ورىنباسار ىنتىقباەۆا, استانا قالاسى تەمىرجول ۆوكزالى باستىعىنىڭ ورىنباسارى: تەمىرجول بيلەتتەرىن تەرمينال دا بەرەدى
– ورىنباسار شامبايقىزى, پوەزداردىڭ قوزعالىس كەستەسى تۋرالى قايدان بىلۋگە بولادى?
– استانا ۆوكزالىندا انىقتاما-اقپاراتتىق قىزمەتى جۇمىس ىستەيدى. ءسىز «105» نومىرىنە حابارلاسىپ, جولاۋشىلار پوەزدارىنىڭ قوزعالىس كەستەسى تۋرالى, ولاردىڭ ءجۇرۋ باعىتى جونىندە, سونداي-اق قازاقستان رەسپۋبليكاسى جانە تاۋەلسىز مەملەكەتتەر دوستاستىعى اۋماعى بويىنشا پوەزداعى ورىنداردىڭ بولۋى جانە جول ءجۇرۋ قۇنى تۋرالى اقپارات الا الاسىز. بۇل تۋرالى ءبىزدىڭ ۆوكزالدىڭ ىشىندە ءار ەكى ساعات سايىن ديكتور قىزدار دا حابارلاپ وتىرادى.
سونىمەن بىرگە سىزدەر پوەزدارعا ورىنداردىڭ بولۋى, كەلۋ ۋاقىتى مەن كەشىگىپ كەلۋى تۋرالى اقپاراتتاردى جانە باسقا دا ءارتۇرلى انىقتامالاردى استانا تەمىرجول ۆوكزالىنداعى «ۇجىمدىق پايدالانۋ تابلوسى» ارقىلى الۋلارىڭىزعا بولادى.
ۇجىمدىق پايدالانۋ تابلوسى ۆوكزالدىڭ كاسسالار جانە كۇتۋ زالدارىندا ورناتىلعان.
– كەيدە كىشكەنتاي بالالارىمىزبەن بىرگە جول جۇرۋگە تۋرا كەلەدى. وندايدا ارينە بالالاردىڭ مازاسى كەتىپ, تىنىشسىزداناتىنى بەلگىلى عوي. استانا ۆوكزالىندا وسىنداي بالالى انالارعا ارنالعان زال بار ما؟
– بالالارمەن جۇرەتىن جولاۋشىلارعا ارنالعان زال ەسكى ۆوكزالدىڭ ءبىرىنشى قاباتىندا ورنالاسقان. ال, 10 جاسقا دەيىنگى بالالارمەن جۇرەتىن جولاۋشىلار كۇتۋ زالىنا ءوتىپ, وزدەرىنە كەرەكتى ۋاقىتقا دەيىن پوەزدى كۇتۋلەرىنە بولادى.
– مەن جۇمىس بابىمەن قازاقستاننىڭ قالالارىنا ىسساپارعا ءجيى شىعىپ تۇرامىن. سوندا بايقاعانىم, قازىر تەمىرجول بيلەتتەرىن ۆوكزالعا بارماي–اق, ورتالىقتاردا ورنالاسقان تەرمينالدار ارقىلى دا ساتىپ الۋعا بولادى. تەرمينالدار ارقىلى تاعى قانداي اقپارات الۋعا بولادى؟
– ءيا, قازىرگى كەزدە جولاۋشىلار ۆوكزالدىڭ بيلەت زالدارىندا وزىنە-ءوزى قىزمەت كورسەتەتىن ترانزاكتسيالىق تەرمينالداردان, سونداي-اق كۇتۋ زالدارىندا ورنالاسقان وزىنە-ءوزى قىزمەت كورسەتەتىن تولەم تەرمينالدارى ارقىلى قولما-قول اقشاعا تەمىرجول بيلەتتەرىن ساتىپ الا الاسىزدار. تەمىرجول بيلەتتەرىن استانا مەن الماتىدان باسقا قاراعاندى جانە اقتوبە قالالارىنىڭ ۆوكزالدارىندا ورنالاسقان وسىنداي ارنايى تەرمينالدار ارقىلى ساتىپ الۋعا بولادى.
تەرمينالداردىڭ كومەگىمەن كەستە, بيلەتتەردىڭ بار-جوعى تۋرالى انىقتامالىق اقپاراتتى تەگىن الۋلارىڭىزعا, پوەزد تاڭداۋلارىڭىزعا جانە قولما-قول قاراجات تولەي وتىرىپ, بيلەت ساتىپ الۋ مۇمكىندىكتەرى دە قاراستىرىلعان بولادى.
تەرمينال توكەن بەرەدى, ونىڭ كومەگىمەن بيلەت بلانكىسىن وزىنە-ءوزى قىزمەت كورسەتەتىن ترانزاكتسيالىق تەرمينالدار ارقىلى نەمەسە بيلەت كاسساسىندا باسىپ شىعارۋعا بولادى. مۇنداي تەرمينالدار رەسپۋبليكامىز بويىنشا بىرنەشە ءىرى ساۋدا, ويىن-ساۋىق ورتالىقتارىندا جانە باسقا دا قوعامدىق ورىنداردا ورنالاسقان.
– استاناعا ءبىرىنشى رەت ات باسىن بۇرعالى وتىرمىز. الماتى وبلىسىنان حابارلاسىپ تۇرمىن. اتىم – اقەركە. ايتىڭىزشى, قالاعا العاش كەلگەن ادامنىڭ كوپ قيىندىقتارعا تاپ بولۋى مۇمكىن عوي. وندا مەنى قۇشاق جايىپ قارسى الار تۋىسىم نە تانىسىم دا جوق. پوەزدان تۇسكەن سوڭ, قوناق ۇيگە بارىپ توقتاسام با دەيمىن عوي. تاكسي قىزمەتى قالاي بولادى ەكەن؟
– بۇل ماسەلەنىڭ ءبارىن بىزدە وڭتايلى شەشۋ جاعى قاراستىرىلعان. استاناعا شىنىمەن دە كۇن سايىن قانشاما ادام اعىلىپ كەلىپ-كەتىپ جاتادى. اسىرەسە, جاز مەزگىلىندە ءبىزدىڭ قالاعا كەلۋشىلەر تىم كوپ. ولاردىڭ سانى وسى كەزدەردە ادەتتەگىدەن 2-3 ەسەگە دەيىن كوبەيىپ كەتەدى. وسى جىلدىڭ شىلدە-تامىز ايلارى ارالىعىندا ورتاشا ەسەپپەن العاندا ءبىر سوتكەدە 7 مىڭعا جۋىق جولاۋشىعا قىزمەت كورسەتىپپىز.
ءبىزدىڭ ۆوكزال عيماراتىندا ءسىز سەكىلدى جولاۋشىلاردىڭ قاۋىپسىزدىگىن قامتاماسىز ەتۋ ماقساتىندا, ۆوكزال الاڭىندا ارنايى ورىندا ورنالاسقان رەسمي تاكسي قىزمەتىن قولدانۋلارىڭىزعا ابدەن بولادى.
استانالىق تەمىرجول ۆوكزالىنىڭ سىيىمدىلىعى 1800 جولاۋشىعا ەسەپتەلگەن. پويىزداردان تۇسكەن جانە پويىزدارعا وتىراتىن جولاۋشىلارعا ارنايى جابدىقتالعان ەكى وتىرعىزۋ پلاتفورماسى قىزمەت كورسەتەدى. جولاۋشىلارعا قولايلى جاعداي تۋعىزىپ, ولارعا سەرۆيستىك قىزمەت كورسەتۋ ماقساتىندا ۆوكزالدا ەسكالاتورلار جانە مۇگەدەكتەر ءۇشىن ليفتىلەر ورناتىلعان.
ۆوكزال كەشەنىندە ءتورت كۇتۋ زالى, ءبىر قوناق ءۇي, ءۇش جۇك ساقتايتىن ورىن جاي, ەكى سەرۆيستىك ورتالىق, ون بانكومات, ۆاليۋتا ايىرباستايتىن پۋنكت, ءدارىحانا, نامازحانا, تاعى باسقا دا كوپتەگەن ورىندار جولاۋشىلارعا قىزمەت كورسەتىپ تۇر. سونداي-اق, قوعامدىق ءتارتىپتى ساقتايتىن پوليتسيا قىزمەتكەرلەرى مەن كوشى-قون پوليتسياسى, اسكەري كومەنداتۋرا, سانيتارلىق ەپيدەميولوگيالىق ستانسا كۇندىز-ءتۇنى جۇمىس ىستەۋدە.
– مەنىڭ ەكىنشى توپتاعى مۇگەدەك اعام بار. ول بۇرىن-سوڭدى باسقا ەلگە پوەزبەن قاتىناپ كورمەپتى. الماتى وبلىسىنداعى تۋىستارىمىز ۇنەمى شاقىرادى. سوعان ءبىر بارىپ كەلسەك پە دەپ ەدىك. ءبىزدىڭ پوەزداردا مۇگەدەكتەرگە قانداي دا ءبىر جەڭىلدىكتەر بار ما؟
– تۇرعىنداردىڭ مۇمكىندىگى شەكتەۋلى توبىنا ارنالعان سەرۆيستىك قىزمەت كورسەتۋ دەڭگەيىن ارتتىرۋ ماقساتىندا استانا ۆوكزالىندا مۇمكىندىگى شەكتەۋلى جولاۋشىلارعا قىزمەت كورسەتۋ بويىنشا № 3 بيلەت كاسساسى جانە ۆوكزالدىڭ ەسكى عيماراتىندا ورنالاسقان دەمالۋ بولمەسى اشىلدى. مۇمكىندىگى شەكتەۋلى جولاۋشىلاردى اۆتوكولىكتەن جولاۋشىلار ۆاگونىنا نەمەسە قالاماڭىلىق پوەزدارعا جەتكىزۋ ءۇشىن ۆوكزالدىڭ جاڭا عيماراتىندا ورنالاسقان استانا ۆوكزالىنىڭ كەزەكشى كومەكشىسىنىڭ كابينەتىندە مۇگەدەكتەرگە ارنالعان اربا بار.
تۇرعىنداردىڭ مۇمكىندىگى شەكتەۋلى توبىنا قىزمەت كورسەتۋ ماسەلەسى بويىنشا بارلىق سۇراقتاردى ۆوكزال باستىعىنىڭ كەزەكشى كومەكشىسىنەن, ۆوكزال بويىنشا جانە انىقتاما بەرۋ بويىنشا كەزەكشىلەردەن سۇراۋلارىڭىزعا نەمەسە تومەندەگى تەلەفوندارعا قوڭىراۋ سوعۋلارىڭىزعا بولادى. استانا ۆوكزالى باستىعىنىڭ كەزەكشى كومەكشىسىنە 94-34-93 تەلەفونى ارقىلى نەمەسە انىقتاما بيۋروسىنا 105 ءنومىرىن تەرۋ ارقىلى حابارلاسۋلارىڭىزعا بولادى.
– اتىم – اينۇر. استانا ارقىلى وزگە قالالارعا قاتىنايتىن فيرمالىق پوەزدار كوبەيىپ كەلەدى. سولار تۋرالى تولىعىراق بىلگىم كەلەدى.
– اينۇر, 2012 جىلعى 1 شىلدەدەن باستاپ «جولاۋشىلار تاسىمالى» اكتسيونەرلىك قوعامى «قازاقستان تەمىرجولى «ۇلتتىق كومپانياسى» اكتسيونەرلىك قوعامى قۇراستىرعان, «الماتى-پەتروپاۆل» قاتىناسىنداعى №151/152 جاڭا جۇردەك پويىزدار حالىققا قىزمەت كورسەتىپ كەلەدى. بۇل پويىزدار دا «تالگو» جايلىلىعى جوعارى ۆاگوندارىنان قۇرالعان. پويىزداردىڭ جولدا ءجۇرۋىنىڭ جالپى ۋاقىتى 18 ساعات 45 مينۋتتى قۇرايدى. بيلەتتەردى تەمىرجول كاسسالارى جانە ينتەرنەت, www.railways.kz , www.temirzholy.kz, www.pcentre.kz ۆەب-سايتتارى سونىمەن قاتار, ءوز-وزىنە قىزمەت كورسەتەتىن تەرمينالدار ارقىلى ساتىپ الۋعا بولادى.
سىزدەردىڭ قولايلىلىقتارىڭىز ءۇشىن 2-ءىنشى جانە 3-ءىنشى جولداردىڭ اراسىنداعى پەرروندا ورنالاسقان قالاماڭىلىق كاسسالارى قوسىمشا جۇمىس ىستەيدى.
تولىعىراق ايتار بولسام, جولاۋشى پويىزدارىن جونەلتۋ جانە قابىلداۋ استانا ستانساسى باس پاركىنىڭ ءۇش جولى ارقىلى ءتورت باعىت بويىنشا جۇزەگە اسىرىلادى. جالپى, رەسپۋبليكامىزدىڭ باس قالاسى استانا ارقىلى بۇگىنگى تاڭدا 31 پار جولاۋشىلاردىڭ جانە 20 قالا ماڭىنا جۇرەتىن پويىزدار قاتىنايدى.
استانالىق تەمىرجول ۆوكزالى ەلىمىزدىڭ بارلىق وبلىستارى ورتالىقتارىنا, سونداي-اق تمد ەلدەرىنىڭ ماسكەۋ, مينسك, كيەۆ, برەست, سانكت-پەتەربۋرگ, سۆەردلوۆسك, بىشكەك, تاشكەنت, ومبى جانە حالىقارالىق باعىتتار بويىنشا قاتىنايتىن ءۇرىمشى قالاسىمەن دە تىعىز بايلانىستا جۇمىس ىستەيدى.
گۇلبارشىن وكەشقىزى