ۇكىمەت باسشىسىنىڭ ورىنباسارى بەردىبەك ساپارباەۆ پەن نۇر-سۇلتان قالاسىنىڭ اكىمى التاي كولگىنوۆ ەلورداداعى №88 مەكتەپ-ليتسەيگە باردى. «Family Village» تۇرعىن ءۇي كەشەنىنىڭ جانىنان قونىس تەپكەن جاڭا مەكتەپتىڭ ەرەكشەلىگى سول, مۇنىڭ ءىشى نەيروديزاين پرينتسيپىنە نەگىزدەلگەن.
عيماراتقا كىرگەن بەتتە ءتۇرلى-ءتۇستى گەومەتريالىق فيگۋرالارمەن بەزەندىرىلگەن قابىرعالار مەن مەكتەپ لوگوتيپىنە كوزىڭ تۇسەدى. حولل مەن دالىزدەن بولەك, سىنىپتاردىڭ دا ايرىقشا ستيلدە جابدىقتالعانىن بايقادىق. ديزاين اۆتورى, Kozmo.drom جوباسىنىڭ نەگىزىن سالۋشى ايان اشىربەكوۆتىڭ ايتۋىنشا, نەيروبيولوگيا مەن ينتەرەر ديزاينى سالالارىن بىرىكتىرەتىن «نەيروديزاين» اتتى تىڭ فورمات وقۋشىلاردىڭ فيزيكالىق حال-احۋالىن, جۇمىس ونىمدىلىگىن جانە ەموتسيالىق ينتەللەكتىسىن جاقسارتۋعا كومەكتەسەتىن ەرەكشە كەڭىستىكتەر قۇرۋعا مۇمكىندىك بەرەدى.
– مەكتەپتىڭ ديزاينىن جاساردا ونىڭ ماتەماتيكا-جاراتىلىستانۋ باعىتىن تەرەڭدەتىپ وقىتاتىنىن ەسكەردىك. ماسەلەن, ءدالىز قابىرعالارىنا پيفاگور, گاليلەي, ءال-فارابي سەكىلدى ەجەلگى عۇلامالاردان باستاپ مۇحتار وتەلباەۆ, اسقار جۇمادىلداەۆ سىندى بۇگىنگى عالىمداردىڭ سۋرەتتەرى سالىنعان. جانىنداعى QR-كودتاردى سكانەرلەۋ ارقىلى شاكىرتتەر ولار جايلى ۆيكيپەديا ۇسىنعان اقپاراتتاردى وقي الادى. ادەتتە نەلىكتەن دامىعان ەلدەردە ءبىلىم الۋ ورتاسىنا ەرەكشە كوڭىل بولەدى؟ ويتكەنى ورتا – وتباسى مەن پەداگوگتان كەيىنشى ءۇشىنشى ۇيرەتۋشى, – دەيدى ايان اشىربەكوۆ.
جاڭا مەكتەپ 1200 ورىنعا شاقتالىپ سالىنعان. قازىرگى تاڭدا وندا 501 وقۋشى بار, 49 مۇعالىم ساباق بەرۋدە. 
– باستاپقىدا تازا قازاق مەكتەبى بولادى دەپ جوسپارلانعان. الايدا اتا-انالاردىڭ سۇرانىسى بويىنشا ورىس سىنىپتارىن دا اشۋعا تۋرا كەلىپ, ارالاس مەكتەپكە اينالدىق. بۇگىندە №75, №84, №85, №76, №77 جانە №73 مەكتەپتەردەگى ورىن تاپشىلىعى ماسەلەسى جەڭىلدەپ, سونداعى بالالاردىڭ كەيبىرى وسى مەكتەپكە اۋىستى. بۇل ماڭعا №47 جانە №102 باعىتتاعى اۆتوبۋستار قاتىنايدى. قاڭتار ايىنان باستاپ اكىمدىك تاراپىنان ارنايى كولىك بەرىلۋى مۇمكىن, ءالى قاراستىرىلىپ جاتىر. ەگەر ماقۇلدانسا, وندا «ارناۋ», «قامال», «Nova City», «Promenade EXPO» تۇرعىن ءۇي كەشەندەرى جانە بوكەيحانوۆ پەن ماڭگىلىك ەل كوشەلەرى ارقىلى مەكتەپتىڭ ءوز اۆتوبۋسى جۇرەتىن بولادى, – دەدى №88 مەكتەپ-ليتسەي ديرەكتورى لاززات نىسانقۇلوۆا.
ءوز كەزەگىندە قالا باسشىسى التاي كولگىنوۆ وقۋشىلارمەن اڭگىمە بارىسىندا:
– بۇل مەكتەپتىڭ تابالدىرىعىن العاش بولىپ سىزدەر اتتادىڭىزدار. ەلوردادا جىل سايىن جاڭا مەكتەپتەر اشىلۋدا. ونىڭ ءبارى – جاس ۇرپاق, مىنا سىزدەر ءۇشىن. وسى كەزدەن بىلىمگە دەن قويساڭىزدار, بولاشاقتا جاقسى مامان بولاسىزدار. جاقسى مامان – قوعامنىڭ دامۋىنا ۇلەس قوساتىن بەلدى مۇشەسى, – دەپ جەتكىنشەكتەرگە ءۇمىت ارتا سويلەدى.
ۆيتسە-پرەمەر مەن ەلوردا اكىمى مەكتەپتى ارالاۋ كەزىندە ينكليۋزيا سىنىبىمەن دە تانىستى. ول – «بولاشاق» كورپوراتيۆتىك قورىنىڭ «ءار بالا مەكتەپكە لايىق» جوباسى اياسىندا «شەۆرون» كومپانياسىنىڭ دەمەۋشىلىگىمەن اشىلعان استاناداعى التىنشى سىنىپ. اتالعان قوردىڭ قامقورشىلىق كەڭەسى ءتورايىمى دينارا شايجۇنىسوۆا بۇگىندە سىنىپتا ەرەكشە قاجەتتىلىكتى تالاپ ەتەتىن 5 بالا ءبىلىم الىپ جاتقانىن ايتتى.
