مەملەكەت باسشىسىنىڭ تاپسىرماسىنا سايكەس, وسى جىلدىڭ 1 قاڭتارىنان باستاپ بۇكىل ەل بويىنشا, ونىڭ ىشىندە نۇر-سۇلتاندا مەكتەپ مۇعالىمدەرىنىڭ, كوللەدج پەداگوگتارىنىڭ, بالاباقشا تاربيەشىلەرىنىڭ جالاقىسى تاعى 25 پايىزعا ارتتى. بۇرىن پەداگوگتاردىڭ جالاقىسى 2020 جىلعى قاڭتاردا 25 پايىزعا جانە 2021 جىلعى قاڭتاردا تاعى 25 پايىزعا وسكەن ەدى. وسىلايشا مۇعالىمدەردىڭ جالاقىسى ەكى ەسە ءوستى.
«ءبىز مۇعالىمدەردىڭ جالاقىسىن كوتەرۋدىڭ ءسوزسىز وڭ اسەرىن كورىپ وتىرمىز. ءبىزدىڭ كاسىبىمىزگە – پەداگوگ كاسىبىنە قازىرگى تاڭدا ۇزدىكتەر كەلەدى. پەداگوگيكالىق ماماندىققا تۇسەتىندەردىڭ ۇبت ورتاشا بالى ايتارلىقتاي ءوستى جانە «التىن بەلگى» يەگەرلەرىنىڭ سانى بىرنەشە ەسەگە كوبەيدى. مۇعالىمدەردىڭ ەڭبەكاقىسىن ارتتىرۋ – ەل بولاشاعىنا ۇلكەن ينۆەستيتسيا» دەپ اتاپ ءوتتى ءبىرىنشى ۆيتسە-مينيستر شولپان كارينوۆا.
وسى جىلدىڭ قاڭتار ايىنان باستاپ پرەزيدەنت ق.توقاەۆ تاپسىرعانداي, بارلىق پەداگوگ جوعارى جالاقى الاتىن بولادى. جالاقىمەن بىرگە مۇعالىمدەر الاتىن قوسىمشا تولەمدەر دە ارتادى. بۇل – بىلىكتىلىك ساناتى ءۇشىن (لاۋازىمدىق جالاقىنىڭ 30 پايىزىنان 50 پايىزىنا دەيىن), ماگيستر دارەجەسى ءۇشىن, اعىلشىن تىلىندە پاندەردى جۇرگىزگەنى, داپتەر تەكسەرگەنى, سىنىپ جەتەكشىلىگى جانە تالىمگەرلىك ءۇشىن تولەنەتىن ۇستەمەاقىلار.
