استانا تويىندا «وزەن اۋەندەرى» شىرقالادى. ءداستۇرلى كلاسسيكالىق مۋزىكا كەشتەرى 5-7 شىلدە ارالىعىندا ساعات 21:00-دە ەسىل وزەنى ۇستىندە وتەدى.
اشىق اسپان اياسىنداعى «وزەن اۋەندەرى» مەرەكەسى جەتى جىلدان بەرى ەلوردا دۋمانىنىڭ اجىراماس بولىگىنە اينالدى. بۇل فەستيۆالدى بۇگىندە استانانىڭ مىڭداعان قاراپايىم تۇرعىنى مەن قوناقتارى اسىعا كۇتەدى. ويتكەنى, مۇنداعى مۋزىكانىڭ اكادەميالىق جانرى كورەرمەندەرىنە كەرەمەت اسەر سىيلايدى.
ساحنا ادەپكى داستۇرمەن وزەن ۇستىنە قۇرىلادى. ۇيىمداستىرۋشىلاردىڭ ايتۋىنشا, ول شىعىس ستيلىندە بوي كوتەرەدى. كورەرمەندەردىڭ ءبىرى ونى شاتىر ىسپەتتى قابىلداسا, ەندى ءبىرى شىعىس سارايىنا تەڭەيتىنى ءسوزسىز. ونىڭ سىرتقى پىشىنىنەن سيقىر مەن كونە اڭىزعا جەتەلەيتىن شىعىس رەڭكى بايقالادى.
«وزەن اۋەندەرى» كلاسسيكالىق مۋزىكا كەشتەرىنىڭ باعدارلاماسى بىلاي ءوربيدى:
5 شىلدە كۇنى كەش شىمىلدىعىن سيمفونيالىق مۋزىكا كونتسەرتى اشادى. بيىل تۇركيادان كەلگەن ارنايى قوناقتار – تانىمال ديريجەر زافەر گيۋندوگدۋدىڭ جەتەكشىلىگىمەن انكارا قالاسىنىڭ مەملەكەتتىك وپەرا جانە بالەت تەاترى وركەسترى ونەر كورسەتەدى. انادولىنىڭ باي مۋزىكالىق مۇراسىنىڭ ءىنجۋ-مارجانىن تەرگەن وركەستر كلاسسيكالىق جانە ۇلتتىق تۋىندىلاردى شەبەر بىرىكتىرىپ, تىڭدارماننىڭ قۇلاق قۇرىشىن قاندىرادى.
6 شىلدە كۇنىندە كورەرمەندەر تابيعات اياسىنداعى تامىلجىعان مۋزىكا مەن اسەم ءبيدىڭ ۇيلەسىمىنە كۋا بولماق. ءدال وسى كۇنى اباي اتىنداعى مەملەكەتتىك اكادەميالىق وپەرا جانە بالەت تەاترى تانىمال بالەت ترۋپپاسىنىڭ ورىنداۋىندا ەكى بالەت قويىلىمى كورسەتىلەدى. ولار – ەكى كورىنىستى, ءبىر اكتىلى «شەحەرەزادا» (ن.ريمسكي-كورساكوۆتىڭ مۋزىكاسىنا جازىلعان ا.بەنۋانىڭ ليبرەتتوسى) قويىلىمى جانە ج.بيزە مەن ر.ششەدريننىڭ مۋزىكاسىنا جازىلعان ءبىر كورىنىستى «كارمەن-سيۋيتا» بالەتى.
7 شىلدە كۇنى «وزەن اۋەندەرى» كەشى كامەرالىق مۋزىكا كونتسەرتىمەن جالعاسادى. بيىل حالىق ءارتىسى, كورنەكتى سكريپكاشى گاۋحار مىرزابەكوۆانىڭ جەتەكشىلىگىمەن مەملەكەتتىك كامەرالىق وركەستر ساحناعا شىعادى.
ەركە ەسىل ۇستىندە قالىقتاعان ءان كەشىندە كورەرمەندەر سان الۋان ساۋلەلى جارىق عاجايىپتارىن تاماشالاپ, ءارتۇرلى وبرازدارعا قانىعادى. 5-7 شىلدە كۇندەرى «وزەن اۋەندەرى» اياسىنداعى كورىنىستەر «3D mapping» جارىق شوۋىمەن سۇيەمەلدەنەدى.
