باس قالادا جاسوسپىرىمدەر مەن ستۋدەنتتەرگە ارنالعان تەگىن كوۆوركينگ ورتالىعى اشىلدى.
كەڭىستىك 11 جىلدان بەرى جۇمىس ىستەپ كەلە جاتقان «زامانداس» وتباسىلىق اۋلا كلۋبىنىڭ نەگىزىندە قۇرىلدى. كوۆوركينگ-ورتالىقتا ءبىلىم الۋعا, وزگە جاستارمەن قارىم-قاتىناس جاساپ, پىكىر الماسۋعا جانە شىعارماشىلىق دامۋعا قولايلى ورتا جاسالعان. مۇندا جازۋشىلارمەن, اقىندارمەن, قوعام قايراتكەرلەرىمەن كەزدەسۋلەر, پسيحولوگپەن كونسۋلتاتسيالار ۇيىمداستىرىلىپ تۇرادى, سونداي-اق بولاشاقتا بالالار مەن جاسوسپىرىمدەرگە كاسىپكەرلىك ساباقتارىن وتكىزۋ جوسپارلانىپ وتىر.
كوۆوركينگ-ورتالىقتىڭ قۇرىلۋىنا «Samruk-Kazyna Trust» الەۋمەتتىك جوبالاردى دامىتۋ قورى دەمەۋشىلىك جاساعان.
«ءبىز «زامانداس» قوعامدىق قورىنىڭ جۇمىسىنا 2013 جىلدان بەرى قولداۋ كورسەتىپ كەلەمىز. ولارمەن بىرگە كوپ بالانىڭ ءومىرىن وزگەرتكەن ۇلكەن جولدان وتتىك. جاقىندا نۇر-سۇلتاندا التىنشى اۋلا كلۋبىن اشتىق. ەندى وندا 2700-دەن استام بالا بوس ۋاقىتىن وتكىزە الادى. وقۋشىلار ورتالىقتا ارت-تەراپيا, حورەوگرافيا, شاحمات, كاراتە, دومبىرا, توعىزقۇمالاق, اعىلشىن ءتىلى سياقتى 30-دان استام ۇيىرمەگە قاتىسا الادى» دەپ اتاپ ءوتتى «Samruk-Kazyna Trust» قورى باس ديرەكتورىنىڭ ورىنباسارى سەرعوجا قالياسقاروۆ.
كوۆوركينگ-ورتالىقتىڭ ءار بۇرىشىنداعى سورەلەردە كىتاپتار سامساپ تۇر. مۇندا تىنىعۋ بولمەسى دە بار. كوۆوركينگ-ورتالىققا 15 جاستان اسقان جاسوسپىرىمدەر مەن جاستار قاتىسا الادى. ورتالىققا كەلۋ ءۇشىن 8 (701) 516 15 25 ءنومىرى بويىنشا الدىن الا جازىلۋ قاجەت.
