استانا قالاسىندا مەرەكەلىك جارىستارمەن اتالىپ ءوتىلدى
وليمپيادا ويىندارىنىڭ تاريحى 1884 جىلدان باستالعان ەدى. وسى جىلى پەر دە كۋبەرتەن حالىقارالىق وليمپيادا كوميتەتىن قۇرۋدى ۇسىنىپ, سودان بەرى دۇنيەجۇزىلىك سپورت دوداسىن وتكىزۋ ءداستۇرى قالىپتاستى. ال 1948 جىلدان بەرى وليمپيادا كۇنى وتكىزىلىپ كەلەدى. قازاقستان ايتۋلى ۇيىمعا 1992 جىلى مۇشە بولىپ قابىلداندى.
بيىلعى وليمپيادا كۇنى ەلىمىزدىڭ بارلىق وبلىس ورتالىقتارىندا, الماتى جانە استانا قالالارىندا سالتاناتتى جاعدايدا اتالىپ ءوتىلدى.
سەنبى, 23 مامىر كۇنى ەلوردا جۇرتشىلىعى قالالىق ساياباقتاعى وليمپياداشىلار اللەياسىنا جينالىپ, مەرەكەلىك جارىستارعا قاتىستى. ولاردىڭ قاتارىندا وليمپيادا ويىندارىنىڭ جەڭىمپازدارى مەن جۇلدەگەرلەرى, پارلامەنت دەپۋتاتتارى, مينيسترلىكتەر مەن مەكەمەلەر قىزمەتكەرلەرى, اسكەريلەر, ستۋدەنتتەر مەن مەكتەپ وقۋشىلارى بولدى. استانا قالاسىنىڭ اكىمدىگى, قازاقستان ۇلتتىق وليمپيادا كوميتەتىنىڭ استانالىق فيليالى, قر مادەنيەت جانە سپورت مينيسترلىگى, «استانا ەكسپو-2017» اكتسيونەرلىك قوعامىنىڭ قولداۋىمەن وتكىزىلگەن مەرەكەلىك شارانىڭ اشىلۋ راسىمىندە قر مادەنيەت جانە سپورت ءمينيسترى ارىستانبەك مۇحامەدياۇلى ءسوز سويلەپ, مەرەكەلىك شاراعا قاتىسۋعا كەلگەن بارشا قاۋىمعا العىسىن ايتىپ, قازاقستان سپورتىنىڭ ابىرويى اسقاقتاي بەرۋىنە تىلەك قوستى. وليمپيادا ويىندارىنىڭ چەمپيوندارى يۋري مەلنيچەنكو مەن سەرىك ساپيەۆ استانالىقتار مەن قالا مەيماندارىنا ريزاشىلىعىن ءبىلدىردى.
وليمپيادا كۇنىنە ارنالعان مەرەكەلىك جارىستىڭ باعدارلاماسى بويىنشا 800 جانە 1200 مەترگە جۇگىرۋ, بالالار ءۇشىن «وليمپيادالىق سايىس» تاقىرىبىندا اسفالتقا سۋرەت سالۋ, مۇمكىندىگى شەكتەۋلى سپورتشىلاردىڭ اربامەن جارىسى جانە ۆەلوبايگە ۇيىمداستىرىلدى.
– مەن مۇنداي جارىسقا ءبىرىنشى رەت قاتىستىم. قاتىسۋشىلاردىڭ قاتارىندا وليمپيادا ويىندارىنىڭ چەمپيوندارى دا بولادى دەگەن سوڭ ادەيىلەپ كەلگەن ەدىم. مەن 800 مەترگە جۇگىردىم. ەڭ باستىسى, وليمپيادا ويىندارىنىڭ جۇلدەگەرى گيۋزەل مانيۋروۆا مەن حالىقارالىق دارەجەدەگى سپورت شەبەرى تاتيانا امانجولمەن ءبىر قاتاردا جۇگىردىم. ديپلوم الدىم. بۇل مەرەكەلىك جارىس ەسىمدە كوپكە دەيىن ساقتالاتىن شىعار, – دەيدى استانا قالاسىنداعى №54 مەكتەپ-ليتسەيدىڭ 4-سىنىپ وقۋشىسى اياجان رايحان.
– وسى مەرەكەلىك شاراعا كەلگەن بارشا استانالىقتاردى وليمپيادا كۇنىمەن قۇتتىقتايمىن. بۇل قازاقستان ءۇشىن دە ايتۋلى كۇن دەپ ەسەپتەيمىن. ءبىز 1992 جىلدان بەرى وسى بەدەلدى حالىقارالىق ۇيىمنىڭ مۇشەسىمىز. بارلىق وتانداستارىمنىڭ سپورتپەن شۇعىلدانىپ, سالاۋاتتى ءومىر سالتىن ۇستانۋىنا تىلەكتەسپىن, – دەپ اتاپ ءوتتى مەرەكەلىك جۇگىرۋدىڭ مارەسىنە جەتكەن ساتىندە وليمپيادا ويىندارىنىڭ چەمپيونى يۋري مەلنيچەنكو.
كەزەك-كەزەگىمەن وتكەن مەرەكەلىك جارىستاردا جۇلدەگەر اتانعان اۋەسقوي سپورتشىلارعا حالىقارالىق وليمپيادا كوميتەتىنىڭ ديپلومدارى جانە ەستەلىك سىيلىقتارى بەرىلدى.
