پوليتسيا ستارشيناسى نيكولاي جگۋن قازاق تىلىندە قاتىرىپ سويلەيدى. قولعا تۇسكەن بۇزاقىلار وزدەرىن ۇستاعان پوليتسەيگە دەگەن نارازىلىعىن قازاقشالاپ سوعىپ جاتقاندا, ورتا جولدان اڭگىمەگە جگۋن قوسىلادى. وسىلاي, تالاي قىلمىسكەردىڭ اۋزىن جاپقانى بار.
«وزگە ۇلتتى كورسەك بولدى, ورىسشا سويلەيتىن ادەتىمىز ەمەس پە؟ نيكولايدىڭ قازاقشاعا سۋداي ەكەنىن ەستەن شىعارىپ, وعان دا ورىسشا سويلەپ كەتەمىز. ال ول قازاقشا جاۋاپ بەرىپ, ادامدى ۇيالتىپ تاستايدى» دەيدى قازاق ارىپتەستەرى.
نيكولاي قازاقستاندا تۇرىپ جاتقان كەز كەلگەن ازامات ۇلتىنا قاراماي مەملەكەتتىك ءتىلدى ءبىلۋى مىندەت دەپ ەسەپتەيدى. ءوزى اقمولا وبلىسى, قورعالجىن اۋدانىندا وقۋشى بولىپ جۇرگەندە, قازاقشا ۇيرەنۋگە دەن قويا باستاپتى. قازاقتىڭ قارا دومالاقتارىمەن بىرگە ويناپ, سويلەسىپ جۇرگەن ول ءبىر-بىرتە تىلدىك قورىن كوبەيتە باستايدى. اباي ولەڭدەرىن داۋىستاپ وقىپ, ءتىلىن ۇستارتا تۇسەدى. ونىمەن قويماي, جەرگىلىكتى حالىقتىڭ سالت-داستۇرىمەن دە ەتەنە تانىسا باستايدى. وسىلايشا, اينالدىرعان بىرنەشە جىلدىڭ ىشىندە بەلارۋس ۇلتىنىڭ وكىلى قازاق ءتىلىن مەڭگەرىپ شىعادى.
– كوپتەگەن زامانداستارىم قازاق ءتىلىن ۇيرەنۋدى قيىنسىنادى. ولارعا ايتارىم, قازاقشا ۇيرەنۋدىڭ ەشقانداي قيىندىعى جوق, تەك ىنتا-ىقىلاس بولسا جەتكىلىكتى. قازىر ءبىز وزگە ۇلت وكىلدەرىنىڭ قازاقشا سويلەگەنىنە ەمەس, كەرىسىنشە, سويلەمەگەنىنە تاڭ قالۋىمىز كەرەك. ءتىلدى ۇيرەنەتىن ۋاقىت جەتتى. بولاشاعىن قازاقستانمەن بايلانىستىرعىسى كەلگەن ءاربىر ازامات مەملەكەتتىك ءتىلدى مەڭگەرۋگە ءتيىس, – دەيدى نيكولاي.
استانا قالاسى ءىىد «سارىارقا» اۋداندىق ءىىب پوليتسەيى جان جارىن دا قازاق قىزدارىنىڭ ىشىنەن تاڭداپتى. جۇبايى جاننا دا قۇقىق قورعاۋ ورگانىندا جۇمىس ىستەيدى. ەكەۋى يسلام, يلانا جانە يمران اتتى ءتاتتى بالدىرعانداردى تاربيەلەپ وتىر. ايتپاقشى, ەكى ۇلكەنى قازاق بالاباقشاسىنا بارادى.
قازاقستان حالقىنىڭ بىرلىگى كۇنى – نيكولاي مەن جاننانىڭ سۇيىكتى مەرەكەلەرىنىڭ ءبىرى. وسى كۇنى بۇل شاڭىراقتا قازاقتىڭ قازىسى اسىلىپ, داستارقانعا بەلارۋس حالقىنىڭ قىتىرلاق كارتوشكاسى قويىلادى. جىلىلىق ۇيالاعان وتباسىنىڭ تىلەگى دە ءبىر: ەلىمىزدە تىنىشتىق پەن بەيبىتشىلىك بولسىن دەيدى.
قىمبات نۇرعالي
