وقۋشىلار سارايىندا تۇڭعىش پرەزيدەنت كۇنىنە وراي ءبىلىم باسقارماسىنىڭ قولداۋىمەن «كوشباسشى- 2014» بايقاۋى ءوتتى.
جىل سايىن ءداستۇرلى تۇردە ءوتكىزىلىپ جۇرگەن بۇل سايىسقا باعىن سىناۋ ءۇشىن 70-تەن اسا وقۋشى ۇسىنىس بىلدىرگەن. سولاردىڭ ىشىنەن تەست سۇراقتارى مەن ەسسە جازۋ كونكۋرسى بويىنشا ىرىكتەلىپ شىققان 15 تالاپكەر اقتىق كەزەڭدە ءوز ونەرلەرىن ورتاعا سالدى. اتالعان ءىس-شاراعا ءبىلىم جانە عىلىم سالاسىنىڭ ماماندارى, زيالى قاۋىم وكىلدەرى مەن بۇقارالىق اقپارات قۇرالدارى قاتىستى. العاشقى ءسوز كەزەگىن العان رەسپۋبليكالىق «دارىن» عىلىمي-پراكتيكالىق ورتالىعىنىڭ ديرەكتورى شولپان قيراباەۆا: «ەلىمىزدىڭ ەرتەڭى كەمەلدى, بولاشاعى ورەلى بولۋ ءۇشىن ءار وقۋشىنىڭ ينتەللەكتۋال بولۋى قاجەت. ەلباسى جولداۋىن ناسيحاتتاۋ ءۇشىن وتكىزىلىپ وتىرعان شارانىڭ وقۋشىلارعا بەرەرى كوپ دەپ ەسەپتەيمىز» دەگەن پىكىرى ارقىلى قاتىسۋشىلاردى جىگەرلەندىردى. سودان كەيىن ۇلىبريتانيا جەرىندە ءبىلىم الىپ, تاجىريبە الماسۋ ءۇشىن بەرىلەتىن جولدامانى جەڭىپ العان وتكەن جىلدىڭ كوشباسشىسى نازگۇل دۇيسەمبەك قاتىسۋشىلارعا ساتتىلىك تىلەدى. ءتورت تۋردان تۇراتىن ءبىلىم باسەكەسىندە ءار وقۋشى ءوزىنىڭ وي ۇشقىرلىعى مەن اقىل تەرەڭدىگىن تانىتتى. كورەرمەندەر زالىندا ينە شانشار جەر قالمادى. ءار مەكتەپتەن دوستارىنا جانكۇيەر رەتىندە كەلگەن وقۋشىلار قولداۋلارىن ايامادى. سايىسكەرلەرگە بەرىلگەن سۇراققا وڭاي جاۋاپ بەرىپ وتىرعان جاس كورەرمەندەردى دە بايقادىق. وسى شارانىڭ ۇيىمداستىرۋشىلارى بولىپ تابىلاتىن «استانا دارىنى» وڭىرلىك-عىلىمي پراكتيكالىق ورتالىعىنىڭ ديرەكتورى مايرا يمانباەۆا: «بىلتىر بۇل باسەكەگە 10 وقۋشى قاتىسسا, بيىل 15 وقۋشى كەلىپ وتىر. كوشباسشى بولسام, ءبىلىمىمدى دالەلدەسەم دەگەن وقۋشىلار قاتارى جىل سايىن ارتىپ كەلەدى. پرەزيدەنت كۇنىن ەرەكشە ۇمىتپەن كۇتۋ ۇردىسكە اينالعان. كەلەسى جىلى ۇمىتكەرلەردىڭ قاتىسۋ مۇمكىندىگىن ارتتىرۋ ءۇشىن دودانىڭ فورماتىن وزگەرتۋ كەرەك» دەيدى. قازىلاردىڭ شەشىمى بويىنشا كوپ ۇپاي جيناعان №66 مەكتەپ-ليتسەيدىڭ وقۋشىسى كەجەنەۆا بايان بايقاۋدىڭ گران-پري يەگەرى اتاندى. قاتىسۋشىلاردىڭ بارلىعىنا ماقتاۋ قاعازدارى مەن باعالى سىيلىقتار تابىستالدى.
باعلان ورازالى
