انە-مىنە دەگەنشە جاز دا بىتۋگە جاقىن. جايما-شۋاق اۋا رايىمەن تەك تامىزدا عانا تابىسقان استانالىقتار ءۇشىن مۇنى سەزىنۋ تىم قيىن ەكەنى راس. قانشا كىسىنىڭ كوكەيىندە «وسىنى ىستەۋ كەرەك ەدى, اتتەڭ…» دەگەن ارماندار قالىپ بارادى. سول ويلاردىڭ مەرزىمى ءوتىپ كەتپەي تۇرعاندا, تەزىرەك ىسكە اسىرۋعا تىرىسايىق, ەندەشە. ءوزىمىزدىڭ تاراپىمىزدان دا تومەندەگىدەي ون يدەيا ۇسىنامىز.
«بيىل مۇلدەم شومىلمادىم» دەپ مۇڭايۋعا ءالى ەرتە. ويتكەنى, ورتالىق ساياباقتىڭ ىشىندەگى اشىق باسسەين جابىلعان جوق. «وازيس» دەپ اتالاتىن جاعاجاي كلۋبى بۇگىندە ەلوردالىقتار مەن قالا قوناقتارى اراسىندا ەداۋىر تانىلىپ ۇلگەردى. ەندىگى ۋاقىتتا شاھاردان الىس ۇزاماي-اق, اسپان استىندا قالاعانىڭىزشا جۇزە بەرۋىڭىزگە بولادى. تەرىڭىزدى دە كۇنگە سۇيدىرەسىز, ءوزىڭىز دە شات-شادىمان كوڭىل-كۇيدەن قۇرالاقان قالمايسىز.
لوندوننىڭ ەكى قاباتتى قىپ-قىزىل اۆتوبۋستارى استانادا ءجۇر دەگەنگە سەنەر مە ەدىڭىز؟ ايتىپ وتىرعانىمىز – ەش قوسپاسىز شىندىق. ول اۆتوبۋستار سىزگە قالاداعى ەڭ ادەمى جەرلەردى ارالاتىپ, بۇرىن-سوڭدى ەستىمەگەن نەبىر قىزىقتى دەرەكتەرمەن تانىستىرادى. اسىرەسە, بۇل كولىك باسقا وڭىردەن قىدىرىپ تۋىستارىڭىز كەلگەندە, سىزگە قولقانات بولۋعا جاراپ تۇر.
نيۋ-يوركتە تۇسىرىلگەن زاماناۋي فيلمدەردى كورىپ, ورتالىق ساياباقتاردا بولاتىن بۇقارالىق جاتتىعۋلارعا ەرىكسىز ءتانتى بولاسىڭ. مۇنداي ءمۇمكىندىكتىڭ بىزدە دە بار ەكەنىن بىلەسىز بە؟ ەگەر ءسىز دە سالاۋاتتى ءومىر سالتىن ۇستاناتىن بولساڭىز, ءار دەمالىس سايىن استانالىق پاركتە ۇيىمداستىرىلاتىن شاراعا قاتىسىڭىز. اەروبيكا, فيتنەس, يوگا جانە زۋمبا ءسىزدىڭ تاڭىڭىزدى تاماشا ەتەدى.
ورتالىق پاركتەن الىستاماي تۇرىپ, ونداعى اتتراكتسيوندارعا دا ءمىنىپ كورۋگە كەڭەس بەرەمىز. كوكتەن جەرگە قۇلديلاعىڭىز كەلە مە, توبەڭىزبەن ءتوڭكەرىلگىڭىز كەلە مە, ءوز قالاۋىڭىز! ءبىرىن تاڭداڭىز دا, بار داۋسىڭىزبەن ايقايلاي بەرىڭىز. سىزگە ەشكىم «قوي!» دەمەيدى. اۋىر اپتادا جينالىپ قالعان سترەستىڭ ەلەمەنتتەرىنەن قۇتىلۋعا تاپتىرماس شەشىم!
ادرەناليندى سەزىنۋدىڭ تاعى ءبىر ءتاسىلىمەن بولىسەيىك. رافتينگپەن, كارتينگپەن, پەينتبولمەن اينالىسىڭىز. پاراشيۋتتەن سەكىرىڭىز. كۆادروتسيكلمەن سەرۋەندەڭىز. دجامپينگتىڭ ءدامىن تاتىڭىز. مۇنداي ەكسترەمالدى سپورت تۇرلەرىنىڭ نۇكتەلەرىن ەلوردادان ەش قينالماي تاباسىز.
مىندەتتى تۇردە ىستەۋىڭىز كەرەك «must have» ارەكەتتەردىڭ ءبىرى – تاڭدى قارسى الۋ. كۇننىڭ شىعۋى – تابيعاتتىڭ بىزگە سىيلاعان عاجاپ قۇبىلىسى. سوناۋ كەزدەرى سىنىپتاستارىڭىزبەن بىرگە تاڭدى قارسى العانىڭىز ەسىڭىزدە مە؟ ونى قايتالاۋعا نە كەدەرگى؟ بار بولعانى, ەسىلدىڭ جاعالاۋىنا بارىڭىز دا, كوزىڭىزدى ءتىل جەتكىسىز كوركەم كورىنىستە دايارلاڭىز.
ەسىل دەمەكشى, وزەن بويىمەن ەكسكۋرسيا جاسايتىن كەمەلەرگە وتىرماۋ وتە ءبىر وكىنىشتى نارسە بولار ەدى. دەرەۋ وسى «ولقىلىقتى» تۇزەۋگە تالپىنىڭىز. ەلوردانى سۋ بەتىنەن تاماشالاۋدىڭ قانداي ەكەنىنە ءوزىڭىز كوز جەتكىزەسىز. ول جەردەن, ءتىپتى, كوپىردىڭ ءوزى ايرىقشا ءسان-سالتاناتتى بولىپ كورىنەدى. ساياحاتتىڭ سىزگە ءسوزسىز ۇنايتىنىنا سەنەمىز.
استانانىڭ قازاقستانداعى وزگە قالالاردان ايىرماشىلىعى, مۇندا شەتەلدىكتەر كوپ. ىسكەرلىك ورتالىققا اينالعان باس قالا ءۇشىن بۇل جايت تىپتەن تۇسىنىكتى. جولاي باسقا مەملەكەتتەن كەلگەن مەيمانداردى ۇشىراستىرىپ قالساڭىز, كومەكتەسۋگە, سۇراعان مەكەنجايىن تاۋىپ بەرۋگە, جىلى ءىلتيپات بىلدىرۋگە ءازىر بولىڭىز. سىزبەن اراداعى ديالوگتان كەيىن ونىڭ ويىندا ءبىزدىڭ ەلگە دەگەن جاماندى-جاقسىلى پىكىر قالىپتاساتىنىن ۇمىتپاڭىز. ءارى-بەرىدەن سوڭ, وزىڭىزگە دە تىلدىك تاجىريبە!
كەيدە قالانىڭ قىم-قۋىت تىرلىگىنەن بوساپ, قازاقى تۇرمىستىڭ ءيىسىن جان-دۇنيەڭمەن سەزىنگىڭ كەلەدى. ونداي شاقتا شاھار شەتىندەگى يپپودرومعا بارۋىڭىزعا بولادى. مۇندا كۇندەلىكتى ۋايىم-مۇڭنان ارىلىپ, سەرگىپ, «كوشپەندىلەر» نەمەسە «جاۋجۇرەك مىڭ بالا» فيلمىندە جۇرگەندەي اسەرگە بولەنەسىز. اتپەن شاۋىپ كورمەگەن بولساڭىز, قىسىلماڭىز. سىزگە سونداعى ارنايى ماماندار جاردەمدەسەدى.
امەريكاعا, ۇلىبريتانياعا, اۆسترالياعا نە بولماسا فرانتسياعا بارا الماي, ۇنجىرعاڭىز ءتۇسىپ ءجۇر مە؟ بۇل تىعىرىقتان قۇتقاراتىن جول بار. ارينە, ەشكىم سىزگە بيلەت دايىنداپ قويعان جوق. ەسەسىنە, الگى مەملەكەتتەردىڭ باستى سيمۆولدارى بەينەلەنگەن ستاتۋيالار نۇرجول بۋلۆارىندا قاز-قاتار ءتىزۋلى تۇر. ىرىمداپ, سونىڭ جانىندا سۋرەتكە تۇسسەڭىز, ارمانىڭىز اقيقاتقا اينالار كۇن تۋىپ قالار.
بوتاگوز ماراتقىزى
