پولشا ۆيتسە-مينيسترىمەن كەزدەستى
استانا قالاسى اكىمىنىڭ ورىنباسارى اندرەي لۋكين ەلىمىزگە جۇمىس ساپارىمەن كەلگەن پولشا رەسپۋبليكاسىنىڭ دامۋ ۆيتسە-ءمينيسترى رادوسلاۆ دوماگالسكي – لابەندزكيمەن كەزدەستى. تاراپتار ەكونوميكالىق جانە مادەني سالالارداعى ەكىجاقتى ىنتىماقتاستىقتى كەڭەيتۋ ماسەلەلەرىن تالقىلادى.
كەزدەسۋدە پولشا مەملەكەتى ەكسپو-2017 حالىقارالىق مامانداندىرىلعان كورمەسىنە قاتىسۋ تۋرالى كەلىسىمگە قول قويدى. ماڭىزدى قۇجاتقا قول قويۋ بارىسىندا ەلوردا اكىمىنىڭ ورىنباسارى ا.لۋكين حالىقارالىق كورمەنى وتكىزۋ ەكى جاقتى ءوزارا ءىس-ارەكەتتى دامىتۋعا جاقسى سەرپىن بەرەتىنىن اتاپ ءوتتى.
– مەن تاجىريبەسى مەن تەحنولوگيالارى تۇرعىسىنان پولياك كاسىپورىندارىنىڭ ۇسىنارى بار ەكەنىنە سەنىمدىمىن, بۇل تاراپتار ءۇشىن ءوزارا ءتيىمدى ەكونوميكالىق ىنتىماقتاستىق ورناتۋدىڭ جاقسى مۇمكىندىگى, – دەدى اندرەي لۋكين.
ونىڭ ايتۋىنشا, استانا – ەكى ەل اراسىنداعى قارىم-قاتىناستاردىڭ جان-جاقتى دامۋىن قولداپ, ۆارشاۆا مەن گدانسك سياقتى باۋىرلاس قالالارعا باسا نازار اۋدارىپ وتىرعان كورىنەدى. بۇگىنگى تاڭدا 2020 جىلعا دەيىنگى ەكى استانانىڭ اراسىنداعى ىنتىماقتاستىق باعدارلاماسى دايىندالۋدا.
سونىمەن بىرگە پولياك كاسىپكەرلەرى باس قالاداعى №1 يندۋستريالدى پارك اۋماعىندا ينۆەستورلار ءۇشىن جاسالعان جاعدايلارعا جوعارى باعاسىن بەردى. الداعى تاڭدا ەلوردادا قۇرىلىس ماتەريالدارىن شىعاراتىن پولياك زاۋىتتارىنىڭ ءبىرى ىسكە قوسىلماق. قالا اكىمىنىڭ ورىنباسارى ءوز سوزىندە №2 يندۋستريالدى پاركتىڭ اشىلاتىنىنا توقتالىپ, ونىڭ ەلىمىز اۋماعىندا بيزنەستى كەڭەيتۋگە مۇمكىندىك تۋعىزاتىنىن ايتىپ ءوتتى.
سونداي-اق, جۇزدەسۋ بارىسىندا تاراپتار ايماقتىق, ينتەللەكتۋالدىق جانە تۋريستىك سالالاردا ىنتىماقتاستىق ورناتۋ مۇمكىندىكتەرىن ءسوز ەتتى.