جاڭالىقتار

ورمان شارۋاشىلىعىن وڭتايلاندىرادى

DSC_0887-(1)

ءوسۋىن توقتاتقان ورمانداردى قالپىنا كەلتىرۋ جانە قايتا وتىرعىزۋ ارقىلى جاڭارتۋ ماسەلەسى بۇگىندە تەك قازاقستاندىق عالىمداردى عانا ەمەس, كۇللى الەم وقىمىستىلارىن ويلاندىرۋدا. ءدال وسى ماسەلە سەيسەنبى كۇنى س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە وتكەن حالىقارالىق فورۋمعا ارقاۋ بولدى.

تۇركيانىڭ كاستامونۋ ۋنيۆەر­سيتەتى مەن استاناداعى قازاق اگرو­تەحنيكالىق ۋنيۆەرسيتەتى بىرلەسىپ ۇيىمداستىرعان بۇل شاراعا الەمنىڭ 15 مەملەكەتىنەن, اتاپ ايتساق, تۇركيا, رەسەي, پولشا, يتاليا, گەرمانيا, چەحيا, سلوۆاكيا, ماروككو, ازەربايجان, قىرعىزستان, وزبەكستان, گرۋزيا, يران, نيگەريا مەن قازاقستاننان 140-تان استام عالىمدار مەن ماماندار قاتىستى.
شارا بارىسىندا قازاتۋ رەكتورى اقىلبەك كۇرىشباەۆ ءسوز سويلەپ, ءبىزدىڭ ەل تەك ءوسۋىن توقتاتقان ورمانداردى قالپىنا كەلتىرۋمەن اينالىسىپ قانا قويمايتىنىن, سونىمەن بىرگە قازاقستان اعاش ەگىپ, جاڭا ورمان القاپتارىن دا وسىرەتىنىن العا تارتتى.
«ەلباسىنىڭ تىكەلەي باقىلاۋىمەن استانانىڭ توڭىرەگىندە عاجايىپ استانا ورمانى «جاسىل بەلدەۋى» بوي كوتەردى. وسىدان 10-15 جىل بۇرىن استانا اۋماعى بوس جاتقان سارى دالا بولسا, قازىرگى تاڭدا بۇل ايماقتى 73 000 گا ورمان القاپتارى الىپ جاتىر» دەدى رەكتور. بۇل ماسەلە مەملەكەت باسشىسىنىڭ نازارىنان تىس قالىپ كورگەن ەمەس. يندۋستريالاندىرۋ باعدارلامالارى شەڭبەرىندە عىلىمنىڭ ەكونوميكا سالالارىمەن جانە ماماندار دايىنداۋمەن اينالىساتىن ون جوعارى وقۋ ورنى انىقتالعانىن ايتا كەلە, ەلباسى وسى ماقساتتارعا 2017 جىلعا دەيىن 10 ميلليارد تەڭگە باعىتتاي وتىرىپ, ولاردىڭ ماتەريالدىق-تەحنيكالىق بازاسىن قالىپتاستىرۋدى تاپسىرعان بولاتىن.
قازاتۋ-ءدىڭ «ورمان رەسۋرستارى جəنە ورمان شارۋاشىلىعى» كافەدراسىنىڭ اعا وقىتۋشىسى, گەوگرافيا عىلىمىنىڭ كانديداتى نۇرگۇل قازانعاپوۆا وسى ماسەلە جونىندە اڭگىمەلەدى. ونىڭ ايتۋىنشا, ورمان شارۋاشىلىعى – قازاتۋ-دە قارقىنداپ دامىپ كەلە جاتقان بىردەن-ءبىر باعىت. 2006 جىلدان بەرى ءبىلىم مەن عىلىمدى بىرىكتىرە وتىرىپ وسى باعىتتا ماماندار دايىن­داپ, ەلىمىزدەگى سالالىق عىلىمي ور­تالىق قازاق ورمان شارۋاشىلىعى جانە اگرومەليوراتسيالاۋ عىلىمي-زەرتتەۋ ينستيتۋتىنىڭ تىكەلەي قول­داۋىمەن ششۋچينسك قالاسىندا «سارى-ارقا» مامانداندىرىلعان عىلىمي ورتالىعى ايماعى قۇرىلعان. العاشىندا ستۋدەنتتەر تەوريالىق پاندەردى استانا قالاسىندا وقىپ, كەيىن العان ءبىلىمىن ششۋچينسك قالا­سىندا تەرەڭدەتىلگەن تاجىريبە داع­دىسىمەن ۇشتاستىرعانىن تىلگە تيەك ەتكەن ن.قازانعاپوۆا وقۋ ۇردىسىنە زەرتحانا جانە عىلىمي-ەكسپەريمەنتالدى ينفراقۇرىلىمدى ينستيتۋت كىرىستىرىلگەنىن جەتكىزدى.
ودان سوڭ فورۋمعا قاتىسۋشىلار اتالمىش جوعارى وقۋ ورنىنىڭ اۋماعىنداعى ەسكەرتكىش اللەياعا 30-دان اسا قىلقان جاپىراقتى اعاشتار وتىرعىزدى. كەيىن ورمانداردىڭ ازۋى مەن ونى قالپىنا كەلتىرۋ مەحانيزمىن جەتىلدىرۋ جايىنداعى وزەكجاردى پىكىرلەرىمەن الماستى.

گۇلبارشىن وكەشقىزى

تاعىدا

ۇقساس جاڭالىقتار

پىكىر ۇستەۋ

Back to top button