ەلىمىزدە «بيزنەستىڭ جول كارتاسى – 2020» بيزنەستى قولداۋ جانە دامىتۋدىڭ بىرىڭعاي باعدارلاماسى بويىنشا قارجىلاندىرۋعا وتىنىشتەر قابىلدانا باستادى. باعدارلاما اياسىندا قارجىلاي قولداۋدىڭ نەگىزگى باعىتى رەتىندە شاعىن كاسىپكەرلىككە نەسيە بەرۋ تەتىكتەرى قاراستىرىلعان.
«اۋىل شارۋاشىلىعىن قارجىلاي قولداۋ قورى» اق باسقارما توراعاسىنىڭ ورىنباسارى الماس تاۋباەۆتىڭ ايتۋىنشا, بۇل نەسيەلەۋ باعدارلاماسى قازاقستاننىڭ بارلىق وبلىستارىندا جۇزەگە اسىرىلادى. بولىنگەن قارجى مونوقالالار, شاعىن قالالار, اۋىلدىق ەلدى-مەكەندەردەگى شاعىن قارجى ۇيىمدارىن نەسيەلەۋگە باعىتتالادى. «نەسيەلەۋ باعدارلاماسىنىڭ تالاپتارىنا سايكەس, قارىزدار بيزنەس جوبالارىن جۇزەگە اسىرىپ جاتقان نەمەسە اسىرۋدى جوسپارلاعان كاسىپكەرلەرگە باعىتتالادى. باعدارلامانىڭ ماقساتى – ايماقتىق كاسىپكەرلىكتىڭ تۇراقتى ءوسۋىن جانە جاڭا جۇمىس ورىندارىن اشۋدى قامتاماسىز ەتۋ. بۇل باعىتتا بيۋدجەتتەن 2 ملرد 647 ملن تەڭگە ءبولىندى. 2017-2018 جىلدارى دا وسى كولەمدە قارجىلاندىرۋ جوسپارلانعان» دەيدى ول. تۇپكى قارىز الۋشىلارعا بەرىلەتىن شاعىن نەسيەلەر – ءوز ءىسىن ۇيىمداستىرۋ نەمەسە كەڭەيتۋ جانە اينالىمداعى كاپيتالدى سالالىق شەكتەۋسىز تولىقتىرۋعا جۇمسالماق.
نەسيەنىڭ ەڭ جوعارى سوماسى – 350 ملن تەڭگە. شاعىن قارجى ۇيىمى ءۇشىن بەكىتىلگەن سىياقى ۇستەمەسى – 4 پايىز. ال تۇپكى قارىز الۋشىلار ءۇشىن نومينالدى ۇستەمە كورسەتكىشى 12 پايىزدان اسپايدى. نەسيەنى وتەۋ مەرزىمى 54 ايعا دەيىنگى ۋاقىتتى قامتيتىن بولادى.
جالپى, 2006 جىلدان بەرى «اۋىل شارۋاشىلىعىن قارجىلاي قولداۋ قورى» اق شاعىن نەسيە (شاعىن قارجى) ۇيىمدارىن قولداۋعا 10 ملرد 226 ملن تەڭگە ءبولدى. بۇل قارجىدان تۇپكى قارىز الۋشىلارعا 23 مىڭعا جۋىق شاعىن نەسيە بەرىلدى.
بۇركىت نۇراسىل
