ۇلتتىق اكادەميالىق كىتاپحانادا اقىن, جازۋشىلار وداعىنىڭ مۇشەسى تولقىن قابىلشانىڭ «وسى ءبىر ءسات ۇنايدى» اتتى كىتابىنىڭ تۇساۋكەسەرى ءوتتى.
مەملەكەتتىك تاپسىرىس اياسىندا جارىق كورىپ, 3 مىڭ دانا تارالىممەن قالىڭ وقىرمانعا جول تارتقان بۇل كىتاپ – اۆتوردىڭ ءۇشىنشى جىر جيناعى. كەشكە قازاقستاننىڭ ەڭبەك سىڭىرگەن قايراتكەرى, بەلگىلى ساتيريك كوپەن امىربەك, قالامگەر, عالىم وڭايگۇل تۇرجان, اقىن, قازاقستان جازۋشىلار وداعىنىڭ مۇشەسى قالقامان سارين, سەرىكزات دۇيسەنعازى, تاناكوز تولقىنقىزى, ەربول بەيىلحان, وزگە دە اقىننىڭ قالامداس دوستارى مەن وقىرماندارى قاتىستى. جاڭا جىر جيناقتىڭ لەنتاسىن قيعان كوپەن امىربەك وتباسى مەن ولەڭدى قاتار الىپ جۇرگەن اقىن قىزعا اق جول تىلەدى.
«ءبىزدىڭ كەزىمىزدە اقىن اپامىز ءماريام حاكىمجانوۆا, ودان كەيىن فاريزا وڭعارسىنوۆا, كۇلاش احمەتوۆا شىقتى. ارالارىندا كوپتەگەن تاماشا اقىن قىزدار كورىنىپ, تۇرمىس قۇرىپ, قازان-وشاقتىڭ قاسىنان شىعا الماي قالدى. پوەزيانىڭ كيەسىن تاپپادى. بۇل جاس تولقىن قازان-وشاقتى دا ۇستاپ, قارا شاڭىراقتى شايقالتپاي, بالا-شاعاسىن ءوسىرىپ, انا بولىپ, ەكى جاقتىڭ دا اۆتورى بولىپ ءجۇر. ءۇيدىڭ جانە پوەزيانىڭ. قاتار ۇستاۋ وتە قيىن. سەنىڭ سەڭگىر-سەڭگىر تاۋلارىڭ – پوەزيا. شىڭى سول. سول شىڭعا شىعار بۇل العاشقى باسپالداعىڭ. تاۋ مەن تاۋدىڭ باسى بولەك بولعانمەن, ەتەگى ءبىر. اقىن پوەزيانى كوتەرسە, حالىق اقىندى كوتەرەدى» دەدى ك.امىربەك.
سىرلاسۋ تۇرىندە وتكەن كەشتە تولقىن قابىلشانىڭ پوەزياسى مەن ءومىربايانى تانىستىرىلىپ, ولەڭدەرى وقىلدى.
بايان اسىلبەكوۆا
