ءومىر نارىنەن ءلاززات ال
كەشە ەلوردامىزداعى م.وتەمىسۇلى اتىنداعى وقۋشىلار سارايى جانىنداعى الاڭدا ءداستۇرلى «ءومىر نارىنەن ءلاززات ال!» اكتسياسى اياسىندا وتەتىن فۋنكتسيونالدىق جاتتىعۋلار ماۋسىمىنىڭ اشىلۋى بولىپ ءوتتى. استانا قالاسىنىڭ تۋريزم, دەنە تاربيەسى جانە سپورت باسقارماسىنىڭ ۇيىمداستىرۋىمەن بيىل ءۇشىنشى رەت باستالعان شاراعا مەكتەپ وقۋشىلارى, سپورت كلۋبتارىنىڭ تاربيەلەنۋشىلەرى جانە ءوز ەرىكتەرىمەن قوسىلعان استانالىقتار قاتىستى.
– بۇگىندە دەنە بەلسەندىلىگىنىڭ ءتومەندەۋ پروبلەماسى بەلەڭ العاندىعى بارشاعا بەلگىلى. وسى سەبەپتى اكتسيا قوعام, اسىرەسە, جاستار جانە وقۋشىلار نازارىن دەنە بەلسەندىلىگى مەن سپورتقا اۋدارتۋ ماقساتىندا ءوتكىزىلىپ وتىر. سونىمەن قاتار, سوزىلمالى ينفەكتسيالى ەمەس اۋرۋلاردىڭ باستى سەبەپتەرىنىڭ ءبىرى بولىپ تابىلاتىن گيپوديناميا تۋرالى ءجيى ايتا باستادىق. وسىنداي دەرتتەردىڭ الدىن الۋ ءۇشىن ادامداردى دەنە مادەنيەتىنە, سالاۋاتتى ءومىر سالتىن ۇستانۋعا بالا جاستان تاربيەلەۋىمىز كەرەك, – دەيدى استانا قالاسى تۋريزم, دەنە تاربيەسى جانە سپورت باسقارماسى بۇقارالىق ساۋىقتىرۋ, دەنەشىنىقتىرۋ ءبولىمىنىڭ جەتەكشىسى ءاليا جاقسىلىق.
قاراپايىم تىلمەن ايتقاندا, بۇل سپورت شاراسىنا قاتىسۋشىعا جاس شەكتەۋى قويىلمايدى. ەكىنشىدەن, فۋنكتسيونالدىق جاتتىعۋلار وتە وڭاي ءارى دەنە سەرگىتەتىن قيمىلداردان قۇرالعان ءارى فۋنكتسيونالدىق ترەنينگ بويىنشا «Worid Class» فيتنەس ورتالىعىنىڭ ماماندارى حالىققا قىزمەت كورسەتەدى. ءۇشىنشىدەن, بۇل شارانى كەز كەلگەن جەردە وتكىزە بەرۋگە بولادى. بار كەرەگى – كوڭىلدى مۋزىكا, قاتىسۋشىلاردى باسقارىپ, قانداي دەنە قيمىلدارىن جاساۋ كەرەكتىگىن كورسەتىپ تۇراتىن تالىمگەر جانە ىنتا. شارا باستالىسىمەن اينالاسى جارتى ساعات ىشىندە ەسىل جاعاسىندا سەرۋەندەپ جۇرگەن جاستار مەن جۇگىرۋگە شىققان سپورتسۇيەر قاۋىم قاتارعا قوسىلدى. ءناتيجەسىندە, الاڭ جاستارعا تولىپ, مۇنداي جاتتىعۋلارعا حالىقتىڭ قىزىعۋشىلىعى بار ەكەندىگىنىڭ كۋاسى بولىپ قايتتىق.
ۇلتتىق سپورت تۇرلەرى جانە بۇقارالىق ساۋىقتىرۋ, دەنەشىنىقتىرۋ كلۋبىنىڭ ديرەكتورى الماس پوشانوۆ تا شارانىڭ جىلدان جىلعا اۋقىمى كەڭىپ كەلە جاتقانىن ايتادى. ءماسەلەن, بىلتىرعى جىلى 1000-عا جۋىق ادام قاتىسقان فۋنكتسيونالدىق جاتتىعۋ جيىنى ۇيىمداستىرىلىپتى. بيىلعى ماۋسىمدا دا وسىنداي شارالار جوسپاردا بار كورىنەدى.
ءبىر ايتا كەتەرلىگى, بۇل شارا العاش رەت استانا قالاسىندا قولعا الىنىپتى. ۇيىمداستىرۋشىلار بۇنى «جاڭعىرعان ەسكى» دەپ تە اتايدى ەكەن. سەبەبى, اپتالىق جاتتىعۋ شارالارى بۇرىن وتكىزىپ كەلگەن. بۇگىنگى تاڭدا قازاقستاننىڭ باسقا دا قالالارىندا وسىنداي جاتتىعۋ جيىندارىن وتكىزۋ جاندانا باستاپتى. سوندىقتان, ەلوردادان باستالعان يگى باستاما بولاشاقتا ەلىمىزدىڭ بارلىق قالالارىن قامتيدى دەۋگە تولىق نەگىز بار.
ەندى دەرەككە كوشەيىك, فۋنكتسيو-نالدى جاتتىعۋلارعا العاش باستالعان 2011 جىلى 6500-دەي ادام قاتىسسا, 2012 جىلعى ماۋسىمدا بۇل كورسەتكىش 9700-گە دەيىن جەتكەن. ال, بيىلعى ماۋسىم 20 اپتادان تۇرادى. ياعني, 20 اپتا بويى ءاربىر جۇما كۇنى ساعات 19:00 مەن 20:00 اراسىندا ەلوردالىقتاردىڭ فۋنكتسيونالدى جاتتىعۋلارعا قاتىسۋىنا مۇمكىندىك بار.
ەربول جانات