ءمىنايدار بورانباەۆ 1926 جىلى 10 مامىردا دۇنيەگە كەلگەن. ول – قوستاناي وبلىسى, امانگەلدى اۋدانىنىڭ تۋماسى. ۇلى وتان سوعىسى باستالعاندا ءالى بۋىنى بەكىمەگەن بوزبالا بولاتىن. تىلداعى اۋىر جۇمىستىڭ ايەلدەر مەن جاسوسپىرىمدەردىڭ موينىنا ارتىلعان اۋىر كەزىن باستان كەشىرگەن. بىراق سوعان قاراماستان 1944 جىلى جاسىن ۇلعايتىپ جازدىرتىپ, 17 جاسىندا ءوز ەركىمەن سوعىسقا كەتەدى. جىلعا جۋىق سوعىسىپ, ۇلى جەڭىستىڭ تۋىن جەلبىرەتىپ ەلگە ورالعان جەڭىمپاز ساربازدىڭ ءبىرى اتاندى.
العاش قولعا قارۋ ۇستاي سالا بىردەن ءىى بەلورۋس مايدانىنىڭ 6 گۆارديا ارمياسى قۇرامىنداعى جاۋجۇرەك جاۋىنگەرلەردىڭ قاتارىنا قوسىلادى. التى اي ىشىندە نەمىستەردى تىقسىرا قۋىپ, بەلورۋسسيانىڭ بەلوستوك ايماعىنان پولشانىڭ جەرىنە اياق باسادى. ودرا وزەنىنىڭ ساعاسىن بويلاي ءجۇرىپ سوعىسادى. ءسويتىپ, نەمىستەردىڭ شتەتتەن دەگەن قالاسىنا جەتە بەرە سويقان ۇرىس سالادى. درەزدەندى ازات ەتۋگە قاتىسادى. ەكىنشى دۇنيەجۇزىلىك سوعىستا درەزدەن بۇتىندەي قيراعان قالالاردىڭ بىرىنەن سانالعان. الايدا قازىر كۇللى ساكسون مەملەكەتتىك كىتاپحاناسى ورنالاسقان كەرەمەت دامىعان ۇلكەن قالالاردىڭ بىرىنە اينالعان.
ءسويتىپ, ءمىنايدار اتا بالتىق تەڭىزى جاعالاۋىنداعى روستوك دەگەن پورتتى قالانى باسقىنشى فاشيس-تەردەن ازات ەتۋشىلەر قاتارىندا دا بولعان. نەمىستىڭ وكشەلەي قۋىپ كەلە جاتقان كەڭەستەر ارمياسى پورت ارقىلى اعىلشىندارعا قاشپاقشى بولعان نەمىس سولداتتارىنىڭ الدىن الىپ, تۇتقىنداپ وتىردى. سول جەردە 1945 جىلى 8 مامىر كۇنى گەنەرال ك.روكوسسوۆسكي باستاعان ارميا ماقتانىشتارى جەڭىس پارادىن وتكىزەدى. ءمىنايدار اتا سول پارادقا قاتىسۋشى كوپ سولداتتىڭ ءبىرى بولىپتى. سوعىس بىتكەنشە قاتارداعى جاۋىنگەر م.بورانباەۆ اعا سەرجانتتىققا دەيىن وسكەن. ول ءى ساناتتاعى راديست-بايلانىسشى بولدى. قازىرگى تاڭدا دا ۇمىتىلا قويماعان «مورزە الىپپەسىنىڭ» جەتىك مامانى. سوعىس بىتكەن سوڭ ولاردى كاۆكاز اسكەري وكرۋگىنە جىبەرەدى. سول جەردە بەس جىلعا جۋىق اسكەري قىزمەتىن وتەيدى. راديوبايلانىستىڭ باستىعى بولىپ ەلگە ورالعان. ەلگە كەلىسىمەن سوعىستان كەيىن قاڭىراپ قالعان اۋىل مەن قالالاردى قايتا تۇرعىزۋ جۇمىستارىنا بەلسەنە اتسالىسادى. ءوزى وقي ءجۇرىپ, وتباسىن قۇرادى. ارقالىق قالاسىندا كوپ جىلدار بويى مەكتەپ ديرەكتورى قىزمەتىن اتقارعان ارداقتى ۇستاز. كەيىن ارقالىق اۋىلدىق پارتكومى بولادى. يدەولوگيا جونىندەگى حاتشى قىزمەتىن دە ىستەگەن. ودان دا باسقا كوپتەگەن جاۋاپكەرشىلىگى مول قىزمەتتەردى اتقارا ءجۇرىپ, زەينەتكە شىققان. «اسكەري ەرلىگى ءۇشىن» مەدالى, «ۇلى وتان سوعىسىنىڭ ارداگەرى» وردەنى, «گەرمانيا ازات ەتۋ» مەدالى, «قۇرمەت» وردەنى, «ەرەن ەڭبەگى ءۇشىن» مەدالىمەن جانە تاعى دا باسقا وتىزعا تارتا ماراپاتتارى بار ەكەن. ءسۇيىپ قوسىلعان جارى الما اپا ەكەۋى 60 جىل بىرگە قول ۇستاسىپ ءومىر ءسۇرىپ كەلەدى. قول ۇستاسىپ ءومىر كەشكەن قوس ۇستاز ءومىر ايدىنىنا بىرنەشە بۋىن قازاق بالالارىن تاربيەلەپ ۇشىردى. جەتى بالا ءوسىرىپ, نەمەرە-شوبەرە ءسۇيىپ وتىرعان اقساقال ارقالىق قالاسىنىڭ قۇرمەتتى ازاماتى.
جاسى 86-عا قاراعان اتامىزدىڭ وسكەلەڭ ۇرپاق الدىندا جاساعان ەرەن ەرلىگى ەشقاشان حالىق جادىنان وشپەيدى. ونىڭ جالىندى جاستىعى ءومىر ءۇشىن كۇرەسپەن وتسە, بۇگىنگى ەگەمەن ەلدىڭ ۇلاندارى دەگدار تەكتى اتالار اماناتىن ارقالاپ ءومىر سۇرەدى.
شىنار ءابىلدا
