بۇگىن استانادا ۇلى جەڭىس كۇنى تويلانۋدا. ەكىنشى دۇنيەجۇزىلىك سوعىستاعى جەڭىستىڭ 71 جىلدىعىنا ارنالعان سالتاناتتى شارالار «وتان قورعاۋشىلار» مونۋمەنتىنە گۇل قويۋ راسىمىمەن باستالدى.
1941-1945 جىلدارداعى سۇراپىل سوعىسقا قازاقستاننان 1 ملن 200 مىڭ ادام اتتاندى. ولاردىڭ تەڭ جارتىسى ۇرىس دالاسىنان قايتىپ ورالمادى. بۇدان بۇرىن 500 قازاقستاندىق كەڭەس وداعىنىڭ باتىرى اتاعىن الدى دەلىنسە, كەيىنگى جىلدارى بۇل ءتىزىم تولىقتىرىلىپ, باتىرلار سانى 600-دەن استى.
ۇلى وتان سوعىسىندا قازا تاپقان مايدانگەرلەردىڭ رۋحىنا تاعزىم ەتۋ جانە ۇلى جەڭىستى ۇلىقتاۋ ءۇشىن مونۋمەنت جانىنا قر پرەمەر-مينيستر كارىم ءماسىموۆ, پارلامەنت سەناتى مەن ءماجىلىسىنىڭ توراعالارى قاسىم-جومارت توقاەۆ پەن باقتىقوجا ىزمۇحامبەتوۆ, مەملەكەتتىك حاتشى گۇلشارا ابدىقالىقوۆا, قورعانىس ءمينيسترى يمانعالي تاسماعامبەتوۆ, سوعىس جانە ەڭبەك ارداگەرلەرى, مەملەكەتتىك ورگان باسشىلارى, سونداي-اق, ەلوردا تۇرعىندارى مەن قوناقتارى جينالدى.
شارا بارىسىندا «وتان قورعاۋشىلار» ەسكەرتكىشىنە 1 500-گە جۋىق گۇل شوقتارى قويىلدى. قان مايداندا ەرلىكپەن قازا تاپقان وتانداستارىمىزدىڭ رۋحىنا تاعزىم جاسالىپ, ءبىر مينۋت ۇنسىزدىك جاريالاندى.
ۇلى جەڭىس كۇنى «وتان قورعاۋشىلار» الاڭىندا تىگىلگەن شاتىرلار قالاشىعىندا مەرەكەلىك شارالارمەن جالعاستى.
سول ماڭعا جينالعاندارعا سولدات بوتقاسى تاراتىلىپ, استانا قالاسى مەملەكەتتىك اكادەميالىق فيلارمونياسى ارتىستەرى مايدان اندەرىن شىرقاپ, بي بيلەپ, بارشا جۇرتتى مەرەكەلىك كوڭىل-كۇي اۋانىنا بولەدى.
امانعالي قالجانوۆ
