ءورت سوندىرۋشىلەردىڭ جۇمىسى قاۋىپ-قاتەرگە تولى. ولاردىڭ اپات كەزىندە كوزسىز جانكەشتىلىككە باراتىنىن ەلوردالىق ءورت ءسوندىرۋشى اسقار زابيكۋليننىڭ ەرلىگىنەن ءدۇيىم جۇرت بىلەدى. ءۇش ادامدى قۇتقارعان باتىردىڭ قايسارلىعى ەلەنبەي قالعان جوق. استانا ونوماستيكالىق كوميسسياسىنىڭ وتىرىسىندا ەسىل اۋدانىندا ورنالاسقان ە-583 كوشەسىندە ءورتتى ءسوندىرۋ كەزىندە ەرلىكپەن قازا تاپقان اسقار زابيكۋليننىڭ ەسىمىن بەرۋ تۋرالى شەشىم قابىلداندى.
جيىندا باتىردىڭ ەسىمىن ءوزى قىزمەت ەتكەن №6 مامانداندىرىلعان ءورت ءسوندىرۋ بولىمىنە بەرۋ, مەكەمە الدىنا بيۋست ورناتۋ ۇسىنىلدى. سونىمەن قاتار اسقار زابيكۋليننىڭ ەستەلىك سۋرەتىن استانا قالاسىنىڭ ا.پۋشكين كوشەسىندە ورنالاسقان «قۇتقارۋشىلار ساياباعىنداعى» اقپاراتتىق تاقتاعا ورنالاستىرۋ تۋرالى شەشىم قابىلداندى. اتالمىش ساياباقتا بۇرىن قايتىس بولعان قۇتقارۋشىلاردى ەسكە الۋعا ارنالعان اقپارات ورنالاستىرىلعان.
قالانىڭ ونوماستيكالىق كوميسسياسىنىڭ وتىرىسىندا قارالعان ۇسىنىستار استانا ءماسليحاتىنىڭ تۇراقتى كوميسسيالارىنىڭ جاريا تىڭداۋلارىنا, قالالىق قوعامدىق كەڭەستىڭ قاراۋىنا جىبەرىلەدى.
بۇعان دەيىن مەملەكەت باسشىسىنىڭ تاپسىرماسى بويىنشا قۇتقارۋشى اسقار زابيكۋليننىڭ وتباسىنا ءۇش بولمەلى پاتەردىڭ كىلتى تابىستالدى. پاتەر اسقاردىڭ جارى انەلگە جەكە مەنشىككە بەرىلدى.
اپات كەزىندە قايسارلىق تانىتقان ەكىنشى قۇتقارۋشى ايان كەمپىروۆتىڭ وتباسىنا 24 ميلليون سوماسىنداعى يپوتەكانى وتەۋگە كومەك كورسەتىلدى. ەكى وتباسىنىڭ دا 6 ميلليون تەڭگەدەگى نەسيەسى وتەلدى.
وسىعان دەيىن ءورت ءسوندىرۋشى سايات ابەەۆ پەن گراناتانى كەۋدەسىمەن جاۋىپ, تەرروريستى زالالسىزداندىرعان پوليتسيا كاپيتانى عازيز بايتاسوۆتىڭ ەسىمىمەن كوشەلەر اتالعان بولاتىن.
