مامىر ايىنىڭ باسىندا استانا قالاسىنىڭ پوليتسەيلەرى وزەن بويىنداعى جاعدايدى دا باقىلاۋعا العان بولاتىن. سۋداعى پاترۋل ەسىلدىڭ جاعاسىن كۇن سايىن ساعات 14:00-دەن 21:00-گە دەيىن كۇزەتىپ ءجۇر. ءتارتىپ ساقشىلارىمەن بىرگە «Kazboat-47» قايىعىنا ءبىز دە وتىرىپ, ىشكى ىستەر دەپارتامەنتىنىڭ جاڭا قىزمەتىمەن تانىسىپ قايتتىق.
استانالىق پارك جاقتاعى «سارىارقا» كوپىرىنىڭ استىندا كەزدەستىك. سۋداعى پوليتسيا پۋنكتى ءدال وسى جەردە ورنالاسقان. كەمە ەسىل بويىمەن اقورداعا دەيىن كۇنىنە شامامەن 5 رەيس جاسايدى. سوڭعى مەجەگە جەتۋ ۋاقىتى جىلدامدىق پەن جاعدايعا بايلانىستى. كەمە كاپيتانى قايىقتى كوبىنەسە اسىقپاي جۇرگىزەدى, سەبەبى, پوليتسەيلەر جاعالاۋداعى تىرلىكتى كوزبەن شولىپ شىعۋى ءتيىس. ال, شۇعىل تاپسىرمالار كەزىندە وتاندىق قايىق دىتتەگەن جەرگە لەزدە جەتىپ بارۋعا قاۋقارلى. سەبەبى, قوزعالتقىش قۋاتى 60 اتتىڭ كۇشىمەن تەڭ.
استانا قالالىق ىشكى ىستەر دەپارتامەنتىنىڭ باسشىسى, پوليتسيا گەنەرال-مايورى امانتاي اۋباكىروۆتىڭ باستاماسىمەن قۇرىلعان وزەن ءپاترۋلى قوعامدىق ءتارتىپتى كۇزەتۋگە, قۇقىق بۇزۋشىلىقتىڭ الدىن الۋعا, سونداي-اق, جەدەل ىزدەستىرۋ شارالارى مەن قۇتقارۋ جۇمىستارىن جۇرگىزۋگە باعىتتالعان. پوليتسيا جاساعىنىڭ قۇرامىندا جەرگىلىكتى پوليتسيا قىزمەتىنىڭ جول-پاترۋلدىك پوليتسيا پولكىنىڭ ارنايى دايىندىقتان وتكەن ەكى قىزمەتكەرى بار. كەمەگە 5 جولاۋشى سىيادى. ياعني, قايىق قۇقىق بۇزعان ەكى ازاماتتى وزدەرىنە وتىرعىزىپ, كولىك ءپاترۋلى كەلگەنشە دەيىن بۇزاقىلاردى جىبەرمەۋگە قۇقىلى.
پوليتسيا سەرجانتى نۇرسۇلتان تەمىرعاليەۆ پەن اعا-سەرجانت مەيىربەك قۇسايىنوۆ قايىققا وتىرماس بۇرىن قارۋ-جاراعىن اسىنىپ الدى. بۇدان كەيىن ەرەجەگە سايكەس قۇتقارۋ جيلەتىن كيىپ, جولعا شىقتىق. «وسى ايداعى جاعداي قالىپتى. جاعاجايدا ىشىمدىك ىشكەن, تىيىم سالىنعان جەرلەردە سۋعا تۇسكەن ازاماتتاردى كوزىمىز شالمادى. 26-سى جاعاجاي اشىلدى. سۋدىڭ بەتى جىلىندى. قىزۋ جۇمىس الدا كۇتىپ تۇر» دەيدى نۇرسۇلتان تەمىرعاليەۆ. وزەن جاعاسىندا بالىق اۋلاۋعا رۇقسات ەتىلسە دە, اتالعان جەردە ۆەلوسيپەدپەن جۇرۋگە قاتاڭ تىيىم سالىنعان. بۇل ەرەجەنى بۇزۋعا بالالار بەيىم كەلەدى. كوز الدىمىزدا ءتورت-بەس وقۋشى كوپىردىڭ بەتكەيىندەگى كولبەي جولدى اۋەس كورىپ, ۆەلوسيپەدپەن ءجۇر. ولارعا اعا-سەرجانت راتسيامەن داۋىستاپ ەسكەرتۋ جاساپ, بۇل جەردە جۇرۋگە بولمايتىنىن ايتقانى سول ەدى, بالالار كولىكتەرىن قولدارىنا ۇستاپ تۇرا قاشتى. قايىقتاعى پوليتسيا قىزمەتىنىڭ اشىلعاندىعىنا «ەسىل-استانا» مكقك جۇمىسكەرلەرى ەرەكشە قۋانىپتى. سەبەبى ءجۇزۋ ماۋسىمى باستالعاندا پاروحودتاردىڭ جۇرىسىنە وزەننىڭ ورتاسىنداعى قالقىما بەلگىدەن ارى ءجۇزىپ باراتىن ماس ازاماتتار كەدەرگى كەلتىرەدى ەكەن. پاروحود سۋ بەتىندە قاتتى تولقىن كوتەرگەندە, جۇزۋشىلەر سۋعا باتىپ كەتۋى مۇمكىن. ەندى قالا تۇرعىندارىنىڭ سۋداعى ەرەجەنى بۇلجىتپاي ورىنداماۋعا امالى جوق. سونداي-اق, كوپىردەن سەكىرۋشىلەر دە جازاسىز قالمايدى. قانداي دا ءبىر اكىمشىلىك قۇقىقبۇزۋشىلىقپەن ۇستالعان ازاماتتار زاڭ بويىنشا ايىپپۇل تولەيدى.
«كاتەر 80 سم-گە دەيىنگى تولقىنعا توتەپ بەرەدى. جەلدىڭ ۇيىتقۋ كۇشى سەكۋندىنا 15 مەتردەن ارتسا, سۋ كولىگىنىڭ قوزعالىسى توقتاتىلادى. ال, جاڭبىر قۇيسا, قايىقتىڭ توبەسىن جاباتىن شاتىر قۇرىلادى» دەيدى موتورشى-مەحانيك ۆلاديمير پوتۋپالوۆ.
بۇدان وزگە, پوليتسيا كەمەسى دابىل, جىلجىمالى راديوقۇرىلعى جانە مەديتسينالىق كومەك كورسەتۋگە ارنالعان قوبديشامەن جابدىقتالعان. سۋداعى پوليتسيا قىزمەتى كۇزگە دەيىن ەسىل وزەنى تىنىشتىعىن كۇزەتپەك.
ءمادينا جاقىپ
