استانانىڭ تويى باستالدى! ەلباسى نۇرسۇلتان نازارباەۆتىڭ قاتىسۋىمەن, قالىپتاسقان ءداستۇر بويىنشا مەملەكەتتىك تۋ كوككە كوتەرىلدى.
– قازاق بالاسىنىڭ مىزعىماس تا مۇقالماس ەرلىك ءداستۇرىنىڭ تامىرى تەرەڭدە جاتىر. حالقىمىز ءۇشىن كوگىنەن كوتەرىلگەن بايراقتان قاسيەتتى نىشان بولماعان. ەل شەتىنە جاۋ كەلسە, ءبىزدىڭ باتىر بابالارىمىز وسى بايراقتىڭ تۇبىنەن تابىلعان. ازاتتىق جولىنداعى ارپالىستاردا ەرلەرىمىز ەلدىكتىڭ تۋىن ەڭكەيتپەس ءۇشىن جاندارىن قۇربان قىلعان. ەلى ەسىل ەرلەرىنە «تۋىڭ جىعىلماسىن!» دەپ باتا بەرگەن. ءبىز, بۇگىنگى تاۋەلسىز قازاق ەلىنىڭ ازاماتتارى, وسى باتا بويىنا دارىعان ۇرپاقپىز. ەگەمەندىك العاننان بەرى, كوك بايراعىمىزدى الاسارتپاي, ەلىمىز تىنىش, ەڭسەمىز بيىك بولىپ, ءوسىپ-وركەندەپ كەلەمىز, – دەدى ەلباسى ءوز سوزىندە.
بۇگىندە استانا بار قازاقتىڭ باس قالاسىنا اينالدى. سالتاناتتى جيىندا پرەزيدەنت ەلوردانىڭ قالىپتاسۋىنا ەرەكشە توقتالدى.
– جاس استانا تاريحى – اقيقاتقا اينالعان ۇلتتىق ارمانىمىزدىڭ جىلناماسى. وسى جىلدارى ەلىمىزدىڭ بارلىق وڭىرىنەن كەلگەن ءجۇز مىڭداعان قازاقستاندىق ەلوردامىزدىڭ قۇرىلىسى مەن قالىپتاسۋىنا ەلەۋلى ۇلەستەرىن قوستى. استانا – ءار قازاقستاندىق ءۇشىن ولاردىڭ ءجۇرەگىنە جاقىن, ءبىز ءوز قولىمىزبەن تۇرعىزىپ جاتقان جاڭا وتانىمىزدىڭ ءبىر بولىگى, – دەي كەلە مەملەكەت باسشىسى ەلوردا ەلىمىزدىڭ جاڭا رۋحاني-مادەني ورتالىعىنا اينالعانىن ايتتى.
حالقىمىزدىڭ بىرلىگىن كورسەتەتىن استانانىڭ 15 جىلدىعى – قازاقستاننىڭ جالپىۇلتتىق مەرەكەسى. ەلباسىنىڭ ايتۋىنشا, استانا ەلدىڭ بارلىق وڭىرىنە دامۋدىڭ ۇلگىسىن كورسەتىپ كەلەدى. بارلىق وبلىس ورتالىقتارىمەن وزگە دە قالالار استاناعا قاراپ جاڭا نىساندار سالۋدا, بوي تۇزەۋدە. ەلباسى «بۇگىنگى تۋىمىز تۇعىرلى, ەلىمىز عۇمىرلى بولسىن. ازات اسپانىمىزدا التىن قىران قالىقتاعان ماڭگىلىك ەلىمىزدىڭ بولاشاعى بەكەم بولسىن» دەگەن اقجارما تىلەگىن جەتكىزدى.
سالتاناتتى جيىندا قازاقستاننىڭ اسكەري جوعارى وقۋ ورىندارىنىڭ ۇزدىك تۇلەكتەرى پرەزيدەنت قولىنان وفيتسەرلىك شەن الدى. جاس وفيتسەرلەر ەلباسىنىڭ الدىندا وتانىمىزدىڭ قاۋىپسىزدىگىن قورعاۋعا انت بەردى.
ءداستۇرلى ءراسىم سوڭىندا ەلباسى استانالىقتارمەن اشىق-جارقىن اڭگىمەلەستى.
گۇلميرا ايماعانبەت
