فرانتسيا استاناسى پاريجدە 31 قازان مەن 3 قاراشا ارالىعىندا استانا قالاسىنىڭ كۇندەرى وتەدى.
فرانتسيا – كورمە وتكىزۋ ءجونىنەن تاجىريبەسى مول ەل. وسى تۇرعىدا ەلوردالىق مامانداردان قۇرالعان دەلەگاتسيا ارىپتەستەرىنىڭ ءتاجىريبەسىن زەردەلەيتىن بولادى. ءبۇگىندە كوپتەگەن فرانتسۋز كومپانيالارى «ەكسپو-2017» حالىقارالىق كورمەسىن دايىنداۋ جانە ۇيىمداستىرۋ جۇمىستارىنا بەلسەنە قاتىسۋدا. سوندىقتان, قوس مەملەكەتتىڭ اراسىندا فارماتسەۆتيكا, تۋريزم, اۋىل شارۋاشىلىعى سالالارىندا ىنتىماقتاستىق ورناتۋدىڭ جاڭا مۇمكىندىكتەرى تۋىپ وتىر.
ال, استانا قالاسىنىڭ كۇندەرى اياسىندا ەيفەل مۇناراسى ءساۋلەتىمەن كوز تارتاتىن قالادا قازاق ەتنواۋىلى تىگىلىپ, كوشپەندىلەردىڭ مادەنيەتى مەن تۇرمىسى تانىستىرىلادى. «پالە رويال» الاڭىندا بىرەگەي جوبا – اتا-بابامىزدىڭ مادەنيەتى مەن كوشپەندىلەردىڭ ءوركەنيەتى, تۇرمىس-تىرشىلىگى كورسەتىلمەك.
پاريج الاڭىندا شىعىس بازارى ۇلگىسىندەگى جارمەڭكەدە كيىز ۇيلەر تىگىلىپ, ىشىندە اشەكەيلەر, بىلعارى مەن اعاشتان جاسالعان بۇيىمدار, قولونەرشىلەردىڭ جاساعان كادەسىيلارى ساتىلادى. ەتنواۋىلدى ارالاۋ ءۇشىن قوس باعانا ورتاسىنا تارتىلعان تەرىگە ۇقساتىپ ارنايى جاسالعان ەرەكشە كارتا-سىزبا ىلىنەدى.
سونىمەن قاتار, قوناقتاردىڭ ءوز قولىمەن كيىز ءۇي تىگۋىنە نەمەسە قۇمىرا جاساۋىنا, زەرگەرلەردىڭ شەبەرلىك سىنىپتارىنا قاتىسۋىنا جاعداي جاسالادى.
«شەبەرلەر اۋىلى» كيىز ءۇيى ءوزىنىڭ مول مۇمكىندىكتەرىمەن, جابدىقتارىنىڭ ادەمىلىگىمەن كوپشىلىكتى ءتانتى ەتپەك. ساحنا تورىندە استانا قالاسىنىڭ انشىلەرى مەن شىعارماشىلىق ۇجىمدارى ءوز ونەرلەرىن ورتاعا سالادى.
ساحنا جانىنا التىباقان ورناتىلادى. ال ورتاعا تۋ مەن تۇمارلاردىڭ اينالاسىنا ديامەترى توعىز مەتر جانە بيىكتىگى بەس مەترلىك اق وردا – كيىز ءۇي تىگىلەدى.
ساعي ورال
