پەنزا دا پەيىلدەسىمىز
بەيسەنبى كۇنى استانا قالاسىنىڭ اكىمدىگى مەن رەسەي فەدەراتسياسى پەنزا وبلىسىنىڭ باسشىلىعى اراسىندا ساۋدا-ەكونوميكالىق, عىلىمي-تەحنيكالىق جانە مادەني ىنتىماقتاستىق تۋرالى رەسمي كەلىسىمگە قول قويىلدى.
– بۇگىن, مىنە, كوپتەن جوسپارلاعان جوبالارىمىزدى جۇزەگە اسىرۋعا وزەك بولاتىن كەلىسىمشارتقا قول قويماقشىمىز. ەكىجاقتى كەلىسىم ءوزارا ءىس-قيمىلىمىزدى ودان ءارى دامىتۋعا سەرپىن بەرەتىنىنە سەنىمىم مول, – دەدى كەزدەسۋ بارىسىندا استانا قالاسىنىڭ اكىمى يمانعالي تاسماعامبەتوۆ.
پەنزا وبلىسىنىڭ گۋبەرناتورى ۆاسيلي بوچكارەۆ ەلوردالىق ارىپتەستەرىنىڭ قوناقجاي پەيىلىنە جىلى لەبىزىن ءبىلدىرىپ, استانامەن ارقاشان ارىپتەستىككە ءازىر ەكەنىن ايتتى. ول ءوز سوزىندە قازاقستان مەن ونىڭ جاس ەلورداسىنىڭ تاۋارلارى, قىزمەت سالاسى پەنزا وبلىسى ارقىلى رەسەيگە كەلۋىن حوش كورەتىنىن, وعان ارقاشان قولداۋ كورسەتۋگە دايىن ەكەندىكتەرىن جەتكىزدى. سونداي-اق, وزدەرىندەگى جەر, مۇلىك سالىقتارىن جەڭىلدەتەتىن باعدارلامالار قازاقستان جاعىنا دا ءتيىمدى بولاتىنىن اتاپ ءوتتى.
قوس تاراپ جاساسقان كەلىسىم اياسىندا استانادا پەنزا وبلىسىنىڭ وكىلدىگىن, ال پەنزا وبلىسى اۋماعىندا استانا قالاسىنىڭ وكىلدىگىن اشۋ قاراستىرىلعان. قالا اكىمىنىڭ ايتۋىنشا, مادەني سالاداعى ارىپتەستىك 2013 جىلعا جوسپارلانىپ وتىرعان پەنزا وبلىسىنىڭ استاناداعى مادەني كۇندەرىنەن باستاۋ الادى. كەلەسى جىلى وبلىس 350 جىلدىعىن اتاپ وتەدى. قولعا الىناتىن شارا وسى مەرەيتويعا ارنالادى.
ەكى جاقتىڭ ىنتىماقتاستىق قۇجاتىنا قول قويۋ راسىمىنەن كەيىن استانا قالاسىنىڭ اكىمى يمانعالي تاسماعامبەتوۆ پەن پەنزا وبلىسىنىڭ گۋبەرناتورى ۆاسيلي بوچكارەۆ يندۋستريالدىق پارك اۋماعىنداعى «تۇلپار-تالگو» جولاۋشىلار پويىزىن شىعاراتىن, لوكوموتيۆ قۇراستىرۋ زاۋىتتارىن جانە جاڭادان سالىنعان «جەو-3-ءتى» ارالاپ كوردى.
سونىمەن بىرگە, پەنزا وبلىسىنان كەلگەن دەلەگاتسيا تاۋەلسىزدىك سارايى, رەسپۋبليكالىق نەيروحيرۋرگيا عىلىمي ورتالىعى, «سارىارقا» رەسپۋبليكالىق ۆەلوترەگى, «استانا-ارەنا» ستاديونى سىندى ماڭىزدى نىساندار مەن جانە 1-2 جەلتوقسان كۇندەرى وتەتىن كونكي تەبۋ سپورتى بويىنشا الەم كۋبوگىنا قىزۋ دايىندالىپ جاتقان «الاۋ» مۇز ايدىنىنا بارىپ, زاماناۋي قۇرىلعىلارمەن جابدىقتالعان عيماراتتاردىڭ ءسان-سالتاناتىنا كۋا بولدى.
قىمبات توقتامۇرات