ۇلتتىق وتباسىلىق قۇندىلىقتارىمىزدى دارىپتەيتىن «مەرەيلى وتباسى» سايىسىنا قاتىسۋعا تىلەك بىلدىرۋشىلەردىڭ سانى ارتىپ كەلەدى. سونىڭ اراسىندا دارىگەرلەردىڭ, تەمىرجولشىلار مەن سپورتشىلاردىڭ اۋلەتتەرىمەن بىرگە وسكەلەڭ ۇرپاقتىڭ تاربيەسىنە اتسالىسىپ ەرەكشە جۇرگەن ازاماتتىڭ وتباسى بار. ول – نۇرسۇلتان مەن گۇلشات تولەۋوۆتەردىڭ شاڭىراعى. نۇرسۇلتان ورتا مەكتەپتە تەحنولوگيا مەن سىزۋدان ساباق بەرسە, گۇلشات – قازاق ءتىلى مەن ادەبيەتىنىڭ مامانى. ەرجەتىپ قالعان ۇلىنىڭ ەكەۋى دە وقۋ وزاتتارى. اكە قولىنىڭ شەبەرلىگى ەكى ۇلدىڭ دا بويىنا بىتكەن. ودان قالدى, «سپورتتان دا الاتىنىمىز بار» دەپ جۇرگەن جالىندى جەتكىنشەكتەر ەكەن. ەكى جاسار نۇراي اعالارىنىڭ سۇيكىمدى قارىنداسى, اتا-انالارىنىڭ قۋانىشى بولىپ ءوسىپ كەلەدى.
گۇلشات پەن نۇرسۇلتان وتباسىندا بۇزىلمايتىن ءداستۇر بار. كەشكىسىن ءبارى باس قوسىپ, كۇنى بويى اتقارعان ىستەرى مەن بولعان ۋاقيعالاردى تالداپ وتىرۋدى ادەت ەتكەن. ءاربىر كەشتە ۇلدارى اقتارىلا سويلەپ, ويلارىن بۇكپەي ايتىپ, العان اسەرلەرىمەن ءبولىسىپ وتىرادى. وندا تۇرعان نە دەرسىز؟! الايدا, وسىلايشا اشىلا سويلەسكەن سايىن ارالارىندا سىيلاستىق پەن سەنىم ورنايدى. بالالارىنىڭ دوستارى كىم ەكەنىن دە بىلمەيتىن اتا-انالار ءۇشىن بۇل ۇلكەن ونەگە دەر ەدىم.
جالپى, قازاق وتباسىندا اكەنىڭ ورنى بولەك. اسىرەسە, قازىرگى بالالار ءۇشىن اكە – قول جەتپەس اسقار تاۋ ەمەس, قينالعاندا قول ۇشىن بەرەتىن, اقىلىمەن جول كورسەتىپ, جەتىستىكتەرى ءۇشىن ارقاسىنان قاعىپ, ارمانىنا قانات بىتىرەتىن جاقىن جاناشىرى بولۋى كەرەك. نۇرسۇلتان – تەك قوس ۇلىنىڭ عانا ەمەس, مەكتەپتەگى ءجاسوسپىرىمدەردىڭ دە سەنىم ارتاتىن ارداقتى ۇستازى.
– وتباسىندا بالا تاربيەلەۋدەگى تاجىريبەمدى ءجيى قولدانامىن. ال, جۇمىستىڭ تۇيتكىلدەرىن ەسىكتىڭ سىرتىندا قالدىرۋعا تىرىسامىز. مەكتەپتەن تىس ۋاقىتىمىز وزىمىزگە, قوس قولقاناتىمىز بەن قىزىمىزعا ارنالۋى كەرەك. وتباسىندا قانداي شەشىم قابىلدايتىن بولساق تا ۇلدارىمىزبەن كەڭەسىپ, پىكىرلەرىن ەسكەرەمىز. جالپى, بالا تاربيەلەۋدىڭ قۇپياسى بىرەۋ عانا: ولاردى مىنا قوعامنىڭ ءبىر مۇشەسى رەتىندە باعالاپ, تىڭداي ءبىلۋ كەرەك, – دەيدى وتاناسى گۇلشات.
ارقالىق پەداگوگيكالىق ينستيتۋتىنىڭ تۇلەكتەرى نۇرسۇلتان مەن گۇلشاتتىڭ تۇڭعىشتارى اناسىنىڭ ديپلوم العان كۇنىنىڭ ەرتەسىنە دۇنيەگە كەلگەن ەكەن. نۇرسۇلتاننىڭ اتا-اناسى ەرتەرەك قايتىس بولعاندىقتان, تۇڭعىشتارىن اڭساعان دەپ اتايدى. تولەۋوۆتەر وتباسىنىڭ باسپانالى بولىپ, قونىس تويى شىلدەحاناعا ۇلاسۋىنا سەبەپكەر بولعان ەكىنشى ۇلى – سامات. ال, ەلىمىزدىڭ تاۋەلسىزدىگى كۇنى – 16 جەلتوقساندا دۇنيە كەلگەن نۇرايدىڭ تۋعان كۇنى – بارلىعى ءۇشىن ەرەكشە داتا. سەبەبى, جاس وتباسى ارمانى مەن ءۇمىتىن ەلىمىزدىڭ بولاشاعىمەن بايلانىستىرادى. قازاقستاننىڭ لايقاتتى ازاماتىن تاربيەلەۋدى نۇرسۇلتان مەن گۇلشات مەرەيلى مىندەتىمىز دەپ سانايدى.
ازىرگە اڭساعان مەن سامات وتباسىنىڭ دا, مەكتەبىنىڭ دە ماقتانىشى بولىپ ءوسىپ كەلەدى. قالادا بولىپ جاتاتىن قوعامدىق جۇمىستاردىڭ بەل ورتاسىندا جۇرەدى. جاقىندا رەسپۋبليكالىق «ەكسپو-2017» بايگە-كورمەسىندە 3-ورىندى يەلەندى. ولار بايقاۋعا ويلاپ تاپقان قوقىس وڭدەۋ زاۋىتىنىڭ جوباسىن ۇسىنعان ەدى. قازىلار القاسى بالا قيالدان شىققان ۇزدىك جوبانى تۇركيادا وتەتىن جارىستىڭ ەكىنشى كەزەڭىنە جىبەرۋ كەرەك دەپ شەشتى.
– ۇلدارىمىز – ءبىزدىڭ ماقتانىشىمىز. ولار مەيىرىمدى, اقىلدى جانە كوپشىل بولىپ ءوسىپ كەلەدى. «ۇيادا نە كورسەڭ, ۇشقاندا سونى ىلەسىڭ» دەگەن ءسوز بار عوي. وتباسىندا ەڭبەككە توسەلىپ, جاقسىلىق پەن جاماندىقتى اجىراتا بىلگەن بالا ءومىردىڭ شيىر دا شىتىرمان جولىندا اداسپايدى. وتباسىنىڭ شۋاعىن وزدەرىمەن بىرگە الىپ جۇرەتىن بولادى, – دەيدى نۇرسۇلتان.
شاڭىراعى بيىك, بوساعاسى بەرىك تولەۋوۆتەر وتباسى مۇشەلەرى مىڭداعان ەلوردالىقتاي تاڭ اتسا, ءبىرى – قىزمەتىنە, ءبىرى – وقۋىنا, كەش باتسا, ۇيىنە اسىعادى. ءار كەش سايىن ساعىنىپ كەزدەسكەندەي شۇيىركەلەسىپ جاتقانى. كىشىلەرى – ۇلكەندەرىن, ۇلكەندەرى كىشىلەرىن قۋانتىپ, جاقسى جاڭالىقتارىمەن ءبىرىنشى بولىپ بولىسكىسى كەلەدى. ولاردىڭ اڭگىمەلەرىنەن ءبىر-بىرىنە دەگەن قۇرمەت, سىيلاستىق پەن سۇيىسپەنشىلىك ەسىلىپ تۇرادى. تولەۋوۆتەر وتباسىنىڭ وزگەلەردەن ونەگەسىن ارتتىرىپ تۇراتىنى دا وسى ەرەكشەلىگى بولسا كەرەك.
ايگۇل ۋايسوۆا
