ءوزارا ارەكەتتەستىك نىعايادى
استانا اكىمدىگى جانە «استانا ەكسپو-2017» ۇلتتىق كومپانياسى «ەكسپو-2017» كورمەسىن دايىنداۋ جانە ونى وتكىزۋ جونىندە ءوزارا ىنتىماقتاسۋ تۋرالى كەلىسىمگە قول قويدى.
استانا قالاسىنىڭ اكىمى ادىلبەك جاقسىبەكوۆ «استانا ەكسپو-2017» ۇلتتىق كومپانياسىنىڭ باسقارما توراعاسى تالعات ەرمەگياەۆپەن كەزدەسۋ بارىسىندا «ەكسپو-2017» حالىقارالىق كورمەسىن ۇيىمداستىرىپ, وتكىزۋگە قاتىستى ءوزارا ارەكەتتەستىك ماسەلەلەرىن تالقىلادى.
ادىلبەك رىسكەلدىۇلى ەلباسى تاپسىرعان مىندەتتەردى ورىنداۋدا تىعىز قارىم-قاتىناس ورناتۋ قاجەتتىگىن ايتا كەلىپ: «ءبىزدىڭ ارەكەتتەرىمىز ينجەنەرلىك جەلىلەردى, جولدار مەن نىسانداردى سالۋدا, قىسقاشا ايتقاندا, كورمە قالاشىعىنا قاتىستى بارلىق ماسەلەلەر بويىنشا ۇندەسىپ جۇمىس ىستەۋگە باعىتتالۋى كەرەك» دەدى.
ەكىجاقتى كەزدەسۋ قورىتىندىسى بويىنشا كورمە كەشەندەرى قۇرىلىسى, كولىكتىك-ينجەنەرلىك ينفراقۇرىلىمدار, قالالىق قوعامدىق كولىك جۇيەسىن جانە ءتۋريزمدى دامىتۋدىڭ ناقتى جولدارى كورسەتىلگەن جول كارتاسى قابىلداندى.
سونىمەن قاتار, قۇجاتتا كورمە قوناقتارىنىڭ قاۋىپسىزدىگى مەن ولارعا جايلى جاعداي قالىپتاستىرۋعا باعىتتالعان شارالار كەشەنى دە كورىنىس تاۋىپ, «ەكسپو-2017» اتاۋىنىڭ دا برەند رەتىندە تانىمالدىلىعىن ارتتىرۋ مەن ەرىكتىلەر قىزمەتىن ۇيىمداستىرۋ ماسەلەسى بويىنشا اتقارىلۋى ءتيىس جۇمىستار اۋقىمى دا قاراستىرىلعان.