قالا كۇنى «جاستار» سارايى الاڭىندا ءتورت مىڭ ادامنىڭ قاتىسۋىمەن شەرۋ ءوتتى. بۇل – جاي شەرۋ ەمەس, سالتاناتتى شەرۋ. ساپ تۇزەگەن شەرۋشىلەردى ۇرمەلى اسپاپتار وركەسترى باستاپ ءجۇردى.
بيىل استانا تويىنا تۇڭعىش رەت تۇركيانىڭ «مەحتەر» اسكەري-ەتنيكالىق ۇرمەلى اسپاپتار وركەسترى كەلدى. الەمدەگى ەڭ ەجەلگى اسكەري وركەستر قالا كوشەلەرىندە كەرنەيلەتىپ, پاتريوتتىق اۋەندەرىن پاش ەتتى. بۇدان بولەك, قورعانىس مينيسترلىگىنىڭ, ىشكى ىستەر مينيسترلىگىنىڭ اسكەري وركەسترلەرى دە قاتىستى. ارنايى ساحنامەن جاساقتالعان ءۇش كولىك استانالىقتاردىڭ نازارىن بىردەن اۋداردى. حالىق ءار كولىكتە ساحنالانعان كورىنىستەردى, ءان-ءبيدى تاماشالادى. ساپتاعى مۋزىكانتتار ءبىر-بىرىنە كەدەرگى كەلتىرمەس ءۇشىن ءجۇز مەتر ارا قاشىقتىقتى ساقتاپ ءجۇردى. ءبىرىنشى كولىكتە شوۋ-بيزنەس وكىلدەرى شوعىرلانسا, ەلىمىزدىڭ سپورتشىلارى مەن ەسترادا جۇلدىزدارى ەكىنشى كولىككە جايعاسقان. ولار جول بويى پاتريوتتىق اندەر شىرقاپ, ەلوردالىقتارعا مەرەكەلىك كوڭىل كۇي سىيلادى. شەرۋدىڭ ءۇشىنشى لەگى – يننوۆاتسيالىق توپ. ءار توپتىڭ وزىندىك ءتۇسى بار. ءۇش كولىكتىڭ سوڭىنان مىڭداعان جاياۋ جۇرگىنشىلەر ەردى. سالتاناتتى شەرۋ رەسپۋبليكا داڭعىلىن بويلاپ, «سامال» ىقشام اۋدانىنا ايالدادى. جاستار وسى جەردە فلەش-موب وتكىزدى. ءارى قاراي شەرۋشىلەر مەملەكەتتىك رامىزدەر الاڭىنا جەتتى. اشىق اسپان استىندا رۋح تەربەتەتىن اندەرىن قالىقتاتقان شەرۋشىلەر قابانباي باتىر داڭعىلىن ءجۇرىپ وتىرىپ, قوناەۆ كوشەسىنە ءتۇستى. ال, سوڭعى بەكەت «بايتەرەك» مونۋمەنتى بولدى. وسى ارادا حالىق ونەر ادامدارىمەن جۇزبە-ءجۇز كەزدەسىپ, تىلدەسۋگە مۇمكىندىك الدى. سالتاناتتى شارا وتاندىق جۇلدىزداردىڭ قاتىسۋىمەن مەرەكەلىك كونتسەرتكە ۇلاستى. كەش سوڭىندا اسپانعا ون بەس مىڭ شار ۇشىرىلدى.
اينۇر قارامەنديەۆا
