باستى اقپاراتمادەنيەت

ءورىسى كەڭ قالامگەر

استانا قالالىق ارداگەرلەر ورتالىعىندا جۋرناليست, جازۋشى, حالىقارالىق «الاش» ادەبي سىيلىعىنىڭ لاۋرەاتى ءورىس ياشۇكىرقىزىنىڭ 75 جاس مەرەيتويىنا وراي قالامگەرمەن كەزدەسۋ مەن ءار جانرداعى شىعارمالارىن قامتىعان ءتورت تومدىعىنىڭ تانىستىرىلىمى ءوتتى. كەزدەسۋدە قالامگەردىڭ ءومىر جولىنا شولۋ جاسالدى.

ءورىس ياشۇكىرقىزى – قازاق مەملەكەتتىك ۋنيۆەرسيتەتى جۋرناليستيكا فاكۋلتەتىنىڭ تۇلەگى. ەڭبەك جولىن الماتى وبلىسى شەلەك اۋداندىق «ەڭبەك تۋى» گازەتىنەن باستادى. ءوزى تۋىپ-وسكەن قىزىلوردا وبلىسى سىرداريا اۋداندىق «سىرداريا» گازەتىندە ادەبي قىزمەتكەر بولدى. 21 جىل بويى تورعاي وبلىستىق تەلەراديوكورپوراتسياسىندا كوممەنتاتور, تەلەجۋرناليست بولىپ ەڭبەكتەندى. «استانا اقشامى» باسىلىمىندا دا قولتاڭباسى قالدى. اقمولا استاناعا اينالعاندا, استانالىق گازەتتىڭ الەۋمەتتىك سالا ءبولىمىنىڭ مەڭگەرۋشىسى قىزمەتىن ابىرويمەن اتقاردى. 10 جىل مادەنيەت جانە اقپارات مينيسترلىگى اقپارات جانە مۇراعات كوميتەتىنىڭ باس ساراپشىسى بولدى. وسىلايشا, جۋرناليستيكا سالاسىندا ۇزبەي 33 جىل, مەملەكەتتىك قىزمەتتە 12 جىل ەڭبەكتەندى. جالپى ەڭبەك ءوتىلى 45 جىلدى قۇرايدى. قاي قىزمەتتە جۇرسە دە شىعارماشىلىق جۇمىسپەن تىنباي اينالىستى. سونىڭ جەمىسى – ءار جىلدارى مەملەكەتتىك تاپسىرىسپەن شىققان كىتاپتارى. كىتاپتارىنىڭ اراسىندا وسىدان تۋرا 30 جىل بۇرىن «قازاق ءتىلى» قوعامىنىڭ «قازاق ايەلدەرى» باعدارلاماسىمەن «اينا كوڭىل», «قاراشا قازدىڭ قاڭقىلى», «سەكسەۋىلدىڭ شوعى» ولەڭدەر جيناقتارىن اتاپ وتۋگە بولادى. ونىڭ ولەڭدەرىنە بەلگىلى كومپوزيتور باقىتجان ساۋەكەنوۆ بىرنەشە ءان جازدى.

جاڭادان جارىق كورگەن ءتورت تومدىعىندا پوەزيا, پروزا, ساتيرا, دەتەكتيۆ جانرلارىنداعى شىعارمالارى توپتاستىرىلعان. «جان سارايىم – ولەڭىم» اتتى ءبىرىنشى تومىندا ولەڭدەرى, «ەسكى قونىستاعى ەل» اتتى ەكىنشى تومىندا پروزا شىعارمالارى, «ۇشىق پەن پۇشىق» اتتى ءۇشىنشى تومىندا ساتيرالارى, ال «قۇلدىقتاعى قىلمىس» اتتى ءتورتىنشى تومىندا دەتەكتيۆ جانرىنداعى تۋىندىلارى جيناقتالعان.

كەزدەسۋدە ءورىسى كەڭ قالامگەردىڭ جالپى شىعارماشىلىعى مەن شىعارمالارى تۋرالى اڭگىمە ءوربىپ, اۆتورمەن سۇحبات جۇرگىزىلدى. ولەڭدەرى وقىلىپ, «ەسىل تولقىندارى» حالىق ارداگەرلەر ءانسامبلىنىڭ ورىنداۋىندا اسەم اندەر اۋەلەدى. ءىس-شارانى ۇيىمداستىرۋشى استانا قالاسى ەسىل اۋدانى اكىمدىگى, ەسىل اۋدانى ارداگەرلەر كەڭەسى جانە ەسىل اۋداندىق بەلسەندى ۇزاق ءومىر ءسۇرۋ ورتالىعى اتىنان مەرەيتوي يەسىنە سىي-قۇرمەت كورسەتىلدى.

تاعىدا

ۇقساس جاڭالىقتار

Back to top button