ەلوردادا 8 قىركۇيەك پەن 8 قازان ارالىعىندا قالا اۋماعىن سانيتارلىق تازارتۋ, اباتتاندىرۋ جانە كوگالداندىرۋ جونىندەگى كۇزگى ەكولوگيالىق ايلىق اياسىندا 20 قىركۇيەكتە جالپى قالالىق سەنبىلىك وتەدى.
وسىعان بايلانىستى ەسىل وزەنى, اقبۇلاق پەن سارىبۇلاق وزەكشەلەرى قوقىستان جانە باسقا دا تۇرمىستىق قالدىقتاردان تازارتىلادى. ساياباقتار مەن شاعىن باقتارداعى جاسىل جەلەكتەردى كۇتۋدىڭ ماۋسىمدىق جۇمىستارى جۇرگىزىلەدى.
قالا اكىمدىگىنىڭ باسپاسوز مالىمەتى بويىنشا, سەنبىلىككە 4300 كاسىپورىن مەن ۇيىم, 47 جوعارى جانە ارناۋلى ورتا وقۋ ورىنى, 86 ورتا مەكتەپ, 131 مەملەكەتتىك مەكەمە مەن ۇلتتىق كومپانيادان 95 مىڭعا جۋىق ادام قاتىسۋى جوسپارلانعان.
ەكولوگيالىق ايلىق اياسىندا قالا اۋماعىنان بىرنەشە مىڭ توننا قوقىس شىعارىلماق. اۋداندىق اكىمدىكتەر تازالىق شاراسىنا قاتىسۋشىلاردى قاجەتتى قۇرال-جابدىقتارمەن, اتاپ ايتقاندا, كۇرەك, تىرناۋىش, قولعاپ, قوقىس سالاتىن قاپتارمەن قامتاماسىز ەتەدى.
جينالعان قوقىستى شىعارۋعا 460 تەحنيكا, سونىڭ ىشىندە 280 جۇك كولىگى, 180 جۇك تيەگىش جۇمىلدىرىلادى.
ەڭبەك مەرەكەسىندە بىرنەشە اۋماقتا ەكى مىڭنان استام اعاش وتىرعىزىلادى. اتاپ ايتقاندا, الماتى اۋدانىندا – 2 153 اعاش , سارىارقا اۋدانىندا – 150 اعاش ەگىلىپ, 1000 ق.م. جاسىل قورشاۋ تۇرعىزۋ كوزدەلگەن.
ساعي ورال
