بيىل جەڭىستىڭ 71 جىلدىعى. ۇرپاققا يگىلىك پەن ىزگىلىك سىيلاعان, مەملەكەتىمىزدىڭ وركەندەۋىنە ولشەۋسىز ۇلەس قوسقان ارداقتى ارداگەرلەرىمىزدىڭ بۇگىنگى بەيبىت كۇنگە امان-ەسەن جەتكەنى – ۇلكەن قۋانىش. قان مايداننان امان-ەسەن ورالىپ, سوعىستان كەيىنگى جىلدارى سوت سالاسىندا قىزمەت اتقارعان, ءوز حالقىنىڭ باقىتتى ءومىرىن كورىپ كەلە جاتقان ارداگەرلەردىڭ ءبىرى – الەكساندر توركين. ول جاقىندا 97 جاسقا تولدى.
مەرەيتوي يەسىن استانا قالاسى ەسىل اۋداندىق سوتىنىڭ ۇجىمى قۇتتىقتاپ, سىيلىقتار تابىس ەتتى.
مايدانگەر سۋديا الەكساندر پەتروۆيچ توركين سوعىس باستالعان 1941 جىلدىڭ 7 قاراشاسىندا اسكەري شەرۋگە قاتىسىپ, قان مايدانعا اتتانعان. بەرلينگە باسىپ كىرگەن تۇستا, رەيحستاگقا تۋ تىككەن باتىرلارىمىزدىڭ ەرلىگىن كورگەن, جەڭىستى العاشقىلاردىڭ ءبىرى بولىپ قارسى العان مايدانگەر. سوعىس اياقتالعاننان كەيىن تۋعان ەلگە امان-ساۋ ورالىپ, سوت جۇيەسىندە ەڭبەك ەتىپ, مەملەكەتىمىزدىڭ وركەندەۋىنە ۇلەسىن قوستى.
استانا قالالىق سوتى ارقاشان ارداگەرلەرىن ارداقتاپ, قارتتارىن قۇرمەتتەۋدىڭ قاستەرلى جولىنان جاڭىلعان ەمەس. بىلتىر سوت ۇجىمى قاريانىڭ ۇيىندە بولىپ, الەۋمەتتىك كومەك كورسەتكەن. بيىل دا ۇلى جەڭىس قارساڭىندا قۇرمەت كورسەتىپ, اقشالاي دا, سىيلىق تارتۋمەن دە, مادەني شارامەن قۋانتپاق.
ارداگەردىڭ كەۋدەسى وردەندەر مەن مەدالدەرگە تولى. قارياعا بىلتىر كوستيۋم سىيلاماق بولعاندار دا بار ەكەن. مۇنداي سىيلىقتان ءۇزىلدى-كەسىلدى باس تارتقان ارداگەر «بۇل كوستيۋم, مەنىڭ جان جارىمنىڭ اپەرگەنى, قازىر ول دۇنيە سالدى. بۇل كيىم ماحابباتىمنىڭ, تالاي كۇنگى قۋانىشىمنىڭ بەلگىسىندەي» دەپتى. ءجۇز جاستى القىمداعان قارتتىڭ جارىنا دەگەن ادالدىعىنا ەرىكسىز سۇيسىندىك.
ۋاقىت ءوز دەگەنىن جاسايدى. بۇل سوعىس ادامزاتتىڭ جۇرەگىنە وشپەس جارا سالدى. قانشاما ۇرپاقتى قايعى-قاسىرەتكە دۋشار ەتىپ, ءومىرىن وكسىتىپ كەتتى. جىل ارتىنان جىل ءوتتى, قازىر ەلىمىز تاۋەلسىزدىگىن الدى, بۇگىنگى ۇرپاق ازات تۋدىڭ استىندا باقىتتى ءومىر سۇرۋدە. تىلەرىمىز سول, الاش مىنەزدى حالقىمىزدىڭ كوكىرەگى سىزداماسىن, جانى اۋىرماسىن, سوعىس اتاۋى جويىلىپ, بۇگىنگى ۇرپاق سوعىستى بىلمەي ءوسسىن.
ارداگەرلەرىمىزدىڭ قانىمەن زارىقتىرىپ جەتكەن بەيبىت كۇننىڭ قادىرى بىزدەر ءۇشىن تىم قىمبات. ءبىزدىڭ ەندىگى پارىزىمىز وتان ءۇشىن وت كەشكەن ارداقتى ارداگەرىمىزدىڭ ەرلىگىنە تاعزىم ەتىپ, قۇرمەت كورسەتۋ!
قىمبات توقتامۇرات
