باستى اقپارات

پەنزا گۋبەرناتورىمەن پىكىرلەستى

كەشە استانا قالاسىنىڭ اكىمى يمانعالي تاسماعامبەتوۆ رەسەي فەدەراتسياسى پەنزا وبلىسىنىڭ گۋبەرناتورى ۆاسيلي بوچكارەۆپەن كەزدەستى.

پەنزا وبلىسىنىڭ گۋبەرناتورى باستاپ كەلگەن دەلەگاتسيانىڭ قۇرامىندا وڭىرلىك ۇكىمەتتىڭ, قالانىڭ زاڭ شىعارۋ ءماجىلىسىنىڭ وكىلدەرى, جوعارى وقۋ ورىندارىنىڭ باسشىلارى مەن بيزنەس, ونەركاسىپ سالاسىنىڭ ماماندارى بار.

كەزدەسۋ بارىسىندا ەكىجاقتى بايلانىستاردى ودان ءارى نىعايتۋ, ءبىر-بىرىمەن تاجىريبە الماسۋ ماسەلەلەرى توڭىرەگىندە كەڭىنەن اڭگىمە ءوربىدى.

استانا قالاسىنىڭ اكىمى يمانعالي تاسماعامبەتوۆ مارتەبەلى مەيماندارعا قازاق ەلىنىڭ جاس ەلورداسىن كەڭىنەن تانىستىرىپ, شاھاردىڭ دامۋ ديناميكاسىنا توقتالدى.
– قازاقستاننىڭ ەلورداسىن اۋىستىرۋ يدەياسى تاۋەلسىزدىگىمىز ەندى عانا ءتاي-ءتاي باسقان, ەكونوميكالىق قيىن-قىستاۋ كەزەڭدە دۇنيەگە كەلدى. بۇل تىم تاۋە­كەلشىل, باتىل قادام بولاتىن. پرەزيدەنتىمىزدىڭ بۇل شەشىمىنىڭ دۇرىستىعىن ۋاقىتتىڭ ءوزى كورسەتتى. بۇرىن تەك جاڭا اكىمشىلىك ورتالىق بولادى دەپ بولجانعان شاھار از ۋاقىتتىڭ ىشىندە قارقىندى دامىپ, ۇلكەن جەتىستىكتەرگە قول جەتكىزىپ وتىر, – دەدى يمانعالي نۇرعاليۇلى.

سونداي-اق, استانا اكىمى ەلورداداعى مەملەكەتتىك ماڭىزى بار نىساندار, يندۋستريالدىق پارك, مەديتسينالىق كلاستەر, ءبىلىم, سپورت سالاسىنداعى تابىستاردى رەسەيلىك مەيماندارعا تانىستىردى. «كوپ ەستىگەننەن ءبىر كورگەن ارتىق» ەكەنىن ەسكە سالعان ەلوردا اكىمى دەلەگاتسيانى وسى اتقارىلىپ جاتقان شارۋالاردى ءوز كوزدەرىمەن كورۋگە شاقىردى.

ەلىمىزدىڭ باس قالاسىنا ات باسىن بۇرعان مەيماندار استانانىڭ اجارىن الدىمەن اۋىزعا الادى. پەنزا وبلىسىنىڭ گۋبەرناتورى ۆاسيلي بوچكارەۆ تا قازاقستان استاناسىنىڭ كەلبەتىنە سۇيسىنگەنىن ءبىلدىردى. ول استاناعا 2003 جىلى  كەلگەنىن, اراداعى ۋاقىت ىشىندە ەلوردا ادام تانىماستاي وزگەرگەنىن تامسانا جەتكىزدى.

– استانانىڭ قاي سالاسىندا دا ءبىز قىزىعارلىق, تاجىريبە الماسارلىق جەتىستىكتەر كوپ ەكەن, – دەدى گۋبەرناتور. – اسىرەسە, قالانى سالۋدىڭ, وعان ساۋلەت بەرۋدىڭ قىر-سىرى, بيزنەسپەن بىرلەسە وتىرىپ, بالاباقشا سالۋ ماسەلەلەرى كوڭىلىمىزگە قونىپ وتىر. بۇل باعىتتاعى ىنتىماقتاستىعىمىز جاراسىم تاباتىنىنا سەنىمىم كامىل, – دەدى ۆاسيلي بوچكارەۆ.

قوس تاراپ استانا مەن پەنزا وبلىسى اراسىندا بارلىق سالا بويىنشا ارىپتەستىك قارىم-قاتىناس تولاستاماي, سەرپىندى داميتىنىنا سەنىم ءبىلدىردى.

قىمبات توقتامۇرات

تاعىدا

ۇقساس جاڭالىقتار

پىكىر ۇستەۋ

Back to top button