استانا قالاسىنداعى كەيبىر نان ءوندىرۋشى كاسىپورىندار كەيىنگى كەزدەرى ناننىڭ ءار بولكەسىنەن 20-30 گرامم ۇن قاقشىپ وتىر ەكەن. كەشە وسى جاعدايعا بايلانىستى «ادىلەت» تۇتىنۋشىلار قۇقىعىن قورعاۋ قوعامدىق ۇيىمىنىڭ وكىلدەرى دوڭگەلەك ۇستەل جيىنىن وتكىزدى.
قوعامدىق ۇيىمعا نان باعاسىنىڭ قىمباتتىعى مەن ساپاسىنا قاتىستى ارىز-شاعىمدار وتە كوپ تۇسەدى ەكەن. بيىل قاڭتار-اقپان ايلارىندا اتالمىش قوعام بەلسەندىلەرى ەلوردالىق دۇكەندەردىڭ ءبىرازىنا ارنايى رەيد ۇيىمداستىرىپ, ناننىڭ ساپاسى مەن سالماعىنا قاتىستى تەكسەرۋ جۇرگىزىپ كورىپتى. سوندا 19 بىردەي ءىرى ساۋدا ورىندارىنا باس سۇعىپ, نان ساپاسى مەن باعاسى تەكسەرىلگەن. ونىڭ بارىسىندا ءبىراز زاڭسىزدىقتار اشىلعان. اتاپ ايتقاندا, دۇكەن سورەلەرىندەگى بولكە ناننىڭ سالماعى ازايىپ كەتكەنىن, ياعني, ستاندارتقا سايكەسپەيتىنى انىقتالعان. ياعني, نان ءوندىرۋشىلەر ءار بولكەدەن 20-30, تىپتەن 60 گرامعا دەيىن ۇنەمدەپ كەلگەن. ال ەلىمىزدە بەكىتىلگەن ستانداتتتار بويىنشا, زاۋىت نانىنىڭ سالماعى 550 گرامنان كەم بولماۋى ءتيىس.
– تەكسەرۋلەردەن كەيىن نان دايىنداۋشى كومپانيالاردىڭ وكىلدەرىمەن كەلىسسوزدەر جۇرگىزىپ, ولقىلىقتىڭ ورنىن تولتىرۋ جونىندە ەسكەرتۋ جاساعانبىز. الايدا, سودان بەرى جارتى جىل ءوتتى ەشقانداي ناتيجە جوق. كوپتەگەن وندىرۋشىلەر نان سالماعىن ازايتىپ, زاڭ بۇزۋشىلىققا بارىپ ءجۇر, – دەيدى «ادىلەت» تۇتىنۋشىلار قۇقىعىن قورعاۋ قوعامىنىڭ توراعاسى قابىكەن زاكاريانوۆ.
قوعامدىق ۇيىم وكىلدەرى ماۋسىم-شىلدە ايلارىندا قالا دۇكەندەرىندە تاعى ءبىر مارتە تەكسەرۋ جۇرگىزگەن. الايدا, جاعداي «باياعى جارتاس – سول جارتاس» كۇيىندە قالعان. بولكە نانداردىڭ سالماقتارىنا 20-30 گرامنان جەتىسپەي جاتقانى انىقتالادى. ونىڭ ۇستىنە كەيبىر دۇكەندەردە بولكە ناننىڭ باعاسى 80 تەڭگەگە دەيىن كوتەرىلگەن.
نان ساپاسىنا بايلانىستى دوڭگەلەك ۇستەلگە قالاداعى نان زاۋىتتارى مەن زاڭسىزدىق تابىلعان دۇكەن وكىلدەرى شاقىرتىلعان ەكەن. الايدا, ولاردىڭ ەشقايسىسى كەلگەن جوق.
ال تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتىنىڭ استانا قالاسى بويىنشا دەپارتامەنتى ماماندارى دا نان ساپاسى مەن باعاسىنا قاتىستى شاعىم كوپ تۇسەتىنىن راستاپ وتىر. قازىرگى تاڭدا دەپارتامەنت تاراپىنان انىقتالعان فاكتىلەر بويىنشا تەكسەرۋ جۇمىستارى جۇرگىزىلىپ جاتىر.
دوڭگەلەك ۇستەل سوڭىندا «ادىلەت» تۇتىنۋشىلار قۇقىعىن قورعاۋ قوعامى وكىلدەرى تۇتىنۋشىلار قۇقىق قورعاۋ تۋرالى زاڭ تالاپتارىنا ءاتۇستى قاراعان كومپانيالارعا قاتىستى زەرتتەۋلەر نەگىزىندە ارنايى قۇجاتتار دايىندالىپ جاتقانىن, جاقىن كۇندەرى بۇل قۇجاتتاردىڭ سوتقا جىبەرىلەتىنىن ايتتى.
بۇركىت نۇراسىل
