بەيسەنبى كۇنى وقۋشىلار سارايىندا ەلوردا تىنىس-تىرشىلىگىنىڭ ايناسىنا اينالعان «استانا اقشامى» گازەتى وقىرماندارىمەن جۇزدەسىپ, كونتسەرت- اكتسيا وتكىزدى. شاراعا زيالى قاۋىم وكىلدەرى, استانالىق ارداگەرلەر مەن ەۋرازيا ۇلتتىق ۋنيۆەرسيتەتىنىڭ بولاشاق جۋرناليستەرى قاتىستى.
تەحنولوگيا مەن ينتەرنەت قارىشتاعان زاماندا ءسوزىنىڭ قادىرى كەتپەگەن مەرزىمدى باسىلىم ءۇشىن كوزى قاراقتى ءبىر وقىرمان ءجۇز وقىرمانعا تاتيدى. تاريحى تاۋەلسىزدىگىمىزبەن تۇستاس, شىعا باستاعانىنىنا 23 جىل بولعان «استانا اقشامى» دا وقىرمانىن باعالايتىن بايسالدى باسىلىمنىڭ ءبىرى. جيىندا ءسوز العان گازەتىمىزدىڭ باس رەداكتورى ەربولات قامەن كوپشىلىكتى گازەتتىڭ ارعى-بەرگى تاريحىنان حاباردار ەتتى.
گازەتىمىز ۇرپاقتار ساباقتاستىعىنىڭ ءجىبىن ۇزبەي, جۋرناليستەر ۇستاحاناسىمەن ۇدايى شىعارماشىلىق بايلانىس ورناتىپ كەلەدى. سونىڭ ءبىر دالەلى – بۇگىندە گازەتىمىزگە ارالاسىپ, ماقالا جازىپ جۇرگەن قابىلەتتى, شىعارماشىل ەكى ستۋدەنتكە ارناۋلى شاكىرتاقى تاعايىندالدى. اي سايىن 25 مىڭ تەڭگە ستەپەنديا سەرتيفيكاتىن ەۋرازيا ۇلتتىق ۋنيۆەرسيتەتىنىڭ 4-كۋرس ستۋدەنتى ەسبول سوتسيالحان مەن 3-كۋرس ستۋدەنتى ءمادينا جاقىپقا باسىلىمنىڭ بۇرىنعى باسشىلارى – بەلگىلى جۋرناليست كەنجە جۇماعۇلوۆ پەن فيلولوگيا عىلىمىنىڭ دوكتورى امانتاي ءشارىپ, باس رەداكتوردىڭ ءبىرىنشى ورىنباسارى تالعات باتىرحان اعالارى تابىستادى.
سونداي-اق, گازەتتىڭ وسىناۋ يگى باستاماسىن كوتەرمەلەۋ ءۇشىن توڭىرەگىنە توپتالعان اۆتورلاردىڭ اراسىنان مەملەكەتتىك سىيلىقتىڭ يەگەرى, جازۋشى, تۇركىتانۋشى انەس ساراي شىعىپ, شىعارماشىلىق بايلانىس ورناتقان باسىلىمعا اقساقالدىق باتاسىن بەردى.
باسپاسوزگە جازىلۋ ماۋسىمى باستالىسىمەن گازەتىمىزدە «ءتىل جاناشىرى – تىرەگىمىز» اتتى اكتسيا جاريالانعان ەدى. العاشقى بولىپ تىلدەردى دامىتۋ باسقارماسىنىڭ باسشىسى ەربول تىلەشوۆ تىلەۋلەستىك تانىتىپ, 30 شاقتى زيالى قاۋىم وكىلىن ءوز قاراجاتى ەسەبىنەن «استانا اقشامىن» جازدىرىپ بەردى. جيىندا ءسوز العان ول بارلىق وقىرمانداردى قازاق ءباسپاسوزىنىڭ دامۋىنا اتسالىسۋعا شاقىردى.
ايتا كەتۋ كەرەك, جوعارىداعى اكتسياعا ءۇن قوسقان دەمەۋشىلەردىڭ ارقاسىندا گازەتىمىزدى 300-گە جۋىق ارداگەر, كوپ بالالى وتباسىلار, الەۋمەتتىك جاعىنان از قامتىلعان, باسقا دا قالىڭ وقىرمانىمىز ءبىر جىلعا جازدىرىپ الاتىن بولدى. ماسەلەن, «شەۆرون» كومپانياسىنىڭ وكىلى نايليا ەسكەندىرقىزى ءوز سوزىندە 100 وقىرمانعا جازدىرتۋعا كومەك بەرەتىندىكتەرىن جەتكىزدى. وسىنداي تىلەۋلەستىك نيەتىن «استانا» حالىقارالىق اۋەجايىنىڭ اتىنان سويلەگەن ينسپەكتور ساۋلە ۇسەنوۆا, «الاش اماناتى» قوعامدىق قورىنىڭ ءتورايىمى قارلىعاش قوجامۇراتوۆا, كاسىپكەر ازامات ازات كارىم دە ءبىلدىردى.
شارانىڭ ەڭ قىزدىرمالى دا قىزىقتى تۇسى – وقىرماندار اراسىندا ۇيىمداستىرىلعان ۆيكتورينا بولدى. استانانىڭ ارعى-بەرگى تاريحىنا قاتىستى ساۋالدارعا دۇرىس جاۋاپ بەرگەن قاتىسۋشىلار اراسىنان ەڭ زەرەك اتانعان وقىرماندارعا ۇيالى تەلەفون, فوتواپپارات, شاڭسورعىش, شىرىن سىققىش سەكىلدى باعالى سىيلىقتار تارتۋ ەتىلدى. كوپشىلىگى گازەتكە ءبىر جىل تەگىن جازىلۋ سەرتيفيكاتىنا يە بولدى.
كەش كورىگىن جاس ونەرپازدار قىزدىردى. وقۋشىلار سارايىنىڭ «جەتىگەنشىلەر» توبى كۇي توگىلتتى, فيلارمونيا انشىلەرى جازگۇل دانىلباەۆا مەن راحات بەگاسىلوۆتار حالىق اندەرىن ناقىشىنا كەلتىرىپ ورىندادى. جاس دومبىراشى نۇرتورە مەن فلەيتادا ۇكىلى ىبىرايدىڭ «گاككۋىن» قۇيقىلجىتقان راحيليا قۇماروۆا كوپشىلىكتى ونەرىمەن ءتانتى ەتتى.
