ۇلى جەڭىستىڭ 70 جىلدىعىن بارشا قازاقستاندىقتار سالتاناتپەن اتاپ ءوتتى. وسى ايتۋلى مەرەكەگە وراي ەلوردامىز استانا قالاسىندا دا كوپتەگەن شارالار ۇيىمداستىرىلدى. 9 مامىر – جەڭىس كۇنى «وتان قورعاۋشىلار» مونۋمەنتى الدىنداعى الاڭعا قالا تۇرعىندارى مەن مەيماندار كوپ جينالدى.
ەلوردا تورىندە جەڭىس كۇنىن تويلاۋعا ەلىمىزدىڭ بارلىق ايماقتارىنان 500-گە جۋىق قادىرلى قاريالار شاقىرىلدى. ولاردىڭ اراسىندا ۇلى وتان سوعىسى ارداگەرلەرى, سونىمەن قاتار, ەڭبەك مايدانىندا قاجىرلىلىق تانىتقان تىل ەڭبەككەرلەرى بولدى. سوعىس جەڭىمپازدارىنا قۇرمەت كورسەتۋشىلەر قاتارىندا جاستار مەن بالالار دا ءجۇردى.
جەڭىس تۋىن جەلبىرەتكەن مەرەكەلىك شارالار اياسىندا سوعىس جىلدارىنداعى اندەر شىرقالىپ, شىعارماشىلىق ۇجىمدار ءوز ونەرلەرىن ورتاعا سالدى. سونىمەن قاتار, الاڭدا اسكەري شاتىرلار تىگىلىپ, مايدانگەرلەرگە ارنالعان داستارقان جايىلدى.
– ۇلى وتان سوعىسىن باستان كەشكەن ادام رەتىندە ايتارىم, جەڭىس كۇنى بارشامىزعا قۇتتى بولسىن. ءبىزدىڭ ەلىمىزدە, ونىڭ ىشىندە ەلوردامىز استانادا ارداگەرلەر ءۇشىن جاقسى جاعدايلار جاسالىپ جاتىر. بۇل ورايدا ەلباسى نۇرسۇلتان نازارباەۆ يگىلىكتى ىستەر اتقارىپ وتىرعانىن ايتۋعا ءتيىسپىز جانە شەكسىز ريزاشىلىعىمىزدى بىلدىرەمىز. مىنە, قانداي جاقسى مەرەكە بولىپ جاتىر. حالىقتىڭ قۋانىشى كورىنىپ تۇر. ءبىزدىڭ بۇگىنگى ۇرپاعىمىز ەندى سوعىس كورمەسىن دەپ تىلەيمىن. ەلىمىزدە وسىنداي بەيبىتشىلىك پەن مەرەكە بولا بەرسىن, – دەيدى «وتان قورعاۋشىلار» الاڭىڭدا جۇرگەن قارت سارباز قۇتجانباي احمەتوۆ مارقايىپ.
ارداگەرلەرگە قۇرمەت كورسەتۋشىلەر قاتارىندا بولعان استانا قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ءلاززات ابۋەۆا دا ءوزىنىڭ وزەكجاردى لەبىزىن ءبىلدىردى.
– ۇلى جەڭىستىڭ 70 جىلدىعىن مەرەكەلەۋ ءبىز ءۇشىن وتە ماڭىزدى ءارى قۋانىشتى شارا بولىپ وتىر. بارشا ادامزاتتى فاشيزمنەن قۇتقارعان ارداگەرلەرىمىزگە قانداي قۇرمەت كورسەتسەك تە جاراسىمدى دەپ ويلايمىن. بۇگىندە استانا قالاسىندا 206 ارداگەر تۇرىپ جاتىر. قالا اكىمدىگى تاراپىنان وسى ارداگەرلەرىمىزگە تيىسىنشە بارلىق جاعداي جاسالىپ وتىر. شىن جۇرەكتەن بارشا ارداگەرلەرگە زور دەنساۋلىق تىلەيمىن. جەڭىس كۇنى بارشامىزعا قۇتتى بولسىن, – دەپ اتاپ ءوتتى باسقارما باسشىسى.
كۇنى بويى قالانىڭ ءار اۋدانىنداعى كوپشىلىك ورىنداردا حالىقتىق سەرۋەندەرگە قاتىسىپ, كوڭىل-كۇيى كوتەرىلگەن استانالىقتار مەن قالا مەيماندارى كەشكە قاراي استانا اسپانىن ايشىقتاعان مەرەكەلىك وتشاشۋدى تاماشالادى.
