ەلوردا اكىمدىگىنىڭ رەسپۋبليكاعا تاراتاتىن بىردەن-ءبىر قازاق ءتىلدى باسىلىمى – «استانا اقشامى» گازەتىنە جيىرما بەس جىل تولىپ وتىر. وسى شيرەك عاسىر ىشىندە ول ءوسۋ-وركەندەۋ كەزەڭدەرىنەن ءوتىپ, قالانىڭ تىنىس-تىرشىلىگىن, العان اسۋلارى مەن جەتكەن جەتىستىكتەرىن قالىڭ بۇقاراعا مازمۇنى بايىعان, ويى كەمەلدەنگەن جۇيەلى جەتكىزۋشى باسىلىمعا اينالدى.
بۇگىندە ساياسي, تاريحي, تانىمدىق ماقالالار قاتارى كوبەيىپ, مادەني-رۋحاني دۇنيەلەرىمەن وقىرماندارىن ءسۇيسىندىرىپ كەلە جاتقان گازەتتىڭ قالىپتاسۋ جىلدارىنا كوز جۇگىرتسەك, 1990 جىلدىڭ 13 قازانىنان باستاپ العاشىندا «اقمولا اقيقاتى» دەگەن اتپەن اپتاسىنا ءبىر رەت جارىق كورگەن باسىلىم 1998 جىلدىڭ قاڭتارىندا – «اقمولا اقشامى» كەيىن «استانا اقشامى» بولىپ, رەسپۋبليكالىق قوعامدىق-ساياسي گازەت مارتەبەسىنە يە بولدى.
پاتشا كوڭىلدى وقىرماننىڭ ۇدايى ۇدەسىنەن شىعۋعا ۇمتىلاتىن باسىلىمنىڭ قول جەتكىزگەن جەتىستىكتەرى دە ءبىر توبە. سونىڭ ءبىر دالەلى – 2002 جىلى «استانا اقشامى» گازەتى قازاقستان جۋرناليستيكا اكادەمياسىنىڭ «التىن جۇلدىز» سىيلىعىنىڭ لاۋرەاتى اتاندى. بىرنەشە ءجۋرناليسى حالىقارالىق جانە رەسپۋبليكالىق كونكۋرستاردىڭ لاۋرەاتى بولدى.
وسى جىلداردا گازەتتىڭ تانىمالدىعى ارتىپ, تارالىمى كوبەيدى. وعان ۇجىمدا ءار جىلداردا ەڭبەك ەتكەن بۇگىنگى قازاقستان رەسپۋبليكاسى پارلامەنتى ءماجىلىسىنىڭ دەپۋتاتى الدان سمايىل, «ەگەمەن قازاقستان» گازەتىنىڭ باس رەداكتورى, بەلگىلى جۋرناليست جانبولات اۋپباەۆ, «تۇركىستان» گازەتى باس رەداكتورىنىڭ ورىنباسارى, جازۋشى ديداحمەت ءاشىمحانۇلى, قر پرەزيدەنتتىڭ ءباسپاسوز حاتشىسىنىڭ ورىنباسارى, بەلگىلى جۋرناليست, فيلولوگيا عىلىمدارىنىڭ دوكتورى باۋىرجان ومارۇلى, «قازاقستان» ۇلتتىق تەلەراديوكورپوراتسياسىنىڭ ۆيتسە-پرەزيدەنتى عالىم ومارحانوۆ سياقتى ەلىمىزگە كەڭىنەن تانىمال ازاماتتاردىڭ ىقپالى از بولعان جوق.
سونداي-اق, گازەتتى ءار جىلدارى باسقارعان كەنجە جۇماعۇلوۆ, جۇماگۇل ساۋحات, ماعجان سادىحانوۆ, نۇرتورە ءجۇسىپ, امانتاي ءشارىپ, ەربولات قامەنوۆ سياقتى باس رەداكتورلاردىڭ دا ەڭبەگى ءبىر توبە.
اقپارات كەڭەستىگىندە وزىندىك سالماعى بار باس قالانىڭ ايناسى ىسپەتتى باسىلىم قازىر جاڭا قۇرىلىمدىق وزگەرىستەرمەن قاتار, شىعارماشىلىق ىزدەنىستەرمەن بولاشاققا جاڭا مىندەتتەر بەلگىلەپ وتىر. تاريح ءۇشىن جيىرما بەس جىل كوپ ۋاقىت بولماۋى مۇمكىن, الايدا, مەملەكەت ساياساتىن جۇزەگە اسىرۋدا باس قالانىڭ كەسكىن-كەلبەتىن, تۇرعىندارىنىڭ تۇرمىس-تىرشىلىگىن بۇقاراعا بۇكپەسىز جەتكىزۋدە ايانباي تەر توگىپ جۇرگەن شىعارماشىلىق ۇجىم ءۇشىن جاڭا ءبىر بەلەس بولماق. مىنە, ءار قىزمەتكەر بويىنداعى بارىن سارقا جۇمساپ, وسى تىڭ بەلەستى ابىرويمەن باعىندىرا بەرۋگە تالپىنۋدا.
