پرەزيدەنت قاسىم-جومارت توقاەۆ پارلامەنت ءماجىلىسىنىڭ پلەنارلىق وتىرىسىنا قاتىستى. مەملەكەت باسشىسى پارلامەنت ءماجىلىسىنىڭ جاڭا قۇرامى سايلانۋىنا بايلانىستى ۇكىمەت ءوز وكىلەتتىگىن توقتاتقانىن ايتتى. سونداي-اق ۇكىمەتتىڭ اتقارعان جۇمىسىنا قىسقاشا توقتالىپ, شۇعىل شارالاردىڭ ناتيجەسىندە ەل ەكونوميكاسى 3,2 پايىزعا وسكەنىن, حالىقتىڭ الدىنداعى الەۋمەتتىك مىندەتتەمەلەر ۋاقتىلى جانە تولىعىمەن ورىندالعانىن جەتكىزدى.
پرەزيدەنتتىڭ ايتۋىنشا, مۇنىڭ بارىنە بيلىك تارماقتارىنىڭ بىرلەسىپ جۇمىس ىستەۋىنىڭ ارقاسىندا قول جەتكىزىلدى. وسى ىنتىماقتاستىقتى نىعايتىپ, ۇكىمەت پەن پارلامەنت ەكونوميكانى دامىتىپ, حالىقتىڭ ءال-اۋقاتىن ارتتىرۋ ءۇشىن بارلىق كۇش-جىگەرىن جۇمىلدىرۋعا ءتيىس.
جيىن سوڭىندا پرەزيدەنت پرەمەر-ءمينيستردىڭ كانديداتۋراسىن ماجىلىستەگى پارتيالار فراكتسيالارىنىڭ جەتەكشىلەرىمەن تالقىلاعاننان كەيىن ورتاق مامىلەگە كەلگەنىن اتاپ ءوتتى. مەملەكەت باسشىسى قازاقستان رەسپۋبليكاسى اتا زاڭىنىڭ 44-بابىنا سايكەس پرەمەر-مينيستر لاۋازىمىنا ءاليحان سمايلوۆتىڭ كانديداتۋراسىن ۇسىندى.
مەملەكەت باسشىسى پرەمەر-مينيستر لاۋازىمىنا ۇسىنىلعان كانديداتۋرانى قولداعانى ءۇشىن ءماجىلىس دەپۋتاتتارىنا ريزاشىلىعىن ءبىلدىردى.
***
ءماجىلىس دەپۋتاتتارى پرەمەر-مينيستر لاۋازىمىنا ءاليحان اسحانۇلى سمايىلوۆتى تاعايىنداۋعا كەلىسىم بەردى. ءماجىلىس دەپۋتاتتارى ۇكىمەت باسشىسى كانديداتۋراسىن تالقىلاعاننان كەيىن «قازاقستان رەسپۋبليكاسىنىڭ پرەزيدەنتىنە قازاقستان رەسپۋبليكاسى پرەمەر-ءمينيسترى لاۋازىمىنا سمايىلوۆ ءاليحان اسحانۇلىن تاعايىنداۋعا كەلىسىم بەرىلسىن» دەگەن قاۋلى جوباسىنا داۋىس بەردى. داۋىس بەرۋ بارىسىندا جالپى وتىرىسقا قاتىسقان 97 دەپۋتاتتىڭ 82-ءسى ونىڭ كانديداتۋراسىن قولدادى. 7 دەپۋتات قارسى شىعىپ, 8 دەپۋتات قالىس قالدى.
مەملەكەت باسشىسى قاسىم-جومارت توقاەۆ ءاليحان اسحانۇلى سمايىلوۆتى قازاقستان رەسپۋبليكاسىنىڭ پرەمەر-ءمينيسترى لاۋازىمىنا تاعايىنداۋ تۋرالى جارلىققا قول قويدى.
