Sport

وليمپياداعا ورايلاس ويىندار

بۇگىن ەلىمىزدىڭ تۇكپىر-تۇكپىرىندە سپورتسۇيەر بۇقارا حالىقارالىق وليمپيادالىق كۇنىن اتاپ وتەدى. سپورتتىق مەرەكەنى ءتىلشىمىز ەلوردالىقتار دا نازاردان تىس قالدىرماق ەمەس. حالىقارالىق اتاۋلى كۇن قارساڭىندا استانا قالاسى تۋريزم, دەنە تاربيەسى جانە سپورت باسقارماسى باستىعىنىڭ ورىنباسارى سامات قابدۋلينمەن از-كەم اڭگىمەلەسكەن ەدى ءتىلشىمىز.

– الدىمەن وسى سپورتتىق شارانىڭ تاريحىن بىلە جۇرسەك…
– بۇل ءداستۇرلى شارانىڭ دا تاريحى تەرەڭنەن تارتادى. 1894 جىلى 23 ماۋسىمدا پەر دە كۋبەرتەن مەن ونىڭ سەرىكتەستەرى بۇكىل جەر بەتىندە وينالاتىن وليمپيادالىق ويىنداردى جاڭعىرتپاق بولىپ, حالىقارالىق وليمپيادالىق كوميتەتتى قۇرادى. 1948 جىلدىڭ قاڭتارىندا كوميتەتتىڭ 42-سەسسياسىندا حالىقارالىق وليمپيادالىق كۇندى جىل سايىن وتكىزۋ تۋرالى شەشىم قابىلدانادى. سول ۋاقىتتان باستاپ وسى وقيعانى اتاپ ءوتۋ داستۇرگە اينالىپ وتىر. تۇڭعىش وليمپيادالىق كۇن سول جىلدىڭ 23 ماۋسىمىندا وتكىزىلگەن ەكەن. ونى الەمنىڭ 200-دەن استام ەلى مەرەكەلەگەن.
– بۇگىن سپورتسۇيەر قاۋىمدى قانداي يگى شارالار كۇتىپ تۇر؟
– ەلوردالىقتار وليمپيادالىق كۇنىن ق.مۇڭايتپاسوۆ اتىنداعى ورتالىق ستاديوندا وتكىزەتىن بولادى. شارانى مەرەكەلەۋگە جانە ءوز كۇشتەرىن تەكسەرۋ ءۇشىن بارلىق جاستاعى ازاماتتار قاتىسا الادى. مەرەكە اياسىندا ءارتۇرلى جاستاعى قاتىسۋشىلار اراسىندا جەكە جۇگىرۋلەر ۇيىمداستىرماقپىز. مۇمكىندىگى شەكتەۋلى جانداردى دا جارىس جولىنا قوسامىز. ارنايى جۇلدەلەرىمىز دە جوق ەمەس. مارەنىڭ باستالۋى ساعات 10.00-دە.
– ۇيىمداستىرىلاتىن جارىستارعا تولىعىراق توقتالساڭىز…
– ماسەلەن, 5-10 جاستاعى بالالار ءۇشىن «وليمپيادالىق جارىستار» اتتى اسفالتقا سۋرەت سالۋ بايقاۋى بار. ۇلكەن سىنىپتاعى وقۋشىلار مەن ستۋدەنتتەر بيىل وتەتىن لوندون وليمپياداسىنا بايلانىستى ۆيكتورينالىق سۇراقتارعا جاۋاپ بەرسە, ۇلتتىق سپورت تۇرلەرىنەن, دروتيكتەر لاقتىرۋدان, ۇستەل تەننيسى, ساداقتان اتۋ ويىندارىنان سىنعا تۇسەدى. سونىمەن قاتار, پارلامەنت ءماجىلىسى دەپۋتاتتارى, وليمپيادا چەمپيوندارى جانە باق قىزمەتكەرلەرى 400 مەتر قاشىقتىققا جۇگىرمەك. ايتا كەتەيىن, جەڭىمپازدار مەن جۇلدەگەرلەر ۇلتتىق وليمپيادا كوميتەتىنىڭ ەستەلىك سىيلىقتارىمەن, جەكە دەمەۋشىلەردىڭ جۇلدەلەرىمەن ماراپاتتالادى. قاشىقتىقتى تابىستى اياقتاعان ءاربىر قاتىسۋشىعا حالىقارالىق وليمپيادا كوميتەتىنىڭ پرەزيدەنتى جاك روگگەنىڭ قولى قويىلعان سەرتيفيكات تاپسىرىلادى. وليمپيادالىق كوميتەتتىڭ سەرىكتەستەرى «Coca-cola» جانە «Procter&Gamble» كومپانيالارى وزدەرىنىڭ باعدارلامالارىن ۇسىنىپ, قاتىسۋشىلارعا ءوز ونىمدەرىن تەگىن تاراتپاق.

اسحات رايقۇل

تاعىدا

ۇقساس جاڭالىقتار

پىكىر ۇستەۋ

Back to top button