دەنساۋلىقجاڭالىقتار

وتباسىلىق دەنساۋلىق ورتالىعى

ERA_4406

بۇرناعى كۇنى استانا قالاسى دەنساۋلىق ساقتاۋ باسقارماسىنىڭ باسشىسى ايگۇل سەگىزباەۆانىڭ قاتىسۋىمەن اۋىسىمىنا ءجۇز ەلۋ ادامدى قابىلدايتىن, زاماناۋي مەديتسينالىق قۇرالدارمەن جابدىقتالعان «دوستىق» وتباسىلىق دەنساۋلىق ورتالىعىنىڭ اشىلۋ سالتاناتى بولدى.

باسقارما باسشىسى ءوز سوزىندە بۇل ورتالىق قازاقستان رەسپۋبليكاسىندا دەنساۋلىق ساقتاۋدى دامىتۋدىڭ 2011-2015 جىلدارعا ارنالعان «سالاماتتى قازاقستان» مەملەكەتتىك باعدارلاماسىن جانە ەلباسىنىڭ «قازاقستان-2050» ستراتەگياسىن ىسكە اسىرۋ شەڭبەرىندە سالىنعانىن اتاپ ءوتتى. ونىڭ ايتۋىنشا, ورتالىقتا جالپى پراكتيكا دارىگەرلەرى قابىلداۋ جاسايدى. ءتۇرلى زەرتحانالىق زەرتتەۋلەر جۇرگىزىلىپ, پروتسەدۋرالىق جانە ەكپە جاساۋ كابينەتتەرى, كۇندىزگى ستاتسيونار جۇمىس ىستەيدى. باسقاشا ايتساق, باسى اۋىرىپ, بالتىرى سىزداعان جۇرتقا باستاپقى مەديتسينالىق-سانيتارلىق كومەك كورسەتۋ ءۇشىن بار جاعداي جاسالعان.

ورتالىق جابدىقتارىنان حابار بەرسەك, وندا فليۋوروگرافيالىق قۇ­رىلعى, ناۋقاستاردى ۋلترادىبىستىق تەك­سەرۋگە ارنالعان ستاتسيونارلىق ءتۇرلى-ءتۇستى اپپارات, زەرتحانالىق جانە فيزيوتەراپەۆتتىك قوندىرعىلار ورنا­تىل­عان. سونىمەن قاتار, ءۇش بريگادادان جاساقتالعان جەدەل مەديتسينالىق ءجار­دەمنىڭ قوسىمشا ستانتسياسى ىسكە قوسىلدى.

ورتالىقتىڭ باس دارىگەرى سەرجان دوسانوۆتىڭ سوزىنە سەنسەك, وسى ستانسانىڭ ارقاسىندا شويىن قۇيۋ زاۋىتىنىڭ اۋماعىندا تۇراتىن حالىققا جەدەل جاردەم كولىگى بۇرىن­عىداي 20-30 مينۋتتا ەمەس, 5-10 مينۋتتا جەتەتىن بولادى.

جاڭا ورتالىقتىڭ تاعى ءبىر ارتىق­شىلىعى – ونىڭ اشىلۋىنا بايلانىستى №3 جانە №7 قالالىق ەمحانالاردىڭ جۇكتەمەسى ازايىپ, شويىن قۇيۋ زا­ۋىتى­نىڭ اۋماعىندا جانە «ءوندىرىس» تۇرعىن الابىندا تۇراتىن حالىققا قولجەتىمدى مەديتسينالىق جاردەم كورسەتىلەدى.

باس دارىگەردىڭ ايتۋىنشا, ورتالىق ون بەس مىڭعا جۋىق ادامعا, سونىڭ ىشىندە 5375 بالا مەن بالا تۋ جاسىن­داعى 3617 ايەلگە قىزمەت كورسەتەدى.

جاڭادان اشىلعان «دوستىق» وتباسىلىق دەنساۋلىق ورتالىعى جاھانشا دوسمۇحامەدۇلى 24 مەكەن-جايىندا ورنالاسقان.

امانعالي شميتۇلى

تاعىدا

ۇقساس جاڭالىقتار

پىكىر ۇستەۋ

Back to top button