىل تۋ», «تورعاي تاڭى», «ارقا اجارى», «جۇلدىز», «جالىن», «تاڭ-شولپان», «ايقاپ», «ارا», «اقيقات», «اراي», «التىن تامىر», «مادەنيەت جانە تۇرمىس», «پاراسات», «قازاقستان ايەلدەرى», «قازاقستان مەكتەبى», «بالدىرعان», «ءبىلىم جانە ەڭبەك», «زەردە», «پيونەر», «اق جەلكەن», «دەنساۋلىق», «بالبۇلاق», «جامبىل», «كوكشەتاۋ», «ەڭبەك تاڭى», «ساودات», ت.ب. قازاق ءباسپاسوزى تاريحىندا تۋرا وسىنشالىقتى گازەت-جۋرنالدا جاريالانعان جۋرناليست نەكەن-ساياق. ەگەر جوعارىداعى باسىلىمداردىڭ تيراجىن ەسەپتەر بولساق, اۆتوردىڭ اتى-ءجونى قورعاسىنعا قۇيىلىپ, سان ميلليون مارتە تاسقا باسىلعانىن اڭعارۋ قيىن ەمەس. كەڭەس داۋىرىندەگى گازەت-جۋرنالداردىڭ تارالىمى وراسان كوپ بولاتىن.
مىنەكي, جۋرناليست – جازۋشى قالامىنىڭ كۇدىرەتى مەن قۇرمەتى! حالىقارالىق «الاش» سىيلىعىنىڭ لاۋرەاتى, قازاقستاننىڭ مادەنيەت قايراتكەرى, ونداعان كىتاپتىڭ يەسى جانات ەلشىبەككە كيەلى ءسوز ونەرىندە ماۋەلى جەمىستەر تىلەيمىز.
تالعات باتىرحان
