قازاقستاننىڭ يۋنەسكو ۇيىمىنا مۇشە بولعانىنا بيىل تۋرا 20 جىل تولدى.
ەلىمىزدىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ كەزەكتى وتىرىسىنا استاناعا رەسمي ساپارمەن كەلگەن ۇيىمنىڭ باس ديرەكتورى يرينا بوكوۆا قاتىستى.
ۇلتتىق كوميسسيانىڭ توراعاسى, استانا قالاسىنىڭ اكىمى يمانعالي تاسماعامبەتوۆ باس ديرەكتوردىڭ العاشقى ساپارىنىڭ قازاقستان مەن يۋنەسكو ۇيىمى اراسىنداعى بايلانىستىڭ ورناعانىنا 20 جىل تولۋ قارساڭىنا سايكەس كەلىپ وتىرعانى ەلىمىز ءۇشىن مارتەبە ەكەندىگىنە توقتالدى.
1945 جىلى 16 قاراشادا قۇرىلعان ءبىلىم, عىلىم جانە مادەنيەت ماسەلەلەرى جونىندەگى بىرىككەن ۇلتتار ۇيىمىنا (يۋنەسكو) قازاقستان 1992 جىلى مامىر ايىندا مۇشە رەتىندە تىركەلدى. وسى 20 جىل ىشىندە ءبىز كوتەرگەن تالاي باتىل باستاما, سونىڭ ىشىندە مادەنيەتارالىق جانە دىنارالىق ديالوگ جونىندەگى ۇسىنىستار يۋنەسكو شەڭبەرىندە قولداۋعا يە بولدى.
«قازاقستان كوپتەگەن ماڭىزدى باستامالاردى الەمدىك دەڭگەيدە كوتەرىپ كەلەدى. بەيبىتشىلىككە باسىمدىق بەرگەن ەل رەتىندە تەك وڭىرلىك دەڭگەيدە عانا ەمەس, الەمدىك اۋقىمدا ايرىقشا رولگە يە بولىپ وتىر» دەدى ءوز سوزىندە بوكوۆا حانىم.
قازاقستاننىڭ ۇسىنىسى بويىنشا 2013-2022 جىلدار ارالىعى يۋنەسكو كولەمىندە مادەنيەتتەر جاقىنداسۋىنىڭ حالىقارالىق ون جىلدىعى دەپ جاريالانعانى بەلگىلى. سونىمەن قاتار, جاقىندا استانادا وتكەن شەتەلدىك ينۆەستورلار كەڭەسىندە ەلباسى نۇرسۇلتان نازارباەۆ «جاڭا جىبەك جولى» جوباسىن جۇزەگە اسىرۋ تۋرالى ۇسىنىس ايتتى. ۇلى جول جاڭعىرعان جاعدايدا قازاقستان وڭىردەگى ءىرى ترانزيتتىك ورتالىققا اينالماق. وسىعان توقتالعان كوميسسيا توراعاسى يمانعالي تاسماعامبەتوۆ قازاقستاننىڭ بۇل باستامالارى سىرت ەلدەرمەن ءوزارا بايلانىستىڭ ودان ءارى جاندانۋىنا اسەرىن تيگىزەتىنىن ايتتى.
بۇگىندە يۋنەسكو-عا مۇشە مەملەكەتتەردىڭ ماتەريالدىق ەمەس مادەني مۇراسىنىڭ ءتىزىمى بار. قازاقستاننىڭ مادەنيەت جانە اقپارات مينيسترلىگى وسى تىزىمگە ەنەتىن ۇلتتىق دۇنيەلەرىمىزدىڭ تىزبەسىن جاساپ جاتىر.
كەشەگى وتكەن جيىندا وسىعان قاتىستى ەلىمىز تاراپىنان بىرنەشە ۇسىنىس تىلەكتەر ورتاعا تاستالدى. ناقتىراق ايتساق, مادەنيەت جانە اقپارات ءمينيسترى دارحان مىڭباەۆ حالقىمىزدىڭ ايتىس ونەرىن, كيىز ءۇيدى جاساۋ قولونەرى مەن ونىڭ جابدىقتارىن وسى تىزىمگە ەنگىزۋ ماسەلەسىن كوتەردى.
سونىمەن قاتار, كوميسسيا وتىرىسىنان شىعارىلعان تاعى ءبىر ناتيجە قازاقستاننىڭ يۋنەسكو اياسىندا قۇرعان تۇڭعىش گلياتسيولوگيا ورتالىعى اعىمداعى جىلدىڭ سوڭىندا تولىق ىسكە قوسىلاتىن بولدى. بۇل – يۋنەسكو قامقورلىعىمەن پايدالانۋعا بەرىلەتىن الەمدەگى ءبىرىنشى گلياتسيولوگيالىق ورتالىق. ورتالىق ايماقتىق سۋ رەسۋرستارىنىڭ قالىپتاسۋى اۋماعىندا تابيعي ۇدەرىستەردى زەرتتەيتىن بولادى.
جيىن سوڭىندا قر ۇكىمەتى مەن يۋنەسكو اراسىندا قازاقستاندا ورتالىق ازيا ايماقتىق گلياتسيولوگيا ورتالىعىن قۇرۋ تۋرالى كەلىسىمگە قول قويىلدى. اتالعان قۇجاتتى قر ءبىلىم جانە عىلىم ءمينيسترى باقىتجان جۇماعۇلوۆ پەن يۋنەسكو-نىڭ باس ديرەكتورى يرينا بوكوۆا بەكىتتى.
شىنار دوسان
