قازىر جەر-جەردە ۇلى جەڭىستىڭ 70 جىلدىعىنا بايلانىستى ءتۇرلى شارالار ءوتىپ جاتىر. بۇدان كۇندەلىكتى ءوزىم جازدىرىپ وقيتىن «استانا اقشامى» گازەتى دە قالىس قالماي وتىر. سونىڭ ءبىر دالەلى – «ۇلى جەڭىسكە – 70 جىل» ايدارىمەن بەرىلىپ جاتقان ماقالالار لەگى. مەن دە ارداگەر مۇحامەدجان اتام تۋرالى جازباققا قولىما قالام الدىم.
مەنىڭ ناعاشى اتام مۇحامەدجان وماروۆ ۇلى وتان سوعىسىنا باستان اياق قاتىسقان. ەكىنشى بەلورۋسسيا مايدانىندا بولعان.
«بەرلينگە 100 شاقىرىم قالعاندا سۇم فاشيستەردى جەڭدىك دەگەن قۋانىشتى حابار كەلدى. ول اق تۇيەنىڭ قارنى جارىلعان كۇن ەدى. ادام قۋانىشتان دا جىلايتىنىن سوندا كوردىم. بەس جىل وق پەن وتتىڭ ورتاسىندا جۇرگەن, نەبىر اۋىر كۇندەردى وتكىزگەن كەز ارتتا قالدى. ايتەۋىر, قۇداي قولداپ, ەلگە امان-ەسەن ورالدىق قوي» دەپ باستايتىن اڭگىمەسىن مايدانگەر اتام.
ول سوعىسقا دەيىن ءوز اۋىلىنىڭ قىزى تازاگۇل بەگىبايقىزىمەن باس قۇرايدى. ەكەۋى ەكى ۇل, ءبىر قىز سۇيەدى. اتام 1995 جىلى 91 جاسقا كەلىپ, دۇنيەدەن ءوتتى. ول كىسىنىڭ الدىندا ۇلكەن ۇلى جۇمابايدىڭ جارى باعدات قايتادى. بۇل جاعداي قارت ادامعا اۋىر سوققى بولدى. ويتكەنى, ولاردىڭ بەس بالاسىنىڭ ەشقايسىسى دا ءالى اياقتانباعان ەدى. ودان كەيىن جۇماباي مەن ەكىنشى ۇلى قابدىراحيم الپىسقا جەتپەي, جۇرەك دەرتىنەن كوز جۇمادى. بۇگىندە ولاردىڭ بالالارى ءار سالادا قىزمەت اتقارادى. جالعىز قىزى گاۋھار استانا قالاسىندا تۇرادى.
اتام سوعىستان كەلگەننەن كەيىن سول كەزدەگى تسەلينوگراد قالاسىنداعى №1 ۇن تارتۋ كومبيناتىندا شيرەك عاسىردان استام ەڭبەك ەتتى. تابىستى جۇمىس اتقارىپ, زەينەت جاسىنا جەتكەندە دەمالىسقا شىقتى. العان ماقتاۋ قاعازدارى مەن ماراپاتتارى جەتكىلىكتى. اتامنىڭ قىزى, مەنىڭ انام گاۋھار بالالارى مەن نەمەرەلەرىنە اكەسىنىڭ, ياعني, مەنىڭ ناعاشى اتامنىڭ قانداي ادام بولعاندىعىن ۇنەمى ايتىپ وتىرادى.
قاشاندا بىرەۋگە جاقسىلىق جاساعىسى كەلىپ تۇراتىن مايدانگەر اتامنىڭ نەمەرەسى بولعانىمدى ماقتان تۇتامىن.
اسىلحان ءابىلدينوۆ
